Новы Двор
Новы Двор | |
Касьцёл Унебаўзяцьця Найсьв. Панны Марыі | |
Магдэбурскае права: | XVII ст. |
Вобласьць: | Гарадзенская |
Раёны: | Шчучынскі |
Сельсавет: | Навадворскі |
Часавы пас: | UTC+3 |
Тэлефонны код: | +375 1514 |
Геаграфічныя каардынаты: | 53°48′59″ пн. ш. 24°33′22″ у. д. / 53.81639° пн. ш. 24.55611° у. д.Каардынаты: 53°48′59″ пн. ш. 24°33′22″ у. д. / 53.81639° пн. ш. 24.55611° у. д. |
Новы Двор на мапе Беларусі Новы Двор | |
Галерэя здымкаў у Wikimedia Commons |
Новы Двор — вёска ў Беларусі, цэнтар сельсавету Шчучынскага раёну Гарадзенскай вобласьці. Насельніцтва 611 чал. (2001). Знаходзіцца за 30 км на паўночны захад ад Шчучына, за 36 км ад чыгуначнай станцыі Ражанка; на аўтамабільнай дарозе Астрына — Радунь.
Новы Двор — даўняе магдэбурскае мястэчка гістарычнай Лідчыны (частка Віленшчыны).
Гісторыя
Першы пісьмовы ўспамін пра Новы Двор датуецца 1480, калі тут збудавалі касьцёл. У дакумэнтах 1499 згадваецца намесьнік навадворскі. Пазьней вялікі князь Жыгімонт Стары перадаў паселішча ў трыманьне біскупу віленскаму. У XVI ст. існавалі аднайменныя каралеўскае мястэчка і двор, якія ўваходзілі ў склад Гарадзенскай эканоміі. У 1561 пры правядзеньні «валочнай памеры» Новы Двор пераплянавалі. У гэты час тут існавалі касьцёл, плябанія, Рынак (меў форму квадрата) і 8 вуліцаў: Васілішкаўская, Астрынская, Дубіцкая, Берштанская (Берштаўская), Касьцёльная, Забалотная, Дворная, вуліца «з канца пляцаў рынкавых». Разам налічвалася 102 вулічныя і 14 рынкавых пляцоў, на якіх разьмяшчаліся 104 двары. Местачкоўцы карысталіся Магдэбургскім правам; рэгулярна праводзіліся 2 кірмашы, 2 разы на тыдзень — таржкі. У адпаведнасьці з каралеўскай уставай жыхары з кожнага дома плацілі 2 грошы, а тыя, хто меў валокі зямлі — 3 грошы і г. д. Сярод рамесьнікаў былі краўцы, шаўцы, кушнеры, кавалі, сталяры, сьлесары, ганчары, пекары і іншыя. Двор (сядзіба) налічваў 2 вуліцы, агароды і іншыя землі.
Згодна з адміністрацыйна-тэрытарыяльнай рэформай (1565—1566) Новы Двор увайшоў у склад Лідзкага павету Віленскага ваяводзтва. У 1749 тут збудавалі новы драўляны касьцёл.
У выніку трэцяга падзелу Рэчы Паспалітай (1795) Новы Двор апынуўся ў складзе Расейскай імпэрыі, у Лідзкім павеце Віленскай губэрні. Станам на 1829 у мястэчку было 40 будынкаў (18 хрысьціянскіх і 22 юдэйскія). Жыхары Новага Двора бралі актыўны ўдзел у нацыянальна-вызвольным паўстаньні (1863—1864). У сакавіку 1863 каля мястэчка карныя расейскія войскі разьбілі паўстанцкі аддзел Лідзкага павету на чале зь Людвікам Нарбутам. Станам на 1863 — 62 жылыя дамы, на 1886 — 63 двары. Паводле вынікаў перапісу (1897) існавалі касьцёл, 2 малітоўныя дамы, капліца, вадзяны млын, 3 крамы, 2 карчмы.
Згодна з Рыскай мірнай дамовай (1921) Новы Двор апынуўся ў складзе міжваеннай Польскай Рэспублікі, дзе зрабіўся цэнтрам гміны Шчучынскага павету Наваградзкага ваяводзтва. Станам на 1921 у мястэчку было 126 будынкаў, на 1937 дзейнічалі касьцёл і царква, працавала пошта, праводзіліся таргі.
У 1939 Новы Двор увайшоў у БССР, дзе 12 кастрычніка 1940 зрабіўся цэнтрам сельсавету Васілішкаўскага раёну (з 20 студзеня 1960 у Шчучынскім раёне). Статус паселішча панізілі да вёскі. Станам на 1940 тут было 160 двароў, на 1998 — 275, на 1 студзеня 2001 — 258.
Насельніцтва
- XIX стагодзьдзе: 1829 — 404 чал., у тым ліку 105 хрысьціянаў і 299 юдэяў[1]; 1860 — 501 чал.; 1863 — 348 чал.; 1869 — 509 чал.[2]; 1886 — 708 чал.; 1897 — 822 чал., у тым ліку 664 юдэі
- XX стагодзьдзе: 1905 — 977 чал.; 1919 — 691 чал.; 1921 — 655 чал.; 1937 — 655 чал.; 1940 — 821 чал.; 1998 — 695 чал.[3]
- XXI стагодзьдзе: 1 студзеня 2001 — 611 чал.[4]
Інфраструктура
У Новым Двары працуюць сярэдняя школа, дашкольная ўстанова, амбуляторыя, дом культуры, бібліятэка, пошта.
Турыстычная інфармацыя
Выдатныя мясьціны
- Капліца (1882)
- Касьцёл Унебаўзяцьця Найсьвяцейшай Панны Марыі (1749)
- Сынагога
Галерэя
-
Касьцёл
-
Касьцёл, інтэр'ер
-
Капліца
-
Сынагога
Крыніцы
- ^ Іна Соркіна. Мястэчкі Лідскага ўезда ў XIX — пачатку ХХ ст. // Ліда і Лідчына: да 685-годдзя з дня заснавання горада: матэрыялы рэспуб. навук.-практ. канф., (Ліда, 3 кастр. 2008 г.) / рэдкал.: Худык А. П. (гал. рэд.). — Ліда, 2008.
- ^ Соркіна І. Мястэчкі Беларусі... — Вільня, 2010. С. 380.
- ^ Уладзімір Мальцаў. Новы Двор // ЭГБ. — Мн.: 1999 Т. 5. С. 333.
- ^ Памяць: Гіст.-дакум. хроніка Шчучынскага р-на. — Мн., 2001.
Літаратура
- Памяць: Гіст.-дакум. хроніка Шчучынскага р-на. — Мн.: БелЭн, 2001. — 592 с.: іл. ISBN 985-11-0218-0.
- Энцыклапедыя гісторыі Беларусі. У 6 т. / Беларус. Энцыкл.; Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн.: БелЭн, 1999. — Т. 5: М — Пуд. — 592 с. — ISBN 985-11-0141-9
- Соркіна І. Мястэчкі Беларусі ў канцы ХVІІІ — першай палове ХІХ ст. — Вільня: ЕГУ, 2010. — 488 с. ISBN 978-9955-773-33-7.
- Nowydwór (4) // Słownik geograficzny Królestwa Polskiego i innych krajów słowiańskich. Tom VII: Netrebka — Perepiat. — Warszawa, 1886. — S. 294
Вонкавыя спасылкі
Новы Двор — сховішча мультымэдыйных матэрыялаў
|