Веніямін (Тупека)

Мітрапаліт Веніямін
39-ы Патрыяршы экзарх усяе Беларусі, мітрапаліт Менскі і Заслаўскі
25 жніўня 2020 —
Царква	Расейская праваслаўная царква
Папярэднік	Павал (Панамароў)
1-ы Япіскап Барысаўскі і Мар’інагорскі
23 кастрычніка 2014 —
Царква	Расейская праваслаўная царква, Беларускі экзархат
2-і Япіскап Барысаўскі, вікары Менскай япархіі
21 сакавіка 2010 — 23 кастрычніка 2014
Царква	Расейская праваслаўная царква, Беларускі экзархат
Адукацыя	кандыдат багаслоўя
Дзейнасьць	мітрапаліт, тэоляг
Сапраўднае імя	Віталь Тупека
Нарадзіўся	16 верасьня 1968(1968-09-16) (55 гадоў) Лунінец, Берасьцейская вобласьць, БССР, СССР
Прыняцьце сьвятога сану	9 студзеня 1995
Прыцяцьце манаства	16 сьнежня 1994
Япіскапская хіратонія	21 сакавіка 2010
Узнагароды
Галерэя здымкаў у Вікісховішчы

Мітрапаліт Веніямі́н (у сьвеце Віта́ль Іва́навіч Тупе́ка; нар. 16 верасьня 1968, Лунінец, Берасьцейская вобласьць) — мітрапаліт Расейскай праваслаўнай царквы, старшыня Беларускага экзархату. Мітрапаліт Менскі і Заслаўскі.

Жыцьцяпіс

Нарадзіўся 16 верасьня 1968 року ў месьце Лунінцы Берасьцейскай вобласьці. Скончыўшы лунінецкую сярэднюю школу №1 (1985), паступіў у Беларускі дзяржаўны ўнівэрсытэт на факультэт радыёфізыкі і электронікі.

У 1987—1989 роках праходзіў вайсковую службу ў шэрагах Узброеных Сілаў. Пасьля працягнуў навучаньне ў вну. У чэрвені 1992 року атрымаў дыплём па спэцыяльнасьці «Радыёфізыка і электроніка».

У жніўні 1992 року паступіў на першы курс Менскай духоўнай сэмінарыі. Па сканчэньні трэцяга курсу падаў просьбу і быў прыняты ў лік брацтва Сьвята-Ўсьпенскага Жыровіцкага стаўрапігіяльнага мужчынскага манастыру.

16 сьнежня 1994 року ў Сьвята-Ўсьпенскім саборы намесьнікам манастыра архімандрытам Гурыем (Апалькам) на дабраславеньне мітрапаліта Менскага і Слуцкага Філарэта, Патрыяршага экзарха ўсяе Беларусі, пастрыжаны ў манаства зь імем Веніямін у гонар сьвятамучаніка Веніяміна, мітрапаліта Петраградзкага і Гдоўскага.

9 студзеня 1995 року мітрапалітам Менскім і Слуцкім Філарэтам за Боскай літургіяй у Сьвята-Ўсьпенскім саборы Жыровіцкага манастыра хіратанаваны ў ерадыякана, а 13 лютага 1995 року — у ераманаха.

20 чэрвеня 1996 року пастаўлены на пасаду скарбніка манастыра.

У гэтым жа року па сканчэньні Менскай духоўнай сэмінарыі паступіў на першы курс Менскай духоўнай акадэміі і прызначаны на пасаду выкладчыка Менскай духоўнай сэмінарыі.

У 1999 року скончыў навучаньне ў духоўнай акадэміі з навуковай ступеньню «кандыдат багаслоўя».

14 сьнежня 1999 року ўзьведзены ў сан ігумена.

12 студзеня 2005 року прызначаны на пасаду дабрачыннага Жыровіцкага манастыра.

20 траўня 2006 року ўзьведзены ў сан архімандрыта.

У складзе дэлегацыі Менскай япархіі браў удзел у Памесным Саборы Расейскай Праваслаўнай Царквы 27—29 студзеня 2009 року.

1 ліпеня 2009 року вызвалены з пасады дабрачыннага Сьвята-Ўсьпенскага Жыровіцкага стаўрапігіяльнага мужчынскага манастыра і прызначаны на пасаду намесьніка Сьвята-Дабравешчанскага Лядзенскага мужчынскага манастыра.

Архіярэйства

21 сакавіка 2010 року хіратанаваны ў япіскапа Барысаўскага, вікарыя Менскай япархіі ў Маскоўскім катэдральным саборным Храме Хрыста Збавіцеля паводле пастановы Сьвятога Сыноду РПЦ ад 5 сакавіка 2010. Хіратанію ўзначаліў патрыярх Маскоўскі і ўсяе Русі Кірыл.

4 чэрвеня 2010 року пастановай Сыноду Беларускага Экзархату прызначаны старшынём Выдавецкае рады Беларускай Праваслаўнай Царквы. У чэрвені 2011 року скончыў двухгадовы курс павышэньня кваліфікацыі ў Агульнацаркоўнай асьпірантуры і дактарантуры.

23 кастрычніка 2014 року ў сувязі з утварэньнем Барысаўскай япархіі рашэньнем Сьвятога Сыноду прызначаным кіроўным архіярэем навастворанай япархіі з тытулам «Барысаўскі і Мар’інагорскі». Рашэньнем Сыноду БПЦ ад 3 чэрвеня 2015 року вызвалены з пасады старшыні Выдавецкае рады Беларускай Праваслаўнай Царквы ў сувязі з занятасьцю на агульнацаркоўных послухах.

25 жніўня 2020 году япіскапа Веніяміна абралі кіраўніком Беларускага экзархату. 6 верасьня 2020 году маскоўскі патрыярх Кірыла ўзьвёў беларускага экзарха Веніяміна ў сан мітрапаліта. Пры гэтым патрыярх Кірыла заявіў: «на чале Беларускай царквы павінен быць чалавек, які нарадзіўся ў Беларусі, які ведае беларускую мову, выхаваны ў беларускім асяродзьдзі, каб нават тыя, хто імкнецца ўбачыць у нашай Царкве нешта іншароднае ў адносінах да Беларусі, беларускай культуры, беларускага жыцьця, бачылі ў прадстаяцелі Беларускай царквы, на чале экзархату плоць ад плоці, косьць ад косьці свайго народу».

Вонкавыя спасылкі

• Веніямін (Тупека)  (рас.) // Адкрытая праваслаўная энцыкляпэдыя «Дрэва»
• Веніямін, япіскап Барысаўскі і Мар’інагорскі на афіцыйным партале Беларускай Праваслаўнай Царквы