Дрысьвяты

Возера Дрысьвяты Возера Дрысьвяты Краіны Беларусь, Летува Плошча 44,5 км² Плошча вадазбору 604 км² Максымальная глыбіня 33,3 м Сярэдняя глыбіня 7,6 м Найбольшая даўжыня 13 км Найбольшая шырыня 5,8 км Даўжыня берагавой лініі 60,5 км Вышыня над узроўнем мора 141,6 м Аб’ём вады 313 млн м³ Каардынаты 55°37′50.21″ пн. ш. 26°35′59.24″ у. д. Дрысьвяты на мапе Беларусі Дрысьвяты

Галерэя здымкаў у Вікісховішчы

Дрысьвя́ты (лет. Drūkšiai) — возера ў Беларусі і Летуве, у басэйне ракі Дрысьвяты. Знаходзіцца на мяжы Браслаўскага раёну Віцебскай вобласьці і Езяроскага раёну Ўцянскага павету, за 22 км на захад ад Браслава. Належыць да групы Рычана-Дрысьвяцкіх азёр. Плошча паверхні возера 44,5 км² (зь іх каля 34 км² на летувіскім баку, каля 10 км² — на беларускім). Даўжыня 13 км, найбольшая шырыня 5,8 км. Найбольшая глыбіня дасягае 33,3 м, сярэдняя складае 7 м. Аб’ём вады 313 млн м³. Даўжыня берагавой лініі 60,3 км.

На паўднёва-ўсходнім беразе возера стаіць гістарычнае мястэчка Дрысьвяты.

Апісаньне

Катлавіна выгнутай формы, выцягнутая на захад і поўдзень. Схілы — узгоркі і грады вышынёй да 15 м, месцамі спадзістыя, забалочаныя, на ўсходзе і паўднёвым захадзе разараныя, астатнія аблесеныя. У час руху ледавікоў утварыліся дзьве пэрпэндыкулярныя западзіны выцягнутай формы, якія працягнуліся з поўначы на поўдзень і з захаду на ўсход.

Берагавая лінія зьвілістая, у выніку чаго возера мае мноства затокаў, асабліва ў паўднёвай частцы. На берагох вадаёма шмат валуноў. Рэльеф дна ўзгорысты. Да глыбіні 5 м дно пясковае, цэнтральная частка высьцілаецца глеем.

Мае 8 выспаў, найбольшым зь іх — выспа Замак, плошча якой складае 0,26 км². Возера эўтрофнае. Зарастае каля 10% плошчы паверхні возера. На паўднёва-ўсходнім беразе возера знаходзіцца Дрысьвяцкі парк.

Упадаюць рэкі Апівардка, Рычанка. Выцякае рака Прорва, якая праз возера Аболе і раку Дрысьвяту злучае возера Дрысьвяты з ракой Дзісной (прытокам Дзьвіны). Празрыстасьць вады дасягае 4 м.

Да закрыцьця Ігналінскай АЭС возера выкарыстоўвалася як вадаём-ахаладжальнік.

Флёра і фаўна

У возеры водзяцца шчупак, лешч, акунь, язь, сазан, судак, плотка, лінь, верхаводка, мянтуз, рапушка, сустракаецца вугор.

Літаратура

• Беларуская энцыклапедыя: У 18 т. / Рэдкал.: Г. П. Пашкоў і інш. — Менск: БелЭн, 1998. — Т. 6: Дадаізм — Застава. — 576 с. — ISBN 985-11-0106-0
• Блакітная кніга Беларусі: энцыкл. / Рэдкал.: Н. А. Дзісько, М. М. Курловіч, Я. В. Малашэвіч і інш.; Маст. В. Г. Загародні. — Менск: БелЭн, 1994. — 415 с. ISBN 5-85700-133-1.
• Энцыклапедыя прыроды Беларусі: у 5 т. Т. 2: Гатня ― Катынь / Рэдкал.: І. П. Шамякін (галоўны рэдактар) і інш. — Мн.: БелСЭ, 1983. — 520 с.