Песьняры

Песьняры лац. Pieśniary
Гады	1969 — цяпер
Краіна	СССР Беларусь
Месца ўтварэньня	Менск, Беларусь
Мова	беларуская расейская
Жанр	фольк-рок
Выдавец	«Мелодия»
Узнагароды і прэміі
pesnyary.by

«Песьняры» на паштовай марцы Беларусі

«Песьняры́» («Песняры́») — вакальна-інструмэнтальны ансамбль пад кіраўніцтвам Уладзімера Мулявіна, створаны ў Менску ў 1969 годзе. Вядомы шырокай аўдыторыі слухачоў па песьнях «Белавеская пушча», «Беларусь», «Вологда» і шматлікіх іншых.

Ансамбль першапачаткова пазыцыянаваўся як фальклёрны. Аснову рэпэртуару складалі апрацаваныя беларускія народныя песьні. Пасьля ў рэпэртуар былі ўключаныя песьні савецкіх кампазытараў, песьні на вершы вядомых паэтаў, такіх, як Янка Купала, Робэрт Бэрнз, Уладзімер Маякоўскі. Ансамблем было пастаўлена 2 вялікія тэатралізаваныя творы (рок-опэры) — «Песнь пра долю» і «Гусьляр».

У 1975 годзе падчас гастроляў у ЗША «Песьняры» пазнаёміліся са сьпеваком Данчыкам. Пасьля сустрэчы ансамбль улучыў у свой рэпэртуар папулярную сярод беларускай дыяспары ЗША і Аўстраліі песьню «Беларусачка». Пагатоў паэт Алесь Ставер напісаў строфы песьні яшчэ ўвесну 1967 году пры вяртаньні ў Менск з выступленьня ў Барысаве (Менская вобласьць). Той самай вясной кампазытар Юры Семяняка паклаў верш на музыку. Улетку 1980 году ў Маскве ансамбль «Песьняры» выконваў песьню на Гульнях 22-й Алімпіяды.

У 1998 годзе ў гурце адбыўся раскол. У цяперашні час існуе каля пяці розных ансамбляў, якія маюць у сваім назове слова «Песьняры» і якія выконваюць песьні легендарнага калектыву, у тым ліку беларускі дзяржаўны ансамбль «Песьняры», «Беларускія песьняры», «Песьняры Леаніда Барткевіча». Анатоль Кашапараў і Леанід Барткевіч, якія сьпявалі разам у «Песьнярах», у 2016 годзе давалі некалькі сумесных канцэртаў у Беларусі.

Дыскаграфія

1971	Ты мне вясною прыснілася	Ты мне вясною прысьнілася
1974	Алеся	Алеся
1977	Перапёлачка	Перапёлачка
1979	Вологда	Волагда
1980	Гусляр	Гусьляр
1982	Зачарованная моя	Мая зачараваная
1984	Через всю войну	Праз усю вайну

Выдыдзены таксама шэраг сынглаў.

Склад

Склад гурту ўвесь час зьмяняўся. Найбольшыя значнымі ўдзельнікамі былі:

• Уладзімер Мулявін (сьпеў, гітара, 1968—2003)
• Валер Мулявін (гітара, 1968—1974)
• Леанід Барткевіч (сьпеў, 1969—1980)
• Анатоль Кашапараў (сьпеў, 1970—1990)
• Валер Дайнэка (сьпеў, 1976—1992)
• Леанід Тышко (бас-гітара, 1968—1981)
• Уладзіслаў Місевіч (саксафон, жалейка, 1968—1992)
• Аляксандар Дзямешка (бубны, 1968—1988)
• Уладзімер Нікалаеў (клявішныя, 1971—1980)
• Актай Айвазаў
• Вячаслаў Міхновіч
• Марк Шмелькін
• Уладзімер Ткачэнка
• Валер Яшкін
• Анатоль Гілевіч
• Валянцін Бадзьяраў
• Віктар Часлаў Паплаўскі
• Юры Дзянісаў
• Барыс Бэрнштэйн

Літаратура

• Д. П., фота У. Парфянка «ПЕСЬНЯРЫ» // Энцыклапедыя беларускай папулярнай музыкі (бел.) / уклад. Дз. Падбярэзскі і інш. — Мінск: Зміцер Колас, 2008. — С. 231–233. — 368 с. — 2000 ас. — ISBN 978-985-6783-42-8

Вонкавыя спасылкі

Песьняры — сховішча мультымэдыйных матэрыялаў

• БДА Песьняры (рас.)
• Віртуальны музэй ансамбля «Песьняры» (рас.)
• Сайт пра ВІА Песьняры (рас.)