Хвойнікі
Хойнікі | |||||
| |||||
Першыя згадкі: | 1512 | ||||
Горад з: | 1967 | ||||
Вобласьць: | Гомельская | ||||
Раён: | Хойніцкі | ||||
Насельніцтва: | 13 200 (2008) | ||||
Часавы пас: | UTC+3 | ||||
Тэлефонны код: | +375 2346 | ||||
Паштовы індэкс: | 247600 | ||||
Аўтамабільны код: | 3 | ||||
Геаграфічныя каардынаты: | 51°54′ пн. ш. 29°58′ у. д. / 51.9° пн. ш. 29.967° у. д.Каардынаты: 51°54′ пн. ш. 29°58′ у. д. / 51.9° пн. ш. 29.967° у. д. | ||||
Хойнікі на мапе Беларусі Хойнікі | |||||
Галерэя здымкаў у Wikimedia Commons |
Хо́йнікі — места ў Беларусі, на рацэ Квеся. Адміністрацыйны цэнтар Хойніцкага раёна Гомельскай вобласьці. Насельніцтва 13,2 тыс. чал. (2008). Знаходзяцца за 103 км на поўдзень ад Гомелю, чыгуначная станцыя на лініі Калінкавічы — Гомель. Аўтамабільныя дарогі на Рэчыцу, Калінкавічы, Брагін.
Назва
Некаторыя дасьледнікі сьцьвярджаюць, што тапонім «Хойнікі» ўтварыўся ад паняцьцяў «хвоя», «хваёвыя лясы»[1]. Але існуе і іншае меркаваньне: у апісаньні межаў Брагінскага графства ў адным месцы паселішча значыцца як Хвайнічок, у іншым — як Хойнічак. Энцыкляпэдычны слоўнік Бракгаўза і Эфрона, выдадзены ў 1903, сьцьвярджае: «Хойнік — старажытнагрэцкая мера сыпучых целаў, што згадваецца ўжо ў Гамэра, які X. вызначае колькасьць збожжа, патрэбнага для пракармленьня аднаму чалавеку на дзень...»[2].
Гісторыя
Першы пісьмовы ўспамін пра Хойнікі (пад назвай Хвойнічкі[3]) як вёску Брагінскага графства Кіеўскага ваяводзтва датуецца 1512. Адпаведная вытрымка з апісаньня межаў Брагінскага графства:
Хойнічак разьмешчаны на захадзе графства зь вёскамі Лісьцьвін, Драгічын, Кажушкі і складае заходнюю мяжу графства. 3 трох бакоў Хвайнічок абкружалі балоты, далей працягваліся вялізныя масівы пераважна хваёвых лясоў. | ||
У розныя часы мясьціна знаходзілася ў валоданьні Вішнявецкіх, Шуйскіх, Прозараў.
У сяр. XVI ст. Хойнікі атрымалі статус мястэчка і ўвайшлі ў склад Рэчыцкага павету Менскага ваяводзтва[2]. У гэты час на ўзьбярэжжы ракі Квеся князі Вішнявецкія збудавалі драўляны замак для абароны паселішча ад нападаў з усходу (праіснаваў да кан. XVIІІ ст.). У сяр. XVII ст. мястэчка зрабілася цэнтрам воласьці, тут праходзіў гандлёвы шлях Мазыр — Юравічы — Брагін — Любеч.
У 1705 на сродкі князя Шуйскага ў Хойніках збудавалі царкву. Паводле інтэнтару ад 20 сакавіка 1721 тутэйшы замак меў 2-павярховую ўязную браму, зрубленую з брусоў і накрытую дранкай, 1-ы паверх вежы займалі ўязны праезд з варотамі і вязьніца, 2-і — невялікая заля з шклянымі вокнамі на драўляных рамах. На ўзроўні 2-га паверху месьціўся балькон. У 1763 замест састарэлага ў мястэчку ўзьвялі новы будынак царквы. У кан. XVIII ст. І. Прозар збудаваў тут палац[4].
У выніку другога падзелу Рэчы Паспалітай (1793) Хойнікі апынуліся ў складзе Расейскай імпэрыі, дзе зрабіліся цэнтрам воласьці Рэчыцкага павету Менскай губэрні. Станам на 1839 тут было 89 двароў, з 1844 праводзіўся кірмаш. На 1849 — 74 двары, дзейнічалі царква, каталіцкая капліца, 3 сынагогі; паштовая станцыя на тракце Мазыр — Брагін — Любеч, 26 крамаў, 2 піцейныя дамы, конны млын. Побач, у вёсцы Валокі, былі бровар і вятрак. У 1864 у мястэчку 89 двароў, у 1868 — 240 двароў. Станам на 1886 у Хойніках было 74 двары, царква, капліца, 3 сынагогі, паштовая станцыя, млын, 2 заезныя двары, на 1890 — мяшчанская ўправа, валасная ўправа, паштова-тэлеграфная кантора, лекарскі ўчастак, народная вучэльня (з 1863).
1 студзеня 1919 згодна з пастановай І зьезду КП(б) Беларусі Хойнікі ўвайшлі ў склад Беларускай ССР, аднак 16 студзеня Масква адабрала мястэчка разам зь іншымі этнічна беларускімі тэрыторыямі ў склад РСФСР. У сьнежні 1926 Хойнікі вярнулі БССР, у Гомельскай акрузе (з 1954 у Гомельскай вобласьці.). 29 верасьня 1938 паселішча атрымала афіцыйны статус пасёлку гарадзкога тыпу. У Другую сусьветную вайну з 25 жніўня 1941 да 23 лістапада 1943 мястэчка знаходзіліся пад нямецкай акупацыяй. 10 кастрычніка 1967 Хойнікі атрымалі статус места.
Насельніцтва
- XIX стагодзьдзе: 1849 — 580 чал., зь іх мяшчанаў 1-га разраду — 4, 2-га — 13, 3-га — 63; 1886 — 580 чал.; 1897 — 2685 чал.
- XX стагодзьдзе: 1906 — 2685 чал. (1250 муж. і 1435 жан.), зь іх 717 каталікоў, 299 праваслаўных, 1668 юдэяў[2]; 1909 — 2891 чал. (338 радзінаў); 1939 — 3,4 тыс. чал.; 1970 — 9,5 тыс. чал.; 1991 — 15 тыс. чал.[5]
- XXI стагодзьдзе: 2004 — 14,2 тыс. чал.; 2005 — 13,9 тыс. чал.; 2006 — 13,5 тыс. чал.; 2008 — 13,2 тыс. чал.; 1 студзеня 2009 — 13,1 тыс. чал.
Адукацыя
У Хойніках працуюць ПТВ, 4 сярэднія, спартовая і музычная школы.
Культура
Дзейнічаюць 2 дамы культуры, цэнтар творчасьці, дом рамёстваў, 4 бібліятэкі, краязнаўчы музэй.
Забудова
Забудова Хойнікаў злучылася з блізкімі мястэчкамі і вёскамі, у выніку чаго склаліся раёны Старыя Хойнікі, Новыя Хойнікі і паўночна-заходні. Паводле генэральнага пляну ўзводзіліся 2—5-павярховыя будынкі. Шматпавярховы мікрараён Юбілейны збудаваны ў Новых Хойніках. У зьвязку з чарнобыльскай аварыяй новая будова ў месьце не вядзецца.
Эканоміка
Аўтабудаўнічы завод, завод ЖБВ, кансэрвавы завод, тарфяны завод, філія Гомельскага «Гідрапрываду», фабрыка мастацкіх вырабаў, сыраробчы камбінат.
Турыстычная інфармацыя
Хойнікі — цэнтар традыцыйнага мастацкага рамяства (ткацтва, вышыўка і інш.)[6]. Дзейнічае Хойніцкі краязнаўчы музэй. Спыніцца можна ў гасьцініцы «Хойнікі». У месьце пастаўлены помнік Смутку да 10-й гадавіны катастрофы на Чарнобыльскай АЭС.
Выдатныя мясьціны
- Гістарычная забудова (кан. ХІХ — пач. ХХ стст.; фрагмэнты)
- Сядзібна-паркавы комплекс Аўраамавых (XIX ст.)
У наш час у Хойніках збудавалі новыя касьцёл Унебаўзяцьця Найсьвяцейшай Панны Марыі і царкву Покрыва Прасьвятой Багародзіцы.
Страчаная спадчына
- Касьцёл Найсьвяцейшай Панны Марыі (1863)
- Сядзіба Прозараў (XVIII ст.)
- Царква Покрыва Прасьвятой Багародзіцы (XVIII ст.)
Вядомыя асобы
- Рыгор Арцюшэнка (1927—2004) — дзяяч беларускай эміграцыі ў ЗША
- Віктар Ганчарэнка (нар. 1977) — беларускі футбаліст, трэнэр
- Караль Прозар (1759—1841) — дзяржаўны і вайсковы дзяяч Вялікага Княства Літоўскага
Крыніцы
- ^ Краткий топонимический словарь Белоруссии / В.А. Жучкевич. — Мн.: Изд-во БГУ, 1974. — 448 с. С. 393.
- ^ а б в Памяць: Гіст.-дакум. хроніка Хойніцкага р-на. — Мн.: БелЭн, 1993. — 383 с. ISBN 5-85700-092-0.
- ^ Хойнікі // Нашы гарады: грамадска-палітычнае даведачнае выданне / У. А. Малішэўскі, П. М. Пабока. — Мн.: Народная асвета, 1991.
- ^ Хвойнікі // ВКЛ. Энцыкл. — Мн.: 2005 Т. 2. С. 715.
- ^ Хойники // Большой энциклопедический словарь / Гл. ред. В. П. Шишков. — М.: НИ «Большая Российская энциклопедия», 1998. — 640 с.: ил. ISBN 5-85270-262-5.
- ^ Хойники // Туристская энциклопедия Беларуси. — Мн., 2007.
Літаратура
- Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — 788 с. — ISBN 985-11-0378-0
- Памяць: Гіст.-дакум. хроніка Хойніцкага р-на. — Мн.: БелЭн, 1993. — 383 с. ISBN 5-85700-092-0.
- Энцыклапедыя гісторыі Беларусі. У 6 т. / Беларус. Энцыкл.; Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн.: БелЭн, 2003. — Т. 6. Кн. 2: Усвея — Яшын. — 616 с. — ISBN 985-11-0276-8
- Chojniki // Słownik geograficzny Królestwa Polskiego i innych krajów słowiańskich. Tom I: Aa — Dereneczna. — Warszawa, 1880. S. 620.
Вонкавыя спасылкі
Хвойнікі — сховішча мультымэдыйных матэрыялаў
|