Стромкі Бераг

Рака Сьвіслач у раёне Губэрнатарскага саду. Удалечыні пачынаецца прадмесьце Стромкі Бераг

Стро́мкі (Круты́) Бе́раг, прадмесьце Стромкі Бераг — гістарычны раён Менску, разьмешчаны ў паўднёва-ўсходняй частцы места, на поўдзень ад Губэрнатарскага саду.

На захадзе ад Стромкага Берага месьцяцца Кашары, на паўночным захадзе — цэнтральны раён Новае Места, на паўночным усходзе — Даўгабродзкае прадмесьце, на поўдні — Архірэйская Слабодка.

Гісторыя

У пачатку XX ст. Стромкі Бераг ўваходзіў ў трэцюю паліцэйскую частку места. Праз прадмесьце праходзілі Шпітальная (цяпер Фрунзэ), Архірэйская (Пуліхава, Новазагарадная, Іванаўская , Старазагарадная (Азгура), Саламяная, Сьлясарная, Правіянцкая (Захарава) вуліцы.

Старыя адрасы

• Шпітальная, 37. Вайсковы лязарэт. Дзейнічаў з 1840 року. У 1910 року налічваў 200 ложкаў. У 1914 року ператвораны ў вайсковы шпіталь. Будынак захаваўся (перабудаваны), стаіць на рагу цяперашніх вуліц Фрунзэ і Першамайскай.
• Шпітальная, 39. Менская вайсковая мукамольня і хлебапякарня. Пабудаваная ў 1887 року. Першае значнае прадпрыемства ў месьце з паравым рухавіком. Пабудова ўцалела, знаходзіцца на рагу вуліц Першамайскай і Фрунзэ (корпус Менскага халадзільнага камбінату №1).

Сучаснасьць

Назва прадмесьця нідзе не ўжываецца.

Літаратура

• Шыбека З.В., Шыбека С.Ф. Мінск: Старонкі жыцця дарэв. горада/ Пер. з рускай мовы М.Віжа; Прадмова С.М. Станюты. — Мн.: Полымя, 1994. — 341 с. [1] асобн. арк. карт.: іл. ISBN 5-345-00613-X.
• Памяць: Гіст.-дакум. хроніка Мінска. У 4 кн. Кн. 1-я. — Мн.: БЕЛТА, П15 2001. — 576 с.: іл. ISBN 985-6302-33-1.
• Іван Сацукевіч. Тапанімія вуліцы і плошчаў Менска ў ХІХ — пачатку ХХ стст. // «Беларускі калегіюм», 4 чэрвеня 2008.
• Гісторыя Мінска. 1-е выданне. Мінск. БелЭн. 2006. — 696 с. ISBN 985-11-0344-6.