Ваяводзтва

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку
Ваяводзтвы Польшчы ад 1999 году

Ваяводзтва — адміністрацыйна-тэрытарыяльная адзінка ў шэрагу эўрапейскіх краінаў. Ваяводзтвы існуюць ад сярэднявечных часоў у Вялікім Княстве Літоўскім, Польшчы, Румыніі, Вугоршчыне, Расеі і Сэрбіі. Кіраўніком ваяводзтва зьяўляецца ваявода. Адміністрацыйны ўзровень тэрыторыі ваяводзтва адпавядае княству ў заходніх сярэднявечных дзяржавах, гэтаксама як і пасада ваяводы адпавядае пасадзе князя.

У цяперашні час звычайна абазначае адну з адміністрацыйна-тэрытарыяльных адзінак Польшчы, якая падзяляецца на 16 ваяводзтваў.

Паходжаньне назвы[рэдагаваць | рэдагаваць крыніцу]

Ваявода (літаральна «лідар жаўнераў» або «вайсковы лідар», адпаведнік лацінскага «Dux Exercituum» і нямецкага «герцага») першапачаткова зьяўляўся вайсковым кіраўніком, які ў дзяржаўнай структуры знаходзіўся побач з кіраўніком дзяржавы. Пазьней слова пачало абазначаць кіраўніка адміністрацыйнай адзінкі.

Слова «ваяводзтва» ў розных мовах выглядае наступным чынам: па-польску: województwo; па-румынску: voievodat; па-сэрбску: vojvodina ( војводина), vojvodstvo ( војводство) або vojvodovina ( војводовина); па-вугорску: vajdaság; па-летувіску: vaivadija.

Ад слова «ваяводзтва» ўтвораная назва сэрбскай Аўтаномнай вобласьці Ваяводзіна.