Ян Юры Флемінг

Ян Юры Флемінг
	Ян Юры Флемінг
	; Герб «Флемінг»
Асабістыя зьвесткі
Нарадзіўся	16 траўня 1699; Івен[d], Пярэдняя Памеранія-Грайфсвальд[d], Мэкленбург — Пярэдняя Памяранія, Нямецкая Дэмакратычная Рэспубліка;
Памёр	12 сьнежня 1771; Варшава, Рэч Паспалітая;
Пахаваны	Базыліка сьвятога Крыжа;
Род	Флемінгі
Бацькі	Генрых Гайн Флемінг; Даратэя Соф’я Флемінг
Жонка	Антаніна з Чартарыйскіх ; Канстанцыя з Чартарыйскіх ; Кацярына дэ Сэгрыс дэ Бількен
Дзеці	да 2-га шлюбу: Ізабэла
Дзейнасьць	палітык

Ян Юры Дэтлаў Флемінг^[a] (16 траўня 1699 — 12 сьнежня 1771) — дзяржаўны дзяяч Рэчы Паспалітай. Генэрал артылерыі Вялікага Княства Літоўскага (1738—1746), падскарбі вялікі літоўскі (1746—1764), ваявода паморскі (з 1766).

Быў старостам шарашоўскім і берасьцейскім (1752—1759). Кавалер ордэнаў Белага Арла і Сьвятога Станіслава (1765^[1]).

Біяграфія

Прадстаўнік шляхецкага роду Флемінгаў гербу ўласнага, сын Генрыха Гайна, прускага фэльдмаршала, і Даратэі Соф’і. Меў стрыечнага брата Якуба Генрыка, першага міністра Саксоніі.

З 1724 году жыў у Рэчы Паспалітай, камандаваў каралеўскім палком. Падтрымліваў абраньне каралём і вялікім князем Аўгуста Саса. У 1738 годзе стаў генэралам літоўскай артылерыі. Выконваў дыпляматычныя даручэньні ў Саксоніі і Расеі. У 1746 годзе атрымаў урад падскарбія вялікага літоўскага, у 1766 годзе — ваяводы паморскага.

Быў фінансава ўплывовай асобай у Рэспубліцы. Меў зьвязкі з Чартарыйскімі, арыентаваўся на Расею, варагаваў з Каралем Станіславам Радзівілам «Пане Каханку».

3 абраньнем на сталец Станіслава Аўгуста Панятоўскага дачыненьні з дваром пагоршыліся, а стварэньне Скарбовай камісіі Вялікага Княства Літоўскага ў 1764 годзе паклала канец ягонай гаспадарчай усемагутнасьці.

Увесну 1764 году разам з Масальскімі і Агінскімі зладзіў у Вільні антырадзівілаўскую канфэдэрацыю. Варожа ставіўся да Барскай канфэдэрацыі.

У мястэчку Балоткаве каля Берасьця, якое перайменаваў у гонар жонкі ў Цярэспаль, уладкаваў галоўную рэзыдэнцыю з палацам^[2].

13 лютага 1744 годe ажаніўся з князёўнай Антанінай (1728—1746), старэйшай дачкой канцлера вялікага літоўскага Міхала Фрыдэрыка Чартарыйскага (1699—1775) і графіні Элеаноры Монікі Вальдштайн (1710—1792). У 1747 годзе другі раз ажаніўся з князёўнай Канстанцыяй (1729—1749), другой дачкой Міхала Фрыдэрыка Чартарыйскага. У гэтым шлюбе нарадзілася дачка Ізабэла (1746—1835), жонка з 1761 году генэральнага старосты падольскага князя Адама Казімера Чартарыйскага (1734—1823). У трэці раз ажаніўся з Кацярынай дэ Сэгрыс дэ Бількен, у шлюбе зь якой ня меў дзяцей.

Галерэя

Іканаграфія Яна Юрыя Флемінга
Невядомы мастак, XVIII ст.
A. Pesne, XVIII ст.
Страчаны партрэт. Невядомы мастак, 1760-я

У картцы да артыкула прыводзіцца партрэт-мініятура пэндзля невядомага мастака, створаны па 1800 годзе.

Заўвагі

^ Таксама Ян Ежы Дэтлаў Флемінг

Крыніцы

^ Dunin-Wilczyński Z. Order Świętego Stanisława. Warszawa, 2006. S. 178.
^ Казлоў Л. Флемінгі // ВКЛ. Энцыкл. — Мн.: 2005 Т. 2. С. 704.

Літаратура

Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — 788 с. — ISBN 985-11-0378-0

Вонкавыя спасылкі

Ян Юры Флемінг — сховішча мультымэдыйных матэрыялаў

[1] Таксама Ян Ежы Дэтлаў Флемінг

[2] Dunin-Wilczyński Z. Order Świętego Stanisława. Warszawa, 2006. S. 178.

[3] Казлоў Л. Флемінгі // ВКЛ. Энцыкл. — Мн.: 2005 Т. 2. С. 704.

[a]

[1]

[2]