Tuzin.fm

Зьвесткі зь Вікіпэдыі — вольнай энцыкляпэдыі
(Перанакіравана з «Тузін гітоў»)
Перайсьці да навігацыі Перайсьці да пошуку
Тузін Гітоў
URL www.tuzinfm.by
Слоган Слушны музычны партал
Alexa рэйтынг 6013 (2015; у Беларусі)
Камэрцыйны? не
Тып СМІ
Рэгістрацыя ёсьць: не абавязкова, задарма
Даступныя мовы беларуская
Уладальнік Анатоль Лазар[1]
Аўтар Сяргей Будкін
Пачатак працы 12 кастрычніка 2003 (14 гадоў таму)
Бягучы стан дзейны

«Тузін Гітоў» (Tuzin.fm, Tuzinfm.by) — прыватнае некамэрцыйнае беларускамоўнае сеціўнае выданьне, заснаванае ў 2003 годзе для асьвятленьня музычнай творчасьці ў Беларусі. Ставіць у якасьці задачаў: прасоўваньне музыкі, створанай у Беларусі; заахвочваньне да праслухоўваньня беларускіх твораў як мага большую аўдыторыю. Ініцыюе і рэалізуе музычныя праекты ды выступае інфармацыйным партнэрам самых значных падзеяў на беларускай незалежнай сцэне. Самастойна вызначае сваю інфармацыйную палітыку, характар і зьмест інфармацыі, рэклямы, аўдыё і відэа-матэрыялаў. На 2009 год меў больш за 50 тыс. штомесячных наведнікаў, якія спампоўвалі больш за 80 тыс. песьняў[2].

Гісторыя[рэдагаваць | рэдагаваць крыніцу]

Сайт распачаў дзейнасьць 12 кастрычніка 2003 году. У 2004 г. сумесна зь Беларускім калегіюмам выдаў кнігу «Залатыя дыскі беларускага рок-н-ролу» з апісаньнем 20 музычных альбомаў 1970—1990-х гадоў[3].

Зь 2004 г. выпускае радыёперадачу свайго гіт-параду пад назовам «Радыё Тузін», якую вядзе саліст гурта «Палац» Алег Хаменка. Ад пачатку перадача выходзіла на Радыё «Рокс» (Менск), з 2005 г. — на Радыё «Менск», з 2006 г. — на Радыё «Рацыя» (Беласток). У 2005—2011 гг. штогод выпускаў складанку з 12 песьняў-пераможцаў свайго сеціўнага гіт-параду пад назовам «Прэм’ер Тузін» (2005, 2006, 2007, 2008, 2009, 2011). У 2005—2007 гадах браў удзел у ладжаньні цырымоніі ўзнагароджаньня найлепшых музыкаў краіны «Рок-каранацыя». 16 сакавіка 2006 году ў Вільні (Летува) правёў канцэрт «Рок-рэвалюцыя» з удзелам гурта N.R.M. 3 лістапада 2007 году зладзіў у менскім касьцёле сьв. Сымона і Алены канцэрт памяці паэта Анатоля Сыса для збору сродкаў на помнік[4]. У 2007 г. разам з выдавецтвам Volia Music выдаў складанку «Песьні свабоды». 31 жніўня 2008 году аднавіў у Менску пасьля 12-гадовага перапынку музычны фэстываль «Рок па вакацыях». 23 траўня 2009 году на лётнішчы Баравая (Менскі раён) браў удзел у фэстывалі «Bela Music», які ладзіла Міністэрства культуры Рэспублікі Беларусь.

У 2009 і 2011 гг. разам з кампаніяй «Будзьма беларусамі!» выдаў музычныя кружэлкі «Тузін. Перазагрузка» і «Будзьма! Тузін. Перазагрузка-2» зь перакладзенымі на беларускую мову песьнямі іншамоўных выканаўцаў. У 2011—2012 гг. ладзіў акустычныя канцэрты «Тузін. Unplugged» з удзелам беларускіх рок-выканаўцаў. У 2012—2013 гг. правёў шэраг канцэртаў «Жывы Тузін». У 2012 г. сумесна з радыё «Рацыя» (Беласток) выдаў аўдыёкнігу Сяргея Вітушкі «Дзінь-дзілінь: пара гуляць у казкі». У 2012—2013 гг. супольна з Падляскай опэрай і філярмоніяй падрыхтаваў дыск музычнай агучкі клясыкі беларускага нямога кіно «Тузін. Немаўля». У чэрвені 2014 г. разам з праваабарончым цэнтрам «Вясна» выпусьціў складанку песьняў «Апошні золак»[5]. Таксама ў 2014 г. супольна з фондам «Вяртаньне» правёў конкурс маладых выканаўцаў «Засьпявай.by».

Крыніцы[рэдагаваць | рэдагаваць крыніцу]

  1. ^ Tuzin.fm // W3bin, 2012 г. Праверана 1 сьнежня 2014 г.
  2. ^ «Тузін Гітоў» выдаў лепшыя песьні 2009 // Экспэрты.by, 24 сьнежня 2009 г. Праверана 1 сьнежня 2014 г.
  3. ^ Сяргей Будкін, Максім Жбанкоў, Павал Сьвярдлоў. Залатыя дыскі беларускага рок-н-ролу // Kamunikat.org, 2015 г. Праверана 13 лістапада 2015 г.
  4. ^ Канцэрт памяці Анатоля Сыса // СтудФармат, 25 кастрычніка 2007 г. Праверана 13 лістапада 2015 г.
  5. ^ Музычны праект супраць смяротнага пакараньня «Апошні золак» // Tut.by, 17 чэрвеня 2014 г. Праверана 13 лістапада 2015 г.

Вонкавыя крыніцы[рэдагаваць | рэдагаваць крыніцу]