Прымакі (спэктакль)

«Прымакі»
Сцэна са спэктаклю
Жанр	народны вадэвіль на адну дзею
Паводле	сцэнічнага жарту Я. Купалы «Прымакі»
Рэжысэр	Аляксандар Гарцуеў
Мастак-пастаноўнік	Тацьцяна Сакалоўская
Кампазытар	Уладзімер Кур’ян
Харэограф	Людміла Фадзеева
Акторы	Гл. сьпіс
Працягласьць	80 хв.
Краіна	Беларусь
Мова	беларуская
Год прэм’еры	6 кастрычніка 2007
Пастаноўкі	Гарадзенскі абласны драматычны тэатар

«Прымакі» — спэктакль, пастаўлены ў 2007 годзе рэжысэрам Аляксандрам Гарцуевым у Гарадзенскім абласным драматычным тэатры і прымеркаваны да 125-годзьдзя з дня нараджэньня Янкі Купалы.

Гісторыя

Першая пастаноўка «Прымакоў» у Гарадзенскім абласным тэатры адбылася напярэдадні 90-годзьдзя Янкі Купалы ў 1972 годзе.

Сюжэт

Даміцэля, прачуўшыся раніцай, знаходзіць у сваім ложку не мужа, а свайго кума Максіма. А ў гэты час яе муж Трахім салодка сьпіць у чужое хаце са сваёй кумой Паланеяй. Гісторыя ўскладняецца тым, што дзеці згубіўшыхся ў начных прыгодах сваякоў кахаюць адзін аднаго і хочуць ажаніцца. Ці ня стане бурны сямейны канфлікт перашкодай іх шчасьцю? Рэжысэр вырашае спэктакль у жанры вадэвілю зь яскравымі народнымі песьнямі і танцамі. Яркая, амаль што лубочная сцэнаграфія ў спалучэньні з народнай вопраткай надаюць спэктаклю яркасьць і відовішчнасьць.

Творчая задума

	Трэба паглядзець на старонкі Купалы, калі чалавек удумлівы, то за камічнай формай … адчуе вялікі боль за наш народ, за нашу Радзіму, таму што Купала не быў дурным пустым чалавекам, ён не мог проста так пісаць гэтую камэдыю. Праз камэдыю праглядаліся сьлёзы. І спачуваньні да свайго народа. Так я разумею гэтую п’есу, лічу, што зрабіў у гэтым тэатры дыптых «Раскіданае гняздо» і «Прымакі». Гэта розныя па жанры спэктаклі, як падасца на першы погляд, адзін — камэдыя, а другі — трагэдыя. Але ў гэтым спалучэньні і ёсьць сэнс нашага жыцьця — ад камэдыі да трагэдыі адзін крок. Сьлёзы і сьмех стаяць побач. Вось так мы жывем. … [гэтая п’еса] пра нас. Тут можа ў трошкі перабольшанай форме, але гэта не пра п’янку, не пра бойкі, а пра ўзаемаадносіны людзей, як людзі іншым разам і любяць адзін аднаго і ненавідзяць адначасова. Вось гэтае спалучэньне, яно такое дзікаватае трохі, і хочацца, як Купала казаў, да зор, да неба, ну, мабыць, так некалі і будзе.
— Рэжысэр Алякандар Гарцуеў аб творы Купалы

Акторы

• Сяргей Курыленка
• Аляксандар Шоўкаплясаў
• Сьвятлана Завадзкая
• Ала Лук’янава
• Аляксандар Калагрыў
• Аксана Машынкова
• Уладзімер Капранаў
• Аляксандар Глотаў і інш.

Вонкавыя спасылкі

• Старонка спэктаклю з фотагалерэяй на сайце Гарадзенскага абласнога драматычнага тэатру
• Купала-рэп на сайце «Наша Ніва»