Клюб быў заснаваны ў 2019 годзе і ў першы год выступаў у чэмпіянаце Гарадзенскай вобласьці. У 2020 годзе «Астравец» заявіўся ў Другую лігу, дзе заняў выніковае 9 месца. Падчас сэзону клюб як трэнэр ачоліў гулец Сяргей Крот. У 2021 годзе, значна ўзмацніўшы склад, клюб пастанавіў сабе выйсьці ў Першую лігу. Упэўнена атрымаўшы перамогу ў Гарадзенскім дывізіёне, астравецкая каманда выйшла ў плэй-оф і здолела дайсьці да фіналу, дзе перамагла рагачоўскі «Макслайн» зь лікам 3:1. Нападнік «Астраўца» Аляксей Хадневіч з 59 галамі ўсталяваў рэкорд выніковасьці за сэзон у Другой лізе. Перад стартам у другім дывізіёне клюб склаў дамовы з колішнім гульцом зборнай Беларусі Дзьмітром Алісейкам. Ужо падчас сэзону да каманды далучыўся з койданаўскага «Арсэналу» яшчэ адзін былы футбаліст зборнай Антон Сарока. У сэзоне 2022 году зь Першай лізе «Астравец» доўгі час змагаўся за высокія месцы, аднак у выніку стаў пятым.
Вынік сэзону 2023 году быў самым няўдалым для зялёна-белых у іхняй нядоўгай гісторыі. Пасьля першых дзесяці тураў каманда ішла сёмай у турнірнай табліцы, аднак да канца першай паловы чэмпіянату апусьцілася на 11-ы радок. Летнія трансфэры павінны былі дапамагчы выправіць сытуацыю, што спачатку дапамагло. Гэтак астраўчане вярнуліся на 7-ы радок у табліцы пасьля 26 туру, аднак канцоўку сэзону каманда праваліла. У васьмі заключных турах было набранае ўсяго толькі два пункты, сэрыя з шасьці паразаў запар на фінішы адкінула каманду на 12-е месца. Па заканчэньні сэзону з 19 футбалістамі з розных прычынаў былі скасаваны кантракты. Да пачатку сэзону 2024 году зялёна-белыя паўсталі перад сваімі заўзятарамі ў абноўленым складзе. Пасьля расчаравальнага папярэдняга сэзону кіраўніцтва клюбу зрабіла перастаноўку ў трэнэрскім штабе. Пасаду галоўнага трэнэра заняў Юры Каратай, а Сяргей Крот стаў ягоным памочнікам. Клюб узяў курс на амаладжэньне, у выніку чаго былі складзеныя кантракты пераважна з футбалістамі 2002—2004 гадамі нараджэньня, сярэдні век каманды склаў 22 гады на пачатак сэзону.
.svg){kind=small}
