Солы
Солы | |
Вобласьць: | Гарадзенская |
Раён: | Смаргонскі |
Сельсавет: | Сольскі |
Насельніцтва: | 1475 (2004) |
Тэлефонны код: | +375 1592 |
Паштовы індэкс: | 231033 |
Геаграфічныя каардынаты: | 54°30′34.46″ пн. ш. 26°11′30.40″ у. д. / 54.5095722° пн. ш. 26.1917778° у. д.Каардынаты: 54°30′34.46″ пн. ш. 26°11′30.40″ у. д. / 54.5095722° пн. ш. 26.1917778° у. д. |
Солы на мапе Беларусі Солы | |
Галерэя здымкаў у Wikimedia Commons |
Со́лы — вёска ў Беларусі, на рацэ Ашмянка. Цэнтар сельсавету Смаргонскага раёну Гарадзенскай вобласьці. Насельніцтва 1475 чал. (2004). Знаходзяцца за 15 км на захад ад Смаргоні, за 252 км ад Горадні. Чыгуначная станцыя на лініі Маладэчна — Вільня.
Солы — даўняе мястэчка гістарычнай Ашмяншчыны (частка Віленшчыны).
Гісторыя
Упершыню Солы згадваюцца ў XVI ст. як сяло Віленскага ваяводзтва. Мясьціна знаходзілася ў шляхецкай уласнасьці.
У выніку трэцяга падзелу Рэчы Паспалітай (1795) Солы апынуліся ў складзе Расейскай імпэрыі, дзе зрабіліся цэнтрам воласьці Ашмянскага павету Віленскай губэрні. У 1849 у мястэчку збудавалі касьцёл, з 1870 працавала народная вучэльня. Станам на 1886 у Солах існавалі валасная ўправа, касьцёл, сынагога, 5 крамаў, карчма, вінакурны завод (за 4 км ад мястэчка), на 1890 — пошта, тэлеграф, станцыя Лібава-Роменскай чыгункі (адкрылася ў 1873). У пач. XX ст. ў мястэчку працаваў лекарскі ўчастак.
У канцы 1917 у Солах адбылася падзея, якая прапісала паселішча ў эўрапейскай гісторыі на шматлікія стагодзьдзі наперад: 4 сьнежня прадстаўнікі 2-й, 3-й і 10-й арміяў на чале з шараговым Салігаліцкага палка 81-й пяхотнай дывізіі бальшавіком Шчукіным падпісалі замірэньне зь немцамі. Баявыя дзеяньні на працягу ўсяго фронту ад Відзаў да Прыпяці спыняліся з 5 сьнежня на два месяцы. Праз 10 дзён — 15 сьнежня — замірэньне падпісалі ўжо ў Берасьці, надаўшы дамове шырэйшы статус.
Згодна з Рыскай мірнай дамовай (1921) Солы апынуліся ў складзе міжваеннай Польскай Рэспублікі, дзе зрабіліся цэнтрам гміны Ашмянскага павету Віленскага ваяводзтва. Цягам 1926—1934 у мястэчку вялася будова касьцёла Маці Божай Ружанцовай. Ахвяраваньні на яе склалі паўмільёна злотых, велізарную для таго часу суму.
У 1939 Солы ўвайшлі ў БССР, дзе 12 кастрычніка 1940 зрабіліся цэнтрам сельсавету Смаргонскага раёну. Статус паселішча панізілі да вёскі. На 2000 тут быў 1271 двор.
-
Даўні касьцёл
-
Касьцёл
-
Рынак
-
Станцыя
Насельніцтва
- XIX стагодзьдзе: 1882 — 421 чал.[1]; 1886 — 560 чал.
- XX стагодзьдзе: 1901 — каля 880 чал. у мястэчку Солы і 70 чал. на станцыі Солы; 2000 — 2899 чал.[2]
- XXI стагодзьдзе: 2004 — 1475 чал.[3]
Турыстычная інфармацыя
Выдатныя мясьціны
- Капліца могілкавая
- Касьцёл Маці Божай Ружанцовай (1926—1934)
- Могілкі габрэйскія
- Сядзіба (XVIII—XIX стст.)
Страчаная спадчына
- Касьцёл Маці Божай Ружанцовай (XIX ст.)
- Сынагога (XIX ст.)
Крыніцы
- ^ Soły // Słownik geograficzny Królestwa Polskiego i innych krajów słowiańskich. Tom XI: Sochaczew — Szlubowska Wola. — Warszawa, 1890. S. 70.
- ^ Ганна Дулеба. Солы // ЭГБ. — Мн.: 2001 Т. 6. Кн. 1. С. 387.
- ^ Памяць: Гіст.-дакум. хроніка Смаргонскага р-на. — Мн.: БелЭн, 2004.
Літаратура
- Памяць: Гіст.-дакум. хроніка Смаргонскага р-на. — Мн.: БелЭн, 2004. — 640 с. ISBN 985-11-0296-2.
- Энцыклапедыя гісторыі Беларусі. У 6 т. / Беларус. Энцыкл.; Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн.: БелЭн, 2001. — Т. 6. Кн. 1: Пузыны — Усая. — 591 с. — ISBN 985-11-0214-8
- Soły // Słownik geograficzny Królestwa Polskiego i innych krajów słowiańskich. Tom XI: Sochaczew — Szlubowska Wola. — Warszawa, 1890. S. 70.
Вонкавыя спасылкі
Солы — сховішча мультымэдыйных матэрыялаў
|