Янаў
- Гэтая назва мае некалькі сэнсаў. Калі вас цікавяць іншыя сэнсы, глядзіце таксама Іванава, Янава, Янаў (неадназначнасьць), Янова (неадназначнасьць).
Янаў | |||||
У цэнтры места | |||||
| |||||
Першыя згадкі: | XVII ст. | ||||
Горад з: | 1971 | ||||
Вобласьць: | Берасьцейская | ||||
Раён: | Іванаўскі | ||||
Насельніцтва: | 16 086[1] (2009) | ||||
Часавы пас: | UTC+3 | ||||
Тэлефонны код: | +375 1652 | ||||
Паштовы індэкс: | 225791 (91,92) | ||||
Геаграфічныя каардынаты: | 52° пн. ш. 25° у. д. / 52° пн. ш. 25° у. д.Каардынаты: 52° пн. ш. 25° у. д. / 52° пн. ш. 25° у. д. | ||||
Янаў на мапе Беларусі Янаў | |||||
Галерэя здымкаў у Wikimedia Commons |
Я́наў (з 1940 году — Іва́нава) — места ў Беларусі, на рацэ Самараўка. Адміністрацыйны цэнтар Іванаўскага раёну Берасьцейскай вобласьці. Насельніцтва 16 086[1] чал. (2009). Знаходзіцца за 132 км ад Берасьця. Чыгуначная станцыя Янаў-Палескі на лініі Берасьце — Пінск.
Назва
Тапонім «Янаў» утварыўся ад імя Ян. Іншая мясцовая назва места — Яно́ва[2].
Цяперашняе афіцыйнае найменьне «Іванава» — вынік маскалізацыі часоў Расейскай імпэрыі і СССР, калі традыцыйнае гістарычнае імя паселішча зьмянілі дзеля сугучнасьці з абласным цэнтрам Іванава ў цэнтральнай Расеі[3].
У ранейшыя часы, каб пазьбегнуць блытаніны з аднайменным мястэчкам на Падляшшы, меў назву Янаў-Палескі
Гісторыя
У некаторых выданьнях[4] можна сустрэць памылковае атаясамленьне пачатку гісторыі палескага Янава зь вёскай Порхаў, уладаньнем біскупаў луцкіх. Насамрэч Порхавым звалася колішняе мястэчка, а цяпер вёска Янаў-Падляскі ў Бельскім павеце Люблінскага ваяводзтва Польшчы[5]. Найбольш раньнія згадкі пра Янаў-Палескі датуюцца XVII стагодзьдзем[6].
У XVII ст. Янаў меў статус мястэчка ў Пінскім павеце Берасьцейскага ваяводзтва. У Трынаццацігадовую вайну 16 траўня 1657 паселішча захапілі казакі, якія па працяглых катаваньнях забілі тут каталіцкага місіянэра Андрэя Баболю. У 1678 Я. К. Копаць заснаваў у мястэчку езуіцкую місію, якая належала да Пінскага калегіюму. У 1694 Янаў перайшоў у валоданьне Ганны, дачкі Я. К. Копаця і жонкі князя Канстантына Яна Шуйскага, пазьней мястэчкам валодаў яе сын А. А. Шуйскі і ўнук Я. Н. Шуйскі[6].
У выніку трэцяга падзелу Рэчы Паспалітай (1795) Янаў апынуўся ў складзе Расейскай імпэрыі, дзе ўвайшоў у Кобрынскі павет Гарадзенскай губэрні. Цягам XIX ст. мясьціна знаходзілася ў валоданьні Арэшкаў.
У 1861 расейскія ўлады раскватаравалі ў Янаве казакоў 31-га Данскога палка дзеля здушэньня сялянскіх хваляваньняў у мястэчку і ваколіцах. У 1884 за 1 км ад Янава прайшла Палеская чыгунка, адкрылася невялікая станцыя (цяпер Янаў-Палескі) з драўляным вакзалам, складзкімі памяшканьнямі, рамонтнымі майстэрнямі. Станам на 1869 у Янаве існавалі драўляная праваслаўная царква, мураваны рымска-каталіцкі касьцёл, капліца у гонар Свь. Андрэя Баболі, станавая кватэра, валасная ўправа, аптэка. Паводле вынікаў перапісу (1897) у мястэчку было 724 будынкі, працавалі народная вучэльня і царкоўнапрыходзкая школа, сукнавальная фабрыка, гарбарны і цагельны заводы, маслабойня, 4 млыны.
Згодна з Рыскай мірнай дамовай (1921) Янаў апынуўся ў складзе міжваеннай Польскай Рэспублікі, у Пінскім павеце Палескага ваяводзтва. Станам на 1935 тут знаходзіліся гміннае кіраваньне, паштова-тэлеграфнае кіраваньне, паліцэйскі пастарунак, некалькі прыватных гатэляў, лесапільня «Горбур», паравы млын «Горбур»; дзейнічала польская школа.
У 1939 Янаў увайшоў у БССР, бальшавікі зьмянілі гістарычную назву паселішча на расейскі лад на Іванава. На 1940 тут працавалі лякарня (на 50 ложкаў), радзільны дом (на 20 месцаў), паліклініка з 4 кабінэтамі, пошта, 20 тэлефонаў, 3 тэлеграфныя апараты; дзейнічалі 7-гадовая беларуская, расейская і габрэйская школы. 15 студзеня 1940 Янаў атрымаў афіцыйны статус гарадзкога пасёлку і зрабіўся цэнтрам раёну. У Другую сусьветную вайну з 27 чэрвеня 1941 да 16 ліпеня 1944 мястэчка знаходзілася пад нямецкай акупацыяй.
У 1971 Янаў атрымаў статус места. У 1998 адбылося ўрачыстае адкрыцьцё помніка мастаку і кампазытару Напалеону Ордзе, ураджэнцу в. Варацэвічы. 11 сакавіка 2011 адбылося афіцыйнае зацьверджаньне мескіх сьцяга і гербу[7].
-
Капліца Сьв. Андрэя Баболі
-
Алтар з рэліквіямі Сьв. Андрэя Баболі
-
Царква
-
Вуліца мястэчка, праваруч сынагога
Насельніцтва
- XIX стагодзьдзе: 1830 — 516 муж., зь іх шляхты 10, духоўнага стану 1, мяшчанаў-юдэяў 243, мяшчанаў-хрысьціянаў і сялянаў 262[8]; 1866 — 809 чал.; 1885 — 2437 чал.; 1897 — 3041 чал.[9]
- XX стагодзьдзе: 1905 — 2939 чал.; 1924 — 3068 чал., зь іх 521 беларус, 289 палякаў, 190 расейцаў, 1859 габрэяў; 1935 — 3500 чал.; 1940 — 4918 чал.; 1946 — 2279 чал.; 1956 — 3 тыс. чал.[10]; 1971 — 7,1 тыс. чал.; 1991 — 14,6 тыс. чал.[11]; 1994 — 15,6 тыс. чал.[12]
- XXI стагодзьдзе: 2006 — 16,4 тыс. чал.; 2009 — 16 086[1] чал.
Адукацыя
У Янаве працуюць гімназія, 3 сярэднія, музычная, дзіцяча-юнацкая спартовая школы, 6 дашкольных установаў.
Мэдыцына
Мэдычныя паслугі надае меская паліклініка.
Культура
Дзейнічаюць 3 бібліятэкі, дом творчасьці дзяцей і юнацтва.
Эканоміка
Прадпрыемствы харчовай, будаўнічых матэрыялаў, дрэваапрацоўчай прамысловасьці.
Пералік прамысловых прадпрыемстваў Янава |
---|
|
Турыстычная інфармацыя
Празь места праходзіць турыстычны маршрут «Россып талентаў палескіх». Працуе Янаўскі музэй гісторыі ўтварэньня раёну. Спыніцца можна ў гатэлі «Пад ліпамі».
Выдатныя мясьціны
- Касьцёл Узвышэньня Сьвятога Крыжа (1848)
- Помнік ураджэнцу ваколіцаў Янава беларускаму і польскаму мастаку і кампазытару Напалеону Орду (1807—1883)
- Царква Покрыва Прасьвятой Багародзіцы (1901)
Страчаная спадчына
- Капліца Сьвятога Андрэя Баболі
- Касьцёл Узвышэньня Сьвятога Крыжа (XVIII ст.)
Галерэя
-
Касьцёл Узвышэньня Сьв. Крыжа
-
Царква Покрыва Прасьв. Багародзіцы
-
Помнік Напалеону Орду
-
Помнік Леніну
Крыніцы
- ^ а б в Перепись населения — 2009. Брестская область (рас.) Нацыянальны статыстычны камітэт Рэспублікі Беларусь
- ^ Сяргей Харэўскі. Радзіма першага прэзыдэнта // «Наша Ніва», 6 ліпеня 2006.
- ^ Вольга Іскрык, Зьміцер Саўка. (16.01.2011) Сапраўдныя назвы беларускіх гарадоў. Белсат ТВ. Праверана 9 чэрвеня 2011 г.
- ^ Иваново // Туристская энциклопедия Беларуси. — Мн., 2007.
- ^ Валерый Пазднякоў. Янаў // ВКЛ. Энцыкл. — Мн.: 2005 Т. 2. С. 781.
- ^ а б Валерый Пазднякоў. Янаў // ВКЛ. Энцыкл. — Мн.: 2005 Т. 2. С. 782.
- ^ «Об учреждении официальных геральдических символов административно-территориальных и территориальных единиц Брестской области». Указ Президента Республики Беларусь от 11.03.2011 г. № 101 (рас.)
- ^ Соркіна І. Мястэчкі Беларусі... — Вільня, 2010. С. 413.
- ^ История на Ивановский районный исполнительный комитет
- ^ Іванава // Нашы гарады: грамадска-палітычнае даведачнае выданне / У. А. Малішэўскі, П. М. Пабока. — Мн.: Народная асвета, 1991.
- ^ Иваново // Большой энциклопедический словарь / Гл. ред. В. П. Шишков. — М.: НИ «Большая Российская энциклопедия», 1998. — 640 с.: ил. ISBN 5-85270-262-5.
- ^ Іванава // ЭГБ. — Мн.: 1996 Т. 3. С. 464.
Літаратура
- Энцыклапедыя гісторыі Беларусі. У 6 т. / Беларус. Энцыкл.; Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн.: БелЭн, 1996. — Т. 3: Гімназіі — Кадэнцыя. — 527 с. — ISBN 985-11-0041-2
- Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — 788 с. — ISBN 985-11-0378-0
- Соркіна І. Мястэчкі Беларусі ў канцы ХVІІІ — першай палове ХІХ ст. — Вільня: ЕГУ, 2010. — 488 с. ISBN 978-9955-773-33-7.
- Сяргей Харэўскі. Радзіма першага прэзыдэнта // «Наша Ніва», 6 ліпеня 2006.
- Janów (2) // Słownik geograficzny Królestwa Polskiego i innych krajów słowiańskich. Tom III: Haag — Kępy. — Warszawa, 1882. S. 422.
Вонкавыя спасылкі
Янаў — сховішча мультымэдыйных матэрыялаў
- м. Янаў на Radzima.org
- Іванава (Палескае) — парафія Узвышэння Святога Крыжа на Catholic.by
- Сайт Іванаўскага выканкаму (рас.)
- Вандроўка ў Янаў (рас.)
|