Бірштаны

Бірштаны
лет. Birštonas
Герб Бірштанаў
Першыя згадкі:	1382
Горад з:	1529
Краіна:	Летува
Павет:	Ковенскі
Плошча:	13 км²
Насельніцтва (2017)
колькасьць:	2422 чал.
шчыльнасьць:	186,31 чал./км²
Часавы пас:	UTC+2
летні час:	UTC+3
Паштовы індэкс:	LT-59009
Геаграфічныя каардынаты:	54°36′20″ пн. ш. 24°1′45″ у. д.
Бірштаны на мапе Летувы Бірштаны
Галерэя здымкаў у Вікісховішчы
http://www.birstonas.lt/

Біршта́ны (па-летувіску: Birštonas) — горад у паўднёвай Летуве, на правым беразе ракі Нёману. Зьяўляецца адміністрацыйным цэнтрам Бірштанскага гарадзкога раёну Ковенскага павету. Насельніцтва налічвае каля 4 тыс. чалавек. Бірштаны знаходзяцца за 39 км на поўдзень ад Коўна.

Вакол гораду шмат сасновых лясоў, тут пабудаваны некалькі санаторыяў. У паўднёвай частцы гораду, каля Нёмана, ёсьць парк Вітаўта й Бірштанскі курган (або гара Вітаўта) вышынёй у 85 мэтраў. На левым беразе Нёмана ўсталяваны шлях памяці аб ахвярах сталінізму. Мясцовая мінэральная вада ўтрымлівае між іншым і магній.

Гісторыя

Першыя згадкі аб Бірштанах адносяцца да 1382 году, калі тут заснавалі паселішча крыжакі, а ў 1529 годзе паселішча атрымала гарадзкія правы і герб. Пасьля 1410 году паселішча ўвайшло ў склад Вялікага Княства Літоўскага. Тут часта спыняліся вялікія князі літоўскія пад час каралеўскіх паляваньняў у мясцовых лясах.

Пасьля падзелаў Рэчы Паспалітай горад апынуўся ў Расейскай імпэрыі. У 1846 годзе тут былі адкрытыя крыніцы мінэральнай вады, з гэтага часу паселішча атрымала значнае разьвіцьцё як курортны цэнтар. Да першай сусьветнай вайны тут штогод лекавалася каля 2000 чалавек, працавалі 72 ванны, былі пабудаваныя 3 гатэлі з 200 нумароў.

Пасьля Першай сусьветнай вайны горад трапіў у склад Летувы, зрабіўшыся самым значным курортам Летувы, але пасьля Другой сусьветнай вайны ён саступіў гэты статус Друскенікам.

У 1966 годзе Бірштаны пераўтвораны з пасёлку гарадзкога тыпу ў горад.

Фэстывалі

У горадзе праводзяцца шматлікія фэстывалі. Адзін зь іх — гэта фэстываль джазу, акі праводзіцца кожныя два гады ў канцы сакавіка. Гэты фэстываль прываблівае тысячы аматараў джазу, ня толькі зь Летувы, а і зь іншых краінаў. Бірштанскі фэстываль джазу праводзіцца ўжо на працягу апошніх дваццаці гадоў.

Турызм

Бірштаны вядомыя сваімі крыніцамі мінэральнай вады, вакол якіх пабудаваныя санаторыі. Мінэральная вада выкарыстоўваецца для лячэбных працэдураў (мінэральных басэйнаў) і г. д. У навакольлі гораду існуюць два самыя вядомыя санаторыі: Бірштаны — Тулпы і Вэрсмэ Бос, якія прапаноўваюць агульную тэрапію, водную тэрапію, мінэральныя басэйны і масаж, а таксама шмат іншых лячэбных працэдураў.

У сучасных Бірштанах шмат невялікіх гатэляў, а ў навакольлях гораду існуюць сельскія домікі для адпачынку. Недалёка ад гораду ёсьць Вітаўтаў холм, дзе праводзіліся паляваньня вялікіх князёў літоўскіх. Сучасныя Бірштаны — гэта буйны летувіскі курорт.