Зьміцер Вайцюшкевіч

Зьміцер Вайцюшкевіч
Зьміцер Вайцюшкевіч на сольным канцэрце ў філярмоніі. Віцебск, 2010
Дата нараджэньня	20 ліпеня 1971(1971-07-20) (52 гады)
Месца нараджэньня	Бярозаўка, Лідзкі раён Гарадзенскае вобласьці
Грамадзянства	Беларусь
Месца вучобы	Беларускі дзяржаўны ўнівэрсытэт культуры і мастацтваў Менскі дзяржаўны музычны коледж імя Міхаіла Глінкі[d]
Занятак	сьпявак, кампазытар, музыка
Навуковая сфэра	музыка
Жанры	аўтарская песьня[d], рок-музыка і фолк-рок[d]
Інструмэнты	клярнэт[d], гітара, флейта і голас[d]
Псэўданімы	Тодар
Гурты	«Палац» (1992—1998), KRIWI (1997—2001),, «WZ-Orkiestra» (з 2001)
Сайт	todar.net
Зьміцер Вайцюшкевіч у Вікісховішчы

Зьміцер Вайцюшке́віч (нарадзіўся 20 ліпеня 1971 у мястэчку Бярозаўка Лідзкага раёну) — беларускі сьпявак і музыка. Вядомы таксама пад псэўданімам Todar.

Біяграфія

З 1978 па 1986 гад вучыўся ў спэцыялізаванай школе з паглыбленым вывучэньнем ангельскай мовы, па яе канчатку, у 1986 годзе паступае ў музычную школу ў горадзе Ліда, якую канчае ў 1990 годзе з адзнакаю.

Такім чынам, пасьля канчатка музычнай школы па клясу клярнэту, Вайцюшкевіч пачынае сур’ёзна задумвацца пра працяг музычнай адукацыі й у тым жа годзе паступае ў Інстытуце Культуры, дзе да 1995 году працягвае вывучаць клярнэт. З 1993 па 1995 гады вучыцца вакалу ў менскай вучэльні імя Глінкі.

Жанаты з Галінай Казіміроўскай, дырыгенткай Concordia Chor. Маюць сына Язэпа і дачку Стэфанію.

Творчасьць

1992 — Зьміцер становіцца ўдзельнікам знакамітага беларускага гурту «Палац». Гэты калектыў выконвае рок-музыку, якая замешана на традыцыйным беларускім фольку. Зьміцер Вайцюшкевіч і Алег Хаменка цалкам падзялялі музычныя погляды адзін аднаго.

З «Палацам» Вайцюшкевіч запісвае такія вельмі пасьпяховыя альбомы, як «Палац» (1995) і «Дарожка» (1997), аднак у 1998 годзе ён усё-ткі прымае рашэньне сысьці з гурту.

Наступным яго прыстанкам становіцца гурт «KRIWI», зь якім дасьледаваньні ў вобласьці нацыянальнага фольку працягваюцца да 2001 году.

1997 — супольны музычны праект «Narodny albom», у запісы якога прынялі ўдзел лепшыя беларускія выканаўцы й музыканты. Зборам і апрацоўкай тэкстаў займаўся рок-паэт Міхал Анемпадыстаў. Для праекту Вайцюшкевіч выканаў «Аргентынскае танга» й падыграў на флейце й клярнэце.

2000 — супольны музычны праект «Я нарадзіўся тут». Аўтарам ідэі выступіў Алесь Суша. Ён прапанаваў музыкам перарабіць ці распрацаваць беларускія вайсковыя песьні, гімны й маршы часоў БНР, «партызанкі», савецкіх часоў і эмігранцкага асяродку. Ідэя трансфармавалася ад ваярства да своеасаблівага габэлену жыцьця беларусаў ад 1918 году й да нашых часоў. Былі апрацаваныя творы на вершы Я. Купалы, Н. Аляксеевай, Л. Геніюш ды іншых. Вайцюшкевіч сьпяваў, а таксама граў на клявішах, джамбі, мандаліне, клярнэце й сапілцы. Адзін з трэкаў стаў сапраўды культавым — «Я нарадзіўся тут». Яе музыкі выконвалі на дзьвюх мовах разам з гуртом «Louise attaque» падчас іх менскага канцэрту.

2001 — Вайцюшкевіч засноўвае гурт «WZ-Orkiestra» (Усход-Захад Аркестар), зь якой запісаў вялікую колькасьць гітоў. З гэтага моманту Зьміцер Вайцюшкевіч, песьні якога ўжо цікавяць багата слухачоў, пачынае адзін за адным запісваць пасьпяховыя альбомы. Першы альбом «WZ-Orkiestra» зваўся «Цацачная крама» (Крама цацак).

У гэтым жа годзе Зьміцер атрымлівае шэраг узнагарод, такіх у прыватнасьці, як прэмія «Рок-каранацыя-2001» у катэгорыі традыцыі ды сучаснасьць. Таксама выступае кампазытарам фільму «Сьвежына з салютам» 2001 году.

Гурт выконвае музыку ў стылі world music, рэтра, гарадзкі шансон, рок, аўтарская песьня. Супрацоўнічае зь вядомымі беларускімі й замежнымі паэтамі. Ляўрэат фэстывалю EBU (European broadcasting Union, Фэрдэ, 2003) у Нарвэгіі. Гурт пасьпяхова выступаў ў Польшчы, Украіне, Нямеччыне, Швэцыі, Францыі, Італіі, Расеі, Славеніі, Казахстане, Эстоніі, Літве, Латвіі. На Беларусі WZ-Orkiestra маюць ля пяцідзесяці канцэртаў штогод.

2002 — беларускі трыб’ют гурту Depeche Mode — «Personal Depeche». Для праекту Тодар зрабіў кавэр на песьню DM «I want you now».

WZ-Orkiestra шмат супрацоўнічае з польскімі музыкамі — «Todar & Cheremshina», «Todar & Kvartet YORGI», «WZ-Orkiestra & Verhovyna».

Такія альбомы, як «Паравіны году» (2003), «Паравоз каханьня» (2004), «Месяц і сонца» (2005) некалькі адышлі ад фатальнага гучаньня. Тут можна знайсьці й шансон, і традыцыйны беларускі фольк.

У лютым 2008 году Тодар даў некалькі канцэртаў разам зь мясцовым гуртом Dreydel у Японіі.

У 2009 годзе з удзелам Ганны Хітрык, Яна Маўзэра, Сьвятланы Бенькі, Яўгеніі Лятун, Алеся Зайцава, Насты Някрасавай, Сержука Трухановіча, Галіны Казіміроўскай ды іншых запісаў і выдаў супольны музычны праект «Мой сябра анёлак» .

У 2010 годзе выйшла кніга «Беларускае слова ад сьпеву», выдавецтве «Кнігазбор». Пра беларускую музыку й Вайцюшкевіча ў прыватнасьці агулам разважаюць палітык Аляксандар Мілінкевіч, народны паэт Рыгор Барадулін, паэт Генадзь Бураўкін, мастак Алесь Пушкін, бард Алесь Камоцкі, рок-сьпявак Лявон Вольскі ды іншыя.

21 ліпеня 2022 году Зьміцер Вайцюшкевіч выпусьціў музычны альбом «Вецер», які запісаў з аркестрам «Усход-Захад». Альбом быў даступны для праслухоўваньня на музычным партале «Эпл» і складаўся з 8 песьняў, у тым ліку такіх, як «25 сакавіка», «Свабода», «Ты і я», «Мадагаскар», «Ты дзе», «Лепш разам» і «Калі мяне ня стане».

На сёньняшні дзень Зьміцер Вайцюшкевіч мае вялікую колькасьць розных музычных узнагарод, рэгулярна ўдзельнічае ў розных фолькавых праектах, разам зь іншымі сваімі калегамі.

Фота

• 
  Зьміцер Вайцюшкевіч на Басовішчы-2008.
• 
  Зьміцер Вайцюшкевіч на сольным канцэрце ў віцебскай філярмоніі, 2010
• 
  Зьміцер Вайцюшкевіч, 20 траўня 2010, Палац культуры вэтэранаў
• 
  Зьміцер Вайцюшкевіч ў клюбе «Графіці», 23 верасьня 2010
• 
  Зьміцер Вайцюшкевіч ў клюбе «Графіці», 23 верасьня 2010

Дыскаграфія

Альбомы

• Цацачная крама (2001) — песьні пра краму, дзе прадаюцца цацкі-жывёлы, на вершы Леаніда Дранько-Майсюка
• Балады (2002) — песьні на народныя тэксты і з часткова народнай музыкай
• Паравіны году (2003) — песьні на вершы Алеся Камоцкага
• Паравоз каханьня (2004) — песьні на вершы Рыгора Барадуліна
• MW (2005) — песьні па-расейску на вершы Ўладзімера Маякоўскага
• Месяц і сонца (2005) — песьні на японскія вершы, перакладзеныя на беларускую мову
• Танга з ружай (2006) — песьні на вершы Ўладзімера Някляева
• Песьні з доўгай шуфляды. Нявыдадзенае (2006) — малавядомыя песьні, якія ня трапілі на ранейшыя дыскі
• Калыханкі (2007) — сумесны музычны праект разам зь Дзіцячым фондам ААН UNICEF
• Liryka (2007) — песьні на вершы Генадзя Бураўкіна
• Тое, што трэба (2008)
• Мой сябра анёлак (2009)
• Беларуская песня (2010) — live запіс канцэрту, прысьвечанага 80-годзьдзю з дня нараджэньня Уладзімера Караткевіча
• Чара (2011)
• Што на сэрцы (2011)
• Ваячак (2012)
• Варанок (2013)
• Наша песня (2015)
• Камета (2015)
• У Нашых Снах (2017)
• Люблю (на вершы У.Маякоўскага) (2018)
• Зорка Дзіва (2019)
• На Каляды (2020)
• «Вецер» (2022)

Супольныя праекты й складанкі

• Народны Альбом (1997)
• Я нарадзіўся тут (2000)
• Сьвяты вечар (2000)
• Personal Depeche (2002) — «I Want You Now»
• Бывайце здаровы. Bella Ciao (2004)
• Скрыпка дрыгвы (нявыдадзены)
• Прэм'ер Тузін 2005 (2005) — «Вясновы дзень», «Я ішоў да цябе»
• Прэм'ер Тузін 2006 (2006) — «Дарога», «Сьвята ў вёсцы»
• Мой сябра анёлак (2009)
• Budzma The Best Rock / Budzma The Best Rock/New (2009) — «Jak Viecier»

Літаратура

• Д.П. ВАЙЦЮШКЕВІЧ ЗМІЦЕР (Войтюшкевич Дмитрий, Vajtsiushkevich Dzmitri) // Энцыклапедыя беларускай папулярнай музыкі / уклад. Дз. Падбярэзскі і інш. — Мінск: Зміцер Колас, 2008. — С. 51–52. — 368 с. — 2000 ас. — ISBN 978-985-6783-42-8

Вонкавыя спасылкі

• Зьміцер Вайцюшкевіч — сховішча мультымэдыйных матэрыялаў
• todar-vojt: Жывы дзёньнік Зьмітра Вайцюшкевіча
• Афіцыйны сайт Зьмітра Вайцюшкевіча
• Старонка на Facebook
• Старонка Зьмітра Вайцюшкевіча на West Records
• КУЛЬТурныя людзі: Зьміцер Вайцюшкевіч
• Інтэрвію з Вайцюшкевічам на сайце Ultra-Music