Жанна Дапкюнас
Жанна Дапкюнас | |
Імя пры нараджэньні | Жанна Касьпяровіч |
---|---|
Род дзейнасьці | беларускі літаратуразнаўца, арганізатар музэйнай справы |
Дата нараджэньня | 8 сакавіка 1941 году |
Месца нараджэньня | Беласток (у 1941 г. — СССР , цяпер — Польшча ) |
Грамадзянства | Беларусь |
Месца вучобы | |
Занятак | літаратуразнаўца |
Месца працы | |
Бацька | Казімер Касьпяровіч |
Маці | Ядвіга Раманоўская |
Муж | Вадзім Дапкюнас |
Дзеці | Андрэй, Ігар |
Узнагароды | |
Жанна Казімераўна Дапкюнас (нарадзілася 8 сакавіка 1941 году ў Беластоку (Польшча) — беларускі літаратуразнаўца і арганізатар музэйнай справы; унучатая пляменьніца Янкі Купалы[1].
Жыцьцяпіс
Нарадзілася ў сям’і служачых. Маці — Ядвіга Раманоўская — пляменьніца Янкі Купалы.
Скончыла Беларускі дзяржаўны ўнівэрсытэт па спецыяльнасьці «беларуская мова і літаратура» (1963).
З 1963 па 2005 год працавала ў Літаратурным музэі Янкі Купалы. Прайшла ўсе прыступкі прафесійнай кар’еры ад навуковога супрацоўніка да кіраўніка музэя. Займала пасады загадчыка навукова-экспазыцыйнага аддзела і вучонага сакратара музэя. У 1980—1986 гг. — намесьнік дырэктара музэя.
З 1986 па 2002 год — дырэктар Літаратурнага музэя Янкі Купалы. Заснавальнік (1995) і нязьменны намесьнік старшыні Міжнароднага фонду Янкі Купалы.
Творчы і дасьледчыцкі шлях
Ініцыятар і арганізатар стварэньня ландшафтнага заказьніка «Купалаўскі» (Лагойскі і Менскі раёны, 2000), філіялаў Літаратурнага музэя Янкі Купалы ў Акопах (Лагойскі раён, 1992) і Яхімоўшчыне (Маладэчанскі раён, 2001).
Кіравала творчай групай па стварэньні галоўнай экспазыцыі музэя (1976), экспазыцый у філіялах музэя ў Вязынцы (1972) і Ляўках (1977), музэя-кватэры Янкі Купалы ў Пячышчах (Татарстан, 1975), гісторыка-літаратурнага музэя «Над ракою Арэсай» у калгасе «Чырвоная зьмена» (Любанскі раён) (1980).
З 1995 году — арганізатар міжнародных навуковых канфэрэнцый па творчасьці Янкі Купалы — Міжнародных купалаўскіх чытаньняў. Ініцыятар супрацоўніцтва музэю з профільнымі ўстановамі Расеі, Польшчы, Украіны, Вялікабрытаніі, Чэхіі і іншых краінаў. Зьяўлялася нацыянальным каардынатарам ад Беларусі міжнароднага праекту «Літаратурны экспрэс Эўропа 2000»[2].
Аўтар шматлікіх артыкулаў пра жыцьцёвы шлях і творчасьць Янкі Купалы, навукова-папулярнага кінафільма «Янка Купала» («Беларусьфільм», 1974), радыёперадачаў пра Я. Купалу, буклета «Ляўкі. Купалаўскі мэмарыяльны запаведнік» (1981). Складальнік і аўтар камэнтараў да зборніка Я. Купалы «Публіцыстыка» (1972, разам з Т. Тарасавай), трэцяга тома збору твораў Янкі Купалы ў трох тамах (1982). Сябра рэдакцыйнай калегіі поўнага збору твораў Янкі Купалы ў дзевяці тамах (1995—2003).
Укладальнік кнігі «Я. Купала. Санэты» (2002, разам з В. Рагойшам), буклетаў і альбомаў «Сьвятло Купалава Дому» (1998), «Па Купалаўскіх мясьцінах» (2002, 2006), «Купалаўскія мясьціны на Маладзечаншчыне. Яхімоўшчына» (2004). Удзельнічала ў складаньні «Бібліяграфіі твораў Янкі Купалы» (ч.3, 1972) і бібліяграфіі «Янка Купала ў літаратурнай крытыцы і мастацтвазнаўстве» (1980).
У складзе рэдакцыйнай калегіі рэдагавала запісы I-VII Міжнародных купалаўскіх чытаньняў (1995—2004), каталёг «Янка Купала ў выяўленчым мастацтве, 1882—2002» (2003). Аўтар шэрагу артыкулаў у энцыкляпедычным даведніку «Янка Купала» (1986).
Прафэсійныя адзнакі і ўзнагароды
- Грамата Вярхоўнага Савету БССР (1977)
- Залатая ганаровая адзнака Таварыства польска-савецкага сяброўства (1979)
- Ганаровы знак Міністэрства культуры Рэспублікі Беларусь (2001)
Крыніцы
- ^ Склад конкурснай камісіі па правядзенню конкурса на стварэнне эскізнага праекту помніка Я.Купалу і Я.Коласу ў г.Варшаве Праверана 4 кастрычніка 2011 г.
- ^ Насустрач новаму тысячагодзьдзю – пад стук колаў Праверана 5 кастрычніка 2011 г.
Літаратура
- Янка Купала: Энцыкл. даведнік / БелСЭ; Рэдкал.: І. П. Шамякін (гал. рэд.) і інш. — Мн., БелСЭ, 1986. — 727 с, 26 л. іл.; Артыкул «Дапкюнас Жанна» — С. 185.
- Захавальніца шляхетнага духу Беларусі: Жанна Дапкюнас і Дзяржаўны літаратурны музэй Янкі Купалы // Роднае слова. — 2006. — №3. — С. 102—104.
Вонкавыя спасылкі
- Дзяржаўны літаратурны музэй Янкі Купалы
- Дарогамі паэта
- Помнік Янку Купалу ў Маскве
- «Будзь і нам жа бацькам...»
- Душа паэта
- «Купала марыў аб заможнай і вольнай краіне»
|
- Выпускнікі Беларускага дзяржаўнага ўнівэрсытэту
- Асобы па альфабэце
- Дырэктары Дзяржаўнага літаратурнага музэю Янкі Купалы
- Нарадзіліся 8 сакавіка
- Нарадзіліся ў 1941 годзе
- Нарадзіліся ў Беластоку
- Беларускія літаратуразнаўцы
- Узнагароджаныя Граматай Вярхоўнага Савету БССР
- Купалазнаўцы
- Асобы, зьвязаныя зь Янкам Купалам