Браслаўская града

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку
Краявід Браслаўскай грады

Браслаўская града, Браслаўскае ўзвышша — града на крайнім паўночным захадзе Беларусі, займае большую частку Браслаўскага і частку Мёрскага раёнаў Віцебскай вобласьці. Некаторыя дасьледчыкі лічаць яе часткай Беларускага Паазер’я. Працягнулася з захаду на ўсход на 66 км, з поўначы на поўдзень — амаль на 60 км, плошча 1,9 тыс. км². Найбольшая вышыня 210 м над узроўнем мора каля вёскі Слабодка.

На поўначы града абмежавана далінай Дзьвіны, на ўсходзе і поўдні — Полацкай нізінай.

Града канчаткова сфармавалася ў час браслаўскага прыпынку (стадыялу) паазерскага ледавіка. У рэльефе вылучаюцца дугападобныя грады, паміж якімі паніжэньні і невялікія азёры. Трапляюцца шматлікія озавыя і камавыя ўзгоркі.

Карысныя выкапні: керамічная сыравіна, пяскова-жвіровы матэрыял, торф.

Рэкі належаць да басэйну Дзьвіны, найвялікшая — Друйка, якая працякае празь некалькі азёраў. Пад азёрамі каля 10% тэрыторыі, большасьць зь іх належыць да Браслаўскай групы азёр.

Разараныя каля 60%, пад лесам і хмызьняком каля 20% тэрыторыі.

Браслаўская града вызначаецца маляўнічасьцю краявідаў, асабліва там, дзе аблесеныя ўзгоркі спалучаюцца з азёрнымі плёсамі. Тут разьмешчаныя Браслаўскі нацыянальны парк, зоны адпачынку, санаторыі, дамы адпачынку, турбаза.

Панарамны від на возера Струста з гары Маяк

Адным з найвышэйшых пунктаў грады зьяўляецца гара Маяк, разьмешчаная паміж азёрамі Струста і Снуды[1].

Крыніцы[рэдагаваць | рэдагаваць крыніцу]

Літаратура[рэдагаваць | рэдагаваць крыніцу]

  • Браслаўская града // Геаграфія Беларусі: энцыклапедычны даведнік / Рэдкал. Л. В. Казлоўская і інш. — Мн., 1992. С. № 51—52.
  • Физическая география Витебской области : учебное пособие / М. Ю. Бобрик [и др.]. — Витебск, 2004. — С. 53—54.

Вонкавыя спасылкі[рэдагаваць | рэдагаваць крыніцу]

Commons-logo.svg Гара Маяксховішча мультымэдыйных матэрыялаў