Беларускае таварыства паляўнічых і рыбаловаў

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку
Беларускае таварыства паляўнічых і рыбаловаў
Абрэвіятура БТПР
Дата ўтварэньня 27 сьнежня 1921 (97 гадоў таму)
Юрыдычны статус грамадзкае аб’яднаньне
Мэта Задавальненьне патрэбаў сябраў у паляваньні і рыбалоўстве
Штаб-кватэра Менск, вул. Калініна, д. 16
Дзейнічае ў рэгіёнах Беларусь
Сяброўства 70 тысячаў чалавек (2013)[1]
Старшыня Юры Шумскі
Кіроўны орган Рада
Матчына кампанія Савет Міністраў Рэспублікі Беларусь
Сайт www.rgooboor.by
Колішняя назва Саюз паляўнічых Беларусі (да 18 ліпеня 1955 году)

Беларускае таварыства паляўнічых і рыбаловаў — грамадзкае аб’яднаньне Беларусі, заснаванае ў 1921 годзе[2]. З 17 ліпеня 2006 году падпарадкоўваецца ўраду[3]. Бярэ ўдзел у Міжнароднай канфэдэрацыі рыбалоўнага спорту[4]. На 6 красавіка 2010 году на долю таварыства прыпадала 60% ад агульнай плошчы паляўнічых угодзьдзяў[5]. На 10 лютага 2012 году мела 104 паляўнічыя гаспадаркі, дзе працавала каля 900 чалавек[6]. Зь лістапада 2011 году пасаду старшыні таварыства займае Юры Шумскі[7].

Задачы[рэдагаваць | рэдагаваць крыніцу]

Паводле Статуту задачамі таварыства ёсьць:

  • вядзеньне паляўнічай і рыбалоўнай гаспадарак;
  • ладжаньне гаспадарак у арандаваных паляўнічых і рыбалоўных угодзьдзях дзеля стварэньня сябрам таварыства ўмоваў для паляваньня і рыбалоўства;
  • навучаньне грамадзянаў правілам паляваньня і рыбалоўства;
  • спрыяньне ўраду ў ажыцьцяўленьні міжнародных прыродаахоўных пагадненьняў;
  • ладжаньне паляўнічай сабакагадоўлі(en).

Дзейнасьць[рэдагаваць | рэдагаваць крыніцу]

Паводле Статуту таварыства ажыцьцяўляе наступныя віды дзейнасьці:

  • правядзеньне спабораў па стральбе, кіналёгіі(en) і рыбалоўству, сэмінараў па падрыхтоўцы адпаведных судзьдзяў і трэнэраў, стварэньне зборных стралкова-паляўнічых, рыбалоўных і кіналягічных дружынаў;
  • падтрыманьне кармавых, гнездавых і ахоўных умоваў для дзікіх жывёлаў, зарыбленьне арандаваных рыбалоўных угодзьдзяў;
  • ладжаньне паляваньня і рыбалоўства ў арандаваных паляўнічых і рыбалоўных угодзьдзях;
  • папярэджаньне захворваньняў дзікіх жывёлаў, ахова арандаваных паляўнічых і рыбалоўных угоддзяў ад браканьераў(en);
  • падрыхтоўка грамадзянаў да здачы іспыту для атрыманьня дзяржаўнага пасьведчаньня на права паляваньня;
  • здабыча, закуп і продаж пушніны, мяса дзікіх жывёлаў, паляўнічых трафэяў, рыбы, лекавых расьлінаў, грыбоў, ягадаў і паляўніча-рыбалоўнага рыштунку;
  • будаваньне стрэльбішчаў(en), стралковых стэндаў, вальераў і штучных нораў(be);
  • стварэньне музэяў і майстэрняў паляўніча-рыбалоўнага, кіналягічнага рыштунку і адпаведных сувэніраў, як і крамаў і кіёскаў для адпаведнага гандлю;
  • стварэньне зьверагадоўчых, трусагадоўчых і птушкагадоўчых фэрмаў, гадавальнікаў дзікіх жывёлаў і паляўнічых сабакаў, рыбагадавальнікаў ды інкубацыйных цэхаў;
  • улік паляўнічых сабакаў і лоўчых птушак, правядзеньне выставаў, вывадак, палявых выпрабаваньняў і спабораў паляўнічых сабакаў;
  • правядзеньне іспытаў інструктараў, трэнэраў і суддзяў па паляўнічай сабакагадоўлі;
  • правядзеньне спабораў на найлепшага егера, найлепшы паляўнічы трафэй, найлепшы паляўніча-рыбалоўны выраб, фатаздымак і кінафільм;
  • выданьне бюлетэняў, зборнікаў, брашураў, буклетаў, плякатаў, улётак, як і выпуск кінафільмаў аб прыродаахове;
  • забесьпячэньне ўдзелу гульнявых дружынаў і судзьдзяў, гульцоў і трэнэраў таварыства ў міжнародных спаборах;
  • узнагароджаньне за вядзеньне паляўнічай і рыбалоўнай гаспадарак ды прыродаахову;
  • падарожніцкае прадпрымальніцтва;
  • супраца з паляўніча-рыбалоўнымі таварыствамі іншых краінаў;
  • прыцягненьне грамадзянаў да паляваньня, рыбалоўства і падарожніцтва;
  • правядзеньне дасьледніцкіх нарадаў аб паляваньні, рыбалоўстве і падарожніцтве;
  • заснаваньне сродкаў масавай інфармацыі.

Кіраваньне[рэдагаваць | рэдагаваць крыніцу]

  • Зьезд. Склікаецца аднойчы на 5 гадоў. Правамоцны пры наяўнасьці 2/3 прадстаўнікоў. Абірае старшыню на прапанову ўраду пры згодзе прэзыдэнта.
  • Рада. Абіраецца Зьездам. Зьбіраецца штогод. Правамоцная пры наяўнасьці 2/3 удзельнікаў. Вядзе зносіны зь іншымі ўстановамі, ладзіць выкананьне пастановаў Зьезду.
  • Управа. Абіраецца Радай на прапанову старшыні. Склікаецца штоквартал. Правамоцны пры наяўнасьці 2/3 сябраў. Вядзе рахункі і ажыцьцяўляе гаспадарчыя дамовы таварыства.
  • Рэвізійная камісія. Абіраецца Зьездам. Зьбіраецца штогод. Наглядае за выкарыстаньнем грошай установамі таварыства[8].

Мінуўшчына[рэдагаваць | рэдагаваць крыніцу]

Зь сярэдзіны 1950-х пасаду старшыні таварыства займаў расеец Аляксей Андрэевіч Сяргееў (нар. 1905; в. Радыёнаўка, Серпухаўскі павет, Маскоўская губэрня), які са жніўня 1936 году быў начальнікам аддзяленьня 4-га Сакрэтна-палітычнага аддзелу Ўправы дзяржаўнай бясьпекі НКУС БССР і катаваў на допытах падсьледных дзеячоў Беларусі, расстраляных 29—30 кастрычніка 1937 году[9].

На 2 лютага 2011 году таварыства налічвала 63 тысячы сябраў[10].

Крыніцы[рэдагаваць | рэдагаваць крыніцу]

  1. ^ Яраслаў Лыскавец. У 2014 годзе ў нас пройдзе Чэмпіянат сьвету. Па рыбалцы // Зьвязда : Газэта. — 30 сакавіка 2013. — № 59 (27424). — С. 1. — ISSN 1990-763x.
  2. ^ Зьміцер Ісайчук, «Менск-Навіны». Беларускіх паляўнічых — 63,5 тысячы // Зьвязда : Газэта. — 29 сьнежня 2010. — № 255 (26862). — С. 7. — ISSN 1990-763x.
  3. ^ Аляксандар Лукашэнка. Указ прэзыдэнта Рэспублікі Беларусь ад 17 ліпеня 2006 г. № 450(рас.) // Нацыянальны цэнтар прававой інфармацыі Рэспублікі Беларусь, 12 траўня 2009 г. Праверана 2 красавіка 2013 г.
  4. ^ Юлія Ваніна. Беларускае таварыства паляўнічых і рыбаловаў атрымала статус нацыянальнай фэдэрацыі // Беларускае тэлеграфнае агенцтва, 2 сьнежня 2009 г. Праверана 2 красавіка 2013 г.
  5. ^ Марына Носава. У 2009 годзе даходы ад дзейнасьці паляўнічых гаспадарак вырасьлі ў 1,5 разу // БелаПАН, 6 красавіка 2010 г. Праверана 2 красавіка 2013 г.
  6. ^ А.Лукашэнка запатрабаваў навесьці парадак у сфэры паляваньня і паляўнічай дзейнасьці // БелТА, 10 лютага 2012 г. Праверана 2 красавіка 2013 г.
  7. ^ Прэзыдэнт Аляксандар Лукашэнка сёньня прыняў з дакладам старшыню Беларускага таварыства паляўнічых і рыбаловаў // Белтэлерадыёкампанія, 12 лютага 2012 г. Праверана 2 красавіка 2013 г.
  8. ^ Сяргей Сідорскі. Пастанова Савета міністраў Рэспублікі Беларусь ад 14 кастрычніка 2006 г. № 1348(рас.) // НЦПІ Беларусі, 16 сакавіка 2013 г. Праверана 2 красавіка 2013 г.
  9. ^ Леанід Маракоў. Яны вынішчалі нашых продкаў // Толькі адна ноч. — Менск: Зьміцер Колас, 2006. — С. 142. — 180 с. — 1000 ас. — ISBN 985-6783-16-X
  10. ^ Сяргей Шуманскі. За апошнія 5 гадоў у краіне зьявілася больш як 20 рыбалоўна-паляўнічых базаў // Белтэлерадыёкампанія, 2 лютага 2011 г. Праверана 2 красавіка 2013 г.

Вонкавыя спасылкі[рэдагаваць | рэдагаваць крыніцу]