EPAM Systems

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку
EPAM Systems
Effective Programming for America logo.svg
Тып Публічная кампанія
Лістынг на біржы NYSE: EPAM
Дэвіз Excellence in Software Engineering
Заснаваная 23 сьнежня 1993 (25 гадоў таму)[1]
Заснавальнікі Аркадзь Добкін, Леа Лознэр
Краіна ЗША
Разьмяшчэньне Ньютаўн, Пэнсыльванія, ЗША
Ключавыя фігуры Аркадзь Добкін, прэзыдэнт і старшыня рады дырэктараў
Галіна Праграмнае забесьпячэньне
Абарачэньне Green Arrow Up Darker.svg$730 млн (2014)
Апэрацыйны прыбытак Green Arrow Up Darker.svg86,2 млн (2014)
Чысты прыбытак Green Arrow Up Darker.svg$68,6 млн (2014)
Лік супрацоўнікаў 11 500 чалавек (2014)

«EPAM Systems» (бел. Эпам сыстэмз) — найбуйнейшы вытворца заказнога праграмнага забесьпячэньня у Цэнтральнай і Ўсходняй Эўропе, першы рэзыдэнт Парку высокіх тэхналёгіяў Беларусі[2].

Гісторыя[рэдагаваць | рэдагаваць крыніцу]

Кампанія паўстала ў 1993 годзе ў Прынстане (Нью-Джэрзі, ЗША). Заснавалі яе Аркадзь Добкін, які эміграваў у ЗША ў 1991 годзе, і ягоны аднаклясьнік Леа Лознэр зь Менску. Сьпярша кампанія называлася «EPAm» па скарачэньні ад анг. «Effective Programming for America». Пазьней, па выхадзе кампаніі на замежныя рынкі, яе назва трансфармавалася ў сучасную «EPAM Systems».

У 1995 г. найбольшай дамовай стаўся заказ апраграмаваньня кіраваньня збытам(en) і таварняй(en) для амэрыканскага падразьдзяленьня швайцарскага вытворцы абутку «Балі»(en). У 1996 г. другім значным пакупніком стаўся амэрыканскі вытворца побытавых тавараў «Колгейт-Палмаліў» (Нью-Ёрк), які замовіў апраграмаваньне кіраваньня збытам для сваіх падразьдзяленьняў у Эўропе і Лацінскай Амэрыцы. У 1997 г. нямецкі вытворца апраграмаваньня «САП»(en) (ням. Systemanalyse und Programmentwicklung — Сыстэмны аналіз і распрацоўка праграмаў; Вальдорф, акруга Карльсруэ, зямля Бадэн-Вюртэмбэрг) упершыню замовіў аўтсорсінг распрацоўкі дастасаваньняў для прадпрыемстваў(en). У 1998 г. адчынілася сядзіба ў Маскве (Расея). У 2000 г. пачалася распрацоўка парталаў электроннага гандлю(en) і мабільных дастасаваньняў для прадпрыемстваў аўтамабілебудаваньня, сувязі і аховы здароўя ў Паўночнай Амэрыцы, Эўропе і Японіі.

У 2001 г. пастаянным замоўніком(en) стаўся «Майкрасофт» (Рэдманд, штат Вашынгтон, ЗША). Адчыніліся сядзібы ў Горадні і Гомелі. Зьявіўся аддзел забесьпячэньня якасьці. 18 сьнежня 2002 г. назоў прадпрыемства зьмянілі на сучасны. У 2003 г. адчыніліся ўнутраны цэнтар падрыхтоўкі ў Менску і сядзіба ў Магілёве.

16 сакавіка 2004 г. абвясьцілі пра набыцьцё вугорскага вытворцы «Фатом тэхналёгія» (вуг. Fathom Technology; Будапэшт). У выніку лік супрацоўнікаў узрос з 600 да 760. Адчыніліся 1-ая сумесная навучальная працоўня ў Беларускім дзяржаўным унівэрсытэце інфарматыкі і радыёэлектронікі (БДУІР) і сядзіба ў Саратаве (Расея). Пры канцы году лік супрацоўнікаў прадпрыемства перавысіў тысячу чалавек. У 2005 г. выручка склала звыш $30 млн. Закончылася стварэньне першай у Расеі сеціўнай крамы авіяквіткоў для авіякампаніі «Сібір»(en) (Об, Новасыбірская вобласьць). Адчыніліся прадстаўніцтва ў Лёндане (Ангельшчына) і асяродкі распрацоўкі ў Кіеве (Украіне) і Санкт-Пецярбургу (Расея).

19 верасьня 2006 г. абвясьцілі пра набыцьцё расейскага вытворцы заказнога апраграмаваньня «VDI» (анг. Vested Development, Inc — карпарацыя «Закладзенае разьвіцьцё»; Масква). У выніку лік супрацоўнікаў узрос з 1800 да звыш 2000. Адчыніліся асяродак падтрымкі кліентаў у Франкфурце-на-Майне (Дармштацкая акруга, зямля Гэсэн, Нямеччына). У 2007 г. абарачэньне перавысіла $100 млн. Дадалося 18 сумесных навучальных працоўняў у ВНУ Беларусі, Расеі і Ўкраіны. Адчыніліся сядзібы ў Берасьці, расейскім Іжэўску (Удмуртыя, Прыволская фэдэральная акруга), украінскіх Віньніцы, Львове і Харкаве. Лік супрацоўнікаў прадпрыемства перавысіў 3500 чалавек.

19 сакавіка 2008 г. расейскія банк «Рэнэсанс Капітал»(en) (Масква) і фонд «Да Вінчы Капітал» (Масква), вугорская кампанія «Euroventures» (бел. Эўрапачынаньні; Будапэшт) набылі за $50 млн мінарытарны пакет акцыяў прадпрыемства. 3 красавіка адбылося набыцьцё амэрыканскгаа вытворцы біржавога апраграмаваньня «B2Bits» (Лорэнсвіл, акруга Мэрсэр(en), шт. Нью-Джэрзі). Адчынілася прадстаўніцтва ў Стакгольме (Швэцыя). Лік супрацоўнікаў перасягнуў 5000 чалавек. У 2010 г. выручка перавысіла $200 млн. Прыбытак склаў $33,2 млн. Пастаяннымі пакупнікамі сталіся ангельскі банк «Баркліз Капітал»(en) (Лёндан) і нямецкі вытворца прамысловых і побытавых прыладаў «Бош»(en) (Гэрлінгэн, Штутгарцкая акруга(en), зямля Бадэн-Вюртэмбэрг). 8 красавіка скончылі стварэньне інфармацыйнай сыстэмы кіраваньня для сотавага апэратара «Вэлком». 21 верасьня абвясьцілі пра набыцьцё амэрыканскага вытворцы фінансавага апраграмаваньня «Instant Information» (бел. Імгненныя зьвесткі; Нью-Ёрк).

У 2011 г. выручка склала $334,5 млн. Прыбытак дасягнуў $44,4 млн. Актывы вырасьлі да $235,6 млн. 17 траўня адчынілася сядзіба ў Кракаве (Польшча). Лік супрацоўнікаў дасягнуў 6968 чалавек. У 2012 г. выручка склала $334,5 млн. Прыбытак дасягнуў $54,5 млн. Актывы склалі $350,8 млн. Лік супрацоўнікаў узрос да 8495 чалавек[3]. 24 студзеня кампанія абвясьціла пра першаснае разьмяшчэньне акцыяў на Нью-Ёрскай фондавай біржы[4]. 14 лютага адчынілася сумесная навучальная працоўня ў Беларускім дзяржаўным эканамічным унівэрсытэце (БДЭУ). Пастаянным пакупніком стаўся амэрыканскі вытворца апраграмаваньня «Оракл»(en) (Рэдвуд, акруга Сан-Матэо(en), шт. Каліфорнія). 23 траўня набылі канадзкага вытворцу апраграмаваньня «Соткорп» (анг. Thoughtcorp; Таронта, правінцыя Антарыё). 18 сьнежня абвясьцілі пра набыцьцё амэрыканскага вытворцы вяшчальнага апраграмаваньня «Empathy Lab» (бел. Працоўня спагады; Коншэхокэн, акруга Мантгомэры(en), шт. Пэнсыльванія). Лік супрацоўнікаў пераўзышоў 8000 чалавек.

У 2013 г. ужо налічвалася звыш 9000 супрацоўнікаў. Адчыніліся сумесныя навучальныя працоўні ў БДУ, Гарадзенскім дзяржаўным унівэрсытэце і Менскім дзяржаўным лінгвістычным унівэрсытэце (МДЛУ).

Дзейнасьць[рэдагаваць | рэдагаваць крыніцу]

Кампанія мае 29 офісаў у 9 краінах сьвету, у тым ліку ва ўсіх абласных цэнтрах Беларусі[5]. Колькасьць супрацоўнікаў кампаніі ў Беларусі складае больш як 2,5 тысячы чалавек[6]. Кліенты EPAM Systems — прадстаўнікі розных сэгмэнтаў гаспадаркі з болей як 30 краінаў сьвету (у тым ліку зь Беларусі й СНД). Сярод іх — Microsoft, SAP, Coca-Cola, «Інтэрфакс», А1, Мазырскі нафтаперапрацоўчы завод ды інш.

Паслугі
  • ІТ-кансалтынг
  • Распрацоўка праграмнага забесьпячэньня
  • Інтэграцыя дастасаваньняў
  • Партаваньне і міграцыя дастасаваньняў
  • Тэставаньне праграмнага забесьпячэньня
  • Суправаджэньне праграмнага забесьпячэньня
  • Паслугі цэнтраў кампэтэнцыяў[7].

Узнагароды[рэдагаваць | рэдагаваць крыніцу]

У 2006 г. кампанія увайшла ў сьпіс «100 сусьветных аўтсорсэраў», #79 у разьдзеле «Узыходныя зоркі аўтсорсынгу на глябальнай арэне»[8].

Паводле зьвестак рэйтынгавае агенцыі «Эксперт РА», па выніках 2009 году «EPAM Systems» заняла 19-е месца ў агульным сьпісе найбуйнейшых ІТ-кампаніяў і 17-е — у сьпісе найбуйнейшых кансалтынгавых кампаніяў Расеі[9].

Крыніцы і заўвагі[рэдагаваць | рэдагаваць крыніцу]

  1. ^ EPAM 20 - Message from Arkadiy Dobkin, CEO and President // EPAM Press, 24 сьнежня 2013 г. Праверана 9 красавіка 2015 г.
  2. ^ Резиденты Парка высоких технологий(рас.) Рэзыдэнты. Парк высокіх тэхналёгіяўПраверана 21 лістапада 2010 г.
  3. ^ Ягор Марціновіч. IT-кампанія EPAM Systems дасягнула рэкордных прыбыткаў // Наша Ніва, 1 сакавіка 2013 г. Праверана 9 красавіка 2015 г.
  4. ^ Аляксей Арэшка. Кампанія EPAM Systems аб'явіла пра пачатак IPO // БелаПАН, 1 лютага 2012 г. Праверана 9 красавіка 2015 г.
  5. ^ EPAM на карте мира(рас.) О компании. EPAM Systems. Праверана 21 лістапада 2010 г.
  6. ^ Аляксандр Лукашэнка: «Беларусь можа ганарыцца дасягненнямі ў медыцыне, ІТ-тэхналогіях і касмічнай сферы» // «Звязда» №227 (26835) 19 лістапада 2010
  7. ^ Услуги(рас.). EPAM Systems. Праверана 21 лістапада 2010 г.
  8. ^ The 100 Global Outsourcing 2006, Издание международной ассоциации аутсорсеров-профессионалов (IAOP)
  9. ^ Позиции компании в рейтингах крупнейших компаний. EPAM Systems(рас.) Компании. Рэйтынгавая агенцыя «Эксперт РА». Праверана 21 лістапада 2010 г.

Вонкавыя спасылкі[рэдагаваць | рэдагаваць крыніцу]