Ворша (футбольны клюб)

	Ворша
Поўная назва	Футбольны клюб «Ворша»
Заснаваны	1951
Горад	Ворша, Беларусь
Стадыён	Гарадзкі; Умяшчальнасьць: 2582
Чэмпіянат	Першая ліга
· 2025	16 месца

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Ворша (неадназначнасьць).

«Ворша» — футбольны клюб зь Беларусі. Колеры — сіня-белыя. З 2015 году выступае ў Першай лізе чэмпіянату Беларусі.

Адну зь мянушак «раёншчыкі» клюб атрымаў праз тое, што раней у горадзе адбываліся масавыя бойкі паміж жыхарамі розных раёнаў. Больш нэўтральная мянушка — «ільняныя» — нарадзілася праз тое, што ў горадзе працуе буйны ільнокамбінат.

Гісторыя

Заснаваны ў 1951 годзе пад назвай «Труд». Большую частку сваёй гісторыі клюб выступаў пад назвай «Старт». Выступаў у чэмпіянаце БССР, пераважна ў найвышэйшым дывізіёне. У 1971 годзе дайшоў да фіналу Кубка БССР, але атрымаў у ім паразу ад жодзінскага «Тарпэда». У тым жа годзе гуляў супраць ленінградзкага «Дынама» ў 1/16 фіналу Кубка СССР сярод аматарскіх калектываў і выбіў суперніка. Але ў 1/8 фіналу саступіў рыскаму клюбу зь лікам ВЭФ 1:3. Меў назвы ЗШМ і «Машынабудаўнік».

У 1990-х гадах клюб меў назву «Легмаш» (да 1994 году), а таксама «Максім-Ворша» (1995), «Максім-Легмаш» (1996). Дружына здолела выйсьці ў Другую лігу, дзе правяла некалькі сэзонаў да 2001 году, калі празь фінансавыя чыньнікі была вымушаная зьняцца з чэмпіянату. Праз тры гады клюб павярнуўся ў Другую лігу, але гэтым разам клюб здолеў толькі ў 2005 выйсьці ў дывізіён вышэй, пасьля чаго зноў апынуўся ў Другой лізе, дзе доўгі час знаходзіўся ў канцы табліцы. З 2005 па 2007 гады клюб меў назоў «Ворша-Белаўтасэрвіс».

У сярэдзіне сэзона 2013 году ў клюб прыйшлі некалькі дасьведчаных гульцоў, якія мелі досьвед выступаў у Найвышэйшай лізе і ў замежных чэмпіянатах. У выніку гэта дазволіла «Воршы» ўзьняцца на 6 радок. У сэзоне 2014 году каманда ўпэўнена правяла першы этап, дзе здабыла першае месца ў групе, не атрымаўшы аніводнай паразы. У фінальным этапе «Ворша» таксама спачатку рухалася на першым месцы, але пазьней шэраг няўдачаў адкінуў каманду на трэці радок. Толькі ў апошнім туры, дзякуючы нічыі з «Крумкачамі», «Ворша» засталася на трэцім радку і атрымала месца ў Першай лізе. Станам на 2014 год «Ворша» была самым папулярным клюбам Другой лігі паводле глядацкага інтарэсу — гэта была адзіная каманда, што зьбірала ў сярэднім больш за тысячу чалавек на матчы.

У сэзоне 2015 году дружына займала пазыцыю ўнізе турнірнай табліцы і заняла 14 месца пры 16 удзельніках. У сэзоне 2016 году быў павялічаны бюджэт клюбу, дзякуючы чаму ягоны склад папоўніў шэраг дасьведчаных гульцоў, а галоўным трэнэрам быў прызначаны Юры Канаплёў, які доўгі час працаваў зь «Віцебскам». «Ворша» здолела замацавацца ў сярэдзіне турнірнай табліцы і заняла 7 месца з 14 камандаў. У сэзоне 2017 году, не зважаючы на добры пачатак, «Ворша» хутка апынулася ў сярэдзіне турнірнай табліцы і заставалася там да сканчэньня сэзону, заняўшы 10 месца пры 16 удзельніках.

У пачатку 2018 году новым галоўным трэнэрам каманды стаў Вячаслаў Акшаеў. «Ворша» добра распачала сэзон, але потым стала трываць паразы. У жніўні трэнэрам замест Акшаева быў прызначаны Сяргей Вехцеў. Істотна зьмяніўся склад каманды, які быў папоўнены віцебскімі футбалістамі. Сэзон каманда скончыла на 12 месцы пры 15 удзельніках. Вехцеў заставаўся трэнэрам і ў сэзоне 2019 году, калі «Ворша» стала 10-й, а нападнік клюбу Дзьмітры Іваноў з 17 галамі стаў другім бамбардзірам Першай лігі. У сэзоне 2020 году «Ворша» адмовілася ад актыўнага супрацоўніцтва зь «Віцебскам» і пачала запрашаць гульцоў з Магілёву і Расеі. Галоўным трэнэрам сэзон пачынаў Аляксандар Вопсеў, у кастрычніку яго замяніў Мікалай Бранфілаў, аднак вынікі амаль не зьмяніліся — «Ворша» амаль увесь сэзон правяла ў сярэдзіне і ніжняй палове табліцы, а скончыла турнір на 11 месцы.

У сэзоне 2021 году, не зважаючы на істотную зьмену складу, клюб працягваў рабіць стаўку на дасьведчаных футбалістаў, падмацаваўшыся таксама шэрагам маладых выканаўцаў і расейскімі гульцамі. На турнірнай дыстанцыі каманда рухалася роўна, знаходзілася амаль увесь час трохі ніжэй сярэдзіны табліцы. У верасьні 2021 году галоўны трэнэр каманды Мікалай Бранфілаў сышоў з клюбу, некаторы час абавязкі галоўнага трэнэра выконваў ягоны памочнік Алег Чарапнёў, а ў кастрычніку новым трэнэрам быў прызначаны Ігар Чумачэнка, які раней ачольваў магілёўскі «Дняпро». Дружына ўпэўнена замацавалася на 9 месцы пры 12 удзельніках, дзе і скончыла сэзон. У сэзоне 2022 году каманда працягвала знаходзіцца пераважна ў сярэдзіне табліцы. Выступала нестабільна, буйныя паразы чаргаваліся перамогамі над фаварытамі. Чэмпіянат «Ворша» завяршыла на 9 месцы пры 13 удзельніках. У сэзоне 2023 году каманда цягам турніру знаходзілася ў другой палове табліцы і скончыла чэмпіянат на 14-м радку пры 17 удзельніках.

Стадыён

Гульні праводзіць на гарадзкім стадыёне, які ўмяшчае 2582 гледачы. Таксама некаторыя гульні адбываюцца на стадыёнах «Лякаматыў» (2500 гледачоў) і «Пасялковы» (1500 гледачоў).

Дасягненьні

Найвышэйшыя дасягненьні ў часы СССР: фіналіст Кубка БССР (1971), 4-е месца ў чэмпіянаце БССР (1971). 4-разовы чэмпіён Віцебскай вобласьці (1968, 1970, 1972, 1977). 4-разовы ўладальнік Кубка Віцебскай вобласьці (1961, 1971, 1972, 1976). 6-разовы срэбраны прызэр чэмпіянату Віцебскай вобласьці (1973, 1980, 1982, 1983, 1984, 1989) и 4-разовы бронзавы (1966, 1974, 1975, 1979).
Дасягненьні ў чэмпіянатах Беларусі: 8-е месца ў Першай лізе (1996), пераможца Другой лігі (1995).

Склад

Актуальны на 8 красавіка 2026 году

№	Пазыцыя	Імя	Год нараджэньня
1	Бр	Арцём Валадзькоў	2001
5	Аб	Мікіта Тарбякоў	2002
7	ПА	Мікіта Бабчонак	1999
8	ПА	Іван Беразун	1997
9	Нап	Дзьмітры Ціхаміраў	1999
10	ПА	Іван Агееў	2005
11	Нап	Даніла Стаін	2002
13	Нап	Максім Пашкевіч	2002
14	Аб	Арцём Дамброўскі	2005
16	ПА	Уладзіслаў Мітрафанаў	2009
17	Нап	Яраслаў Кулеш (ар. БАТЭ)	2006

№	Пазыцыя	Імя	Год нараджэньня
18	Аб	Мікіта Воўчанка	2002
19	Нап	Мікіта Вехцеў (ар. Віцебск)	2005
52	Бр	Раман Краўчанка	2004
69	ПА	Станіслаў Булахоў	2007
77	ПА	Глеб Жалезьнікаў (капітан)	1997
80	Аб	Ян Камароў	2003
82	Аб	Віталь Шалычаў	2001
88	ПА	Дзяніс Рудзянок	1998
93	ПА	Павал Бардукоў	1993
—	ПА	Андрэй Раманаў	1998
—	ПА	Захар Каранкоў	2008

Статыстыка

Сэзон	Ліга	Месца	Г	В	Н	П	РМ	Пкт	Кубак
2012	Другая	17	36	9	8	19	30–72	35	1/32
2013	Другая	6	24	10	5	9	41–25	35	1/32
2014	Другая	3 ▲	30	20	9	1	59–18	69	1/64
2015	Першая	14	30	3	8	19	24–70	17	1/16
2016	Першая	7	26	9	10	7	43–34	37	1/16
2017	Першая	10	30	10	7	13	48–48	37	1/8
2018	Першая	12	28	8	3	17	33–53	27	1/16
2019	Першая	10	28	9	4	15	33–61	31	1/32
2020	Першая	11	26	7	6	13	30–42	24^[a]	1/16
2021	Першая	9	33	9	7	17	41–60	34	1/32
2022	Першая	9	24	7	6	11	33–52	27	1/16
2023	Першая	14	32	8	7	17	50–62	31	1/32

Галоўныя трэнэры

Сяргей Вехцеў (з жніўня 2018 году)^[1]
Вячаслаў Акшаеў (2018)^[2]
Юры Канаплёў (2016—2017)
Аляксандар Ладзяны (да 2015 году)

Заўвагі

↑ Клюб быў пазбаўлены 3 пунктаў за ўдзел гульцоў каманды ў дамоўных матчах у сэзонах 2017—2018 гадоў.

Крыніцы

Вонкавыя спасылкі

[1] Клюб быў пазбаўлены 3 пунктаў за ўдзел гульцоў каманды ў дамоўных матчах у сэзонах 2017—2018 гадоў.

[2] Вехтев сменил Акшаева на посту главного тренера «Орши» (рас.)

[3] Акшаев в понедельник возглавит «Оршу» (рас.)

[a]

[1]

[2]