Марш за свабоду (Горадня, 2020)

Марш за свабоду
Пратэсты супраць фальсыфікацыі прэзыдэнцкіх выбараў у Беларусі (2020)
Дата	16 жніўня 14:00 — вечар
Месца	Плошча Савецкая, плошча Леніна й шмат іншых; Горадня; Беларусь
Прычыны	Фальсыфікацыя вынікаў прэзыдэнцкіх выбараў 9 жніўня
Мэты	вызваленьне палітвязьняў, правядзеньне чэсных прэзыдэнцкіх выбараў
Спосабы	масавае шэсьце, мітынґ
Удзельнікі канфлікту
беларусы Адміністрацыя прэзыдэнта Рэспублікі Беларусь
Сілы бакоў
Каля 30—40 тысячаў больш за 40 тысячаў

Марш за свабо́ду — адна з найбуйнейшых акцыяў пратэсту ў Горадні, якая адбылася 16 жніўня 2020 году.

Да акцыі

Пасьля абеду на плошчы Савецкай ў Горадні пачалі зьбірацца людзі. Яны ішлі парамі, сем’ямі, суполкамі, працоўнымі калектывамі і па адзіночцы. У руках у іх разьвяваліся бел-чырвона-белыя сьцягі, дзеці несьлі белыя балёнікі, валянтэры раздавалі ваду. Пажылыя людзі і сем’і зь дзецьмі разьмясьціліся ў сквэры ў цені дрэваў. Адтуль даносілася музыка. Нехта слухаў Віктара Цоя «Перемен», у кагосьці з калёнкі грала песьня «Тры чарапахі» і «Разбуры турмы муры». Праяжджалі міма самаходы сыгналілі, гарадзенцы ў адказ паказвалі знак перамогі «V» ці проста махалі рукамі. Тутэйшыя мелі адчуваньне масавага сьвята.

Хада акцыі

Пасьля 14-й гадзіны з боку гарадзенскага Фарнага касьцёла вышыхтавалася калёна маршнікаў. На чале яе былі ксядзы. У іх у руках былі абразы й плякаты: «Дакуль мы маем трымацца праўды? Да канца, як і Хрыстос», «Няхай сыдзе Дух Святы і абновіць аблічча зямлі! Гэтай зямлі!». На акцыі таксама былі працаўнікі «Горадні Азоту», «Хімвалакна», «Белкарду», Гарадзенскага мясакамбінату і працаўнікі культуры, лекары.

Пратэстоўцы ішлі цэнтральнымі вуліцамі, несучы над сабой 70-мэтровы бел-чырвона-белы сьцяг. Прайшоўшы вуліцаю Карла Маркса, калёна выйшла на вуліцу Будзёнага, адтуль згарнула на вуліцу Ажэшкі, і выйшла на плошчу Леніна. На плошчы на імправізаванай сцэне пачаўся мітынґ, дзе працаваў «свабодны мікрафон». На сцэне прамаўляў шмат хто, у тым ліку Віктар Шумель, у адказ якому гарадзенцы скандавалі «Новы мэр!» (па-расейску: Новый мэр!). Ён прамаўляў:

Вы не адны. Нас 97%. Заўтра ўсе ідэоляґі паедуць па прадпрыемствам і пачнуць гаворыць, што вы подрываеце эканоміку. Ня верце ім! Гэта ня вы дрэнныя, гэта яны дрэнныя — яны падманваюць нас! Калі ласка, не спыняйцеся. Зразумейце: удзень бастоўка, увечары — мітынґ! І толькі так! Не паддавайцеся эйфарыі — мы яшчэ не перамаглі, мы толькі на лініі фронту.

Арыгінальны тэкст  (рас.)  

Вы не одни. Нас 97%. Завтра все идеологи поедут по предприятиям и начнут говорить, что вы подрываете экономику. Не верьте им! Это не вы плохие, это они плохие — они обманывают нас! Пожалуйста, не останавливайтесь. Помните: днем бастовка, вечером — митинг! И только так! Не поддавайтесь эйфории — мы еще не победили, мы только на линии фронта.

На плошчы гарадзецы таксама скандавалі: «У турму!» (па-расейску: В тюрьму!).

На сканчэньні мітынґу перад гарадзенцамі выступіў музыка з гурту «DZIECIUKI» Алесь Дзянісаў.

Патрабаваньні

На імправізаванай сцэне на плошчы Леніна гарадзенцы агучылі свае патрабаваньні:

• Адстаўка Аляксандра Лукашэнкі;
• Вызваленьне ўсіх палітвязьняў;
• Адстаўка й арышт кіраўніцтва МУС за ґвалт на мірных акцыях;
• Адстаўка й арышт чальцоў ЦВК на чале зь Лідзіяй Ярмошынай;
• Стварэньне рады народнага даверу, у якую ўвойдуць і органы дзяржаўнай улады;
• Гарантаваньне свабоды мірных сходаў у любым месцы Горадні;
• Апраўданьне асуджаных за мірныя акцыі;
• Вяртаньне сплачаных штрафаў.

Вонкавыя спасылкі

• Мірна, адзіа й неверагода прыгожа: у Горадні «Марш салідарнасьці» сабраў, здаецца, 40 тысяч гарадзенцаў
• У Горадні на мітынг сабраліся каля 30 тысяч чалавек(недаступная спасылка)