Агракамбінат Ждановічы

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку

Каардынаты: 53°54′22″ пн. ш. 27°24′59″ у. д. / 53.90611° пн. ш. 27.41639° у. д. / 53.90611; 27.41639

Агракамбінат «Ждановічы»
Тып унітарнае прадпрыемства
Заснаваная 12 студзеня 1959 (60 гадоў таму)
Разьмяшчэньне пасёлак Азярцо (Менскі раён, Беларусь)
Ключавыя фігуры Рыгор Чуйко
Галіна сельская гаспадарка
Прадукцыя гародніна, збожжа, кветкі, малако, мяса
Абарачэньне Red Arrow Down.svg473,344 млрд рублёў (2015 г.; $29,122 млн)[1]
Апэрацыйны прыбытак Red Arrow Down.svg-14,582 млрд рублёў (2015 г.; $-0,897 млн)
Лік супрацоўнікаў 1345 (2015 г.)
Матчына кампанія Выканаўчы камітэт Менскага раёну

Агракамбінат «Ждановічы» — дзяржаўнае сельскагаспадарчае прадпрыемства Беларусі, заснаванае ў студзені 1959 году ў Менскім раёне. На 2017 год вырошчваў гародніну, зерне, кветкі і фрукты, вырабляў малако, мяса і салаты. Зь 2008 году ёсьць найбольшым вытворцам цяплічнай гародніны ў Беларусі. Галаўная сядзіба месьціцца ў Менску па вул. Вышалескага, д. 2 (Фрунзэнскі раён). Аднак юрыдычны адрас мае ў пасёлку Азярцо (Шчомысьліцкі сельсавет, Менскі раён).

Вытворчасьць[рэдагаваць | рэдагаваць крыніцу]

  • Зерне. У 2015 годзе намалацілі звыш 45 000 тонаў. У 2009 г. плошча ворных земляў склала каля 9000 гектараў. Сярэдняя ўраджайнасьць склала 60 цэнтнэраў/га. У асноўным вырошчваецца пшаніца. У 2008 г. агракамбінат «Ждановічы» таксама паставіў броварам Беларусі звыш 2500 тонаў ячменю. У 2005 годзе ўвялі ў дзеяньне новую зернесушылку магутнасьцю да 1000 тонаў за содні.
  • Чмеляводзтва. У 2001 г. стварылі лябараторыю разьвядзеньня чмялёў для круглагодняга апыленьня таматаў. Магутнасьць складае да 1500 пчаліных сем’яў за год. У 2002 г. вырасьцілі 832 пчаліныя сям’і, зь іх 255 выкарысталі на ўласныя патрэбы і 577 прадалі іншым прадпрыемствам.
  • Пладаводзтва. На 2014 г. налічвалася 144 га пладова-ягадных угодзьдзяў пад яблыкі, грушы і ягады. У 2007 г. заклалі пладова-ягадны сад плошчай 14 га.
  • Квашэньні і саленьні. Выраблялі квашаную капусту, мочаныя яблыкі, салёныя агуркі і таматы пад таварным знакам «Шынкароў», салаты «Гаспадынька».
  • Малако. На 2017 год на 10 малочна-таварных фэрмах (МТФ) налічвалася звыш 6500 галоваў буйнога рагатага быдла, ад якога штодня атрымлівалі 33 тоны малака. За 2016 г. сярэдні ўдой перавысіў 6,5 тоны малака з каровы. Найбольшая МТФ месьцілася ў вёсцы Табары (Хацежынскі сельсавет, Менскі раён), дзе было 470 кароваў. У 2006 г. дойны статак агракамбіната складаў 2200 кароваў, якія далі 15 % малака ў Менскім раёне. Таварны знак «Менская губэрня».
  • Кветкі. У 2006—2009 гадах збудавалі 14 га цяпліцаў пад кветкі. У менскім мікрараёне Кунцаўшчына і вёсцы Багатырова (Менскі раён) вырошчвалі 12 гатункаў ружаў розных адценьняў, якія прадавалі пад таварным знакам «Кветкавая майстэрня».
  • Гародніна: агуркі, буракі, капуста, морква, перцы, таматы і цыбуля рэпчатая. На 2017 г. цяплічны камбінат займаў 27 га, на якіх пераважна вырошчвалі агуркі і таматы. У 2008 годзе ўпершыню сабралі ўраджай баклажанаў і перцаў. Агульны ўраджай склаў 11 т У верасьні 2007 году ў вёсцы Багатырова цяпліцы плошчай 14 га. У 2009 г. прыбудавалі цеплаэлектрастанцыю (ЦЭС) магутнасьцю 3 мэгаваты. Кропельны паліў выкарыстоўваюць для гародніны адкрытага і закрытага грунту. У 2008 г. вырасьцілі 11 тыс. тонаў цяплічнай гародніны, зь іх 7 тыс. тонаў таматаў. У адкрытым грунце вырасьцілі звыш 6 тыс. тонаў гародніны. На 2017 год гароднінасховішча магло зьмяшчаць да 10,8 тыс. тонаў. У 2008 годзе ў сховішча на 2,8 тыс. тонаў пераабсталявалі цэх. Штогадовая закладка ў сховішчы складала: 5 тыс. тонаў капусты, 4 тыс. тонаў морквы, каля 4000 тонаў бульбы і 500 тонаў буракоў. Таварны знак «Гароднінная сталіца».
  • Сьвінагадоўля. У 2013 годзе скончылі будаўніцтва сьвінакомплекса ў вёсцы Плашава (Койданаўскі раён) на 24 тыс. галоваў. Вытворчыя памяшканьні падзялілі на 5 участкаў: асемяненьня (індывідуальнае ўтрыманьне цягам 30 дзён), супарасных сьвінаматак (утрыманьне цягам 77 дзён), апаросу і пэрыяду падсмоктваньня ў парасятаў (30-34 дні), дагадоўваньня парасятаў-адабранцаў (7—30 кг), адкорму (30—110 кг)[2].

Мінуўшчына[рэдагаваць | рэдагаваць крыніцу]

У студзені 1959 году ў заходняй частцы менскага прадмесьця Ждановічы (Менскі раён) стварылі саўгасп «Ждановічы» на аснове 3-х гаспадарак. Ад пачатку прадпрыемства засяродзілася на вытворчасьці малака і вырошчваньні гародніны. У 1975 г. саўгасп пераўтварылі ў «Ждановіцкі цяплічны камбінат», які заклаў у вёсцы Кунцаўшчына (Менскі раён) цяпліцы плошчай 13 гектараў. З 1990 году камбінат пашырыў сваю дзейнасьць на чмеляводзтва і садаводзтва. У 1996 г. саўгасп пераўтварылі ў аграгандлёвую фірму «Ждановічы». У 2000 годзе — ва ўнітарнае прадпрыемства «Агракамбінат "Ждановічы"». У 2005 г. да агракамбіната «Ждановічы» далучылі саўгасп імя Фрунзэ (вёска Фрунзэ, Койданаўскі раён). У выніку надоі ў 200 кароваў на мясцовай малочна-таварнай фэрме (МТФ) вырасьлі з 4000 да 6000 літраў малака ў сярэднім з каровы за 2011 год. У 2012 г. пачалі ўводзіць новую МТФ на 600 кароваў з трыма робатамі замест даярак[3].

У 2006 і 2009 гадах агракамбінат «Ждановічы» пабудаваў побач зь вёскай Багатырова (Шчомысьліцкі сельсавет) 2 новыя цяплічныя комплексы плошчай па 7 га кожны для вырошчваньня таматаў. Сэзон у іх доўжыўся ад часу пасеву да сярэдзіны лістапада наступнага году. У цяпліцах карані расьлінаў мацавалі ў кантэйнэрах зь мінэральнай ватай, да якой пастаянна падавалі сілкавальную рашчыну шляхам кропельнага паліву. У іншых цяпліцах вырошчвалі агуркі, баклажаны і перцы. За 2011 г. у цяпліцах вырасьцілі звыш 15 680 тонаў гародніны, што складала каля 8 кг на кожнага менчука. Цяплічная гародніна склала 48,8 % ў агульным вале вытворчасьці агракамбіната «Ждановічы». Удзельная вага прадпрыемства ў валавай вытворчасьці цяплічнай гародніны ў Беларусі склала 15,7 %, у Менскай вобласьці — 34,6 %. Сярэдняя ўраджайнасьць гародніны ў агракамбінаце склала 60,4 кг/м², што перавышала сярэдні па краіне паказьнік на 16 кг. На ўчастках са штучным электрычным дасьвечваньнем ураджайнасьць у больш як 1,4 разу перавышала сярэднюю па прадпрыемстве. На 2012 г. агракамбінат «Ждановічы» меў найбольшую ў Беларусі цяплічную гаспадарку плошчай 26 га і найбольшыя ўраджаі[3].

За 2011 г. сярэдні ўдой малака на карову склаў 6514 кіляграмаў. Агулам надалі каля 14700 тонаў малака, зь якога 96 % збылі клясай «экстра» і вышэйшым гатункам. На 1 студзеня 2012 г. налічвалася 5446 галоваў буйной рагатай жывёлы, зь іх 2250 галоваў (41 %) складаў малочны статак. Таксама агракамбінат «Ждановічы» ўлучаў сад плошчай 350 га, зь іх 91 га (26 %) пад ягаднікамі. Сад заклалі ў 2000-я гады. У ім пераважалі беларускія гатункі дрэваў, устойлівыя да грыбковых хваробаў (асабліва паршы). У 2011 г. рэнтабэльнасьць сада склала 81 %. На 2012 г. у садзе налічвалася каля 330 000 маладых дрэваў[3].

На 2012 г. прадпрыемства адмыслоўвалася на вырошчваньні збожжа, гародніны адкрытага і закрытага грунту, бульбы і цукровых буракоў, на вытворчасьці малака і мяса буйной рагатай жывёлы, на атрыманьні садавіны. Увесну 2012 г. збожжа пасеялі на плошчы 1940 гектараў. Бульбай занялі 250 га, тады як у 2011 годзе 200 га. Пад цукровыя буракі адвялі 717 га замест леташніх 600 га. Пасевы кукурузы пашырылі да 1340 га замест 1050 га ў 2011 годзе. На вырошчваньне зерня адпусьцілі 400 га. Азімыя культуры займалі 3700 га. На 2012 г. агракамбінат «Ждановічы» меў адзіную ў Беларусі лябараторыю разьвядзеньня чмялёў, якія апылялі таматы ў цяпліцах. У вёсцы Багатырова пачалі будаўніцтва цяпліцаў на больш як 8 млн ружаў за год. У лістападзе 2012 году ў вёсцы Плашава (Койданаўскі раён) здалі сьвінакомплекс на 24 тыс. галоваў. Сьвінаматак прывезьлі з Даніі[3].

Кіраўнікі[рэдагаваць | рэдагаваць крыніцу]

Крыніцы[рэдагаваць | рэдагаваць крыніцу]

Вонкавыя спасылкі[рэдагаваць | рэдагаваць крыніцу]