Выслоўі Саламонавы (Скарына)
| Выслоўі Саламонавы | |
 Гравюра «Суд Саламона» з «Выслоўяў». Выданьне Францішка Скарыны. 1517 | |
| Аўтар: | Францішак Скарына |
|---|---|
| Мова арыгіналу: | беларуская рэдакцыя царкоўнаславянскай мовы[1] |
| Публікацыя: | 6 кастрычніка 1517 |
| Колькасьць старонак: | 48 аркушаў |
Выслоўі Саламонавы («Книги еже словуть притчи Соломона царя Израилева сына Давыдова, он же былъ царем въ Ерусалиме») — праскае выданьне Скарыны, якое выйшла ў сьвет 6 кастрычніка 1517 году.
Зьмест кнігі
[рэдагаваць | рэдагаваць крыніцу]На тытульным аркушы зьмешчана гравюра і пашыраная назва кнігі («Зуполъне выложены на рускій языкъ докторомъ Францискомъ Скориною с Полоцка»), а на адвароце-4 аркушы — «Предисловие в притчи премудрага Саломона царя Израилева», у якім Скарына разважае пра мудрасьць гэтага біблейскага аўтара, дае тлумачэньне яго імя («Саломон еже ест мирный или спокойный, понеже был мир и покой по вся времена царства его»). Далей паведамляецца пра пісьменьніцкую дзейнасьць Саламона, які быў аўтарам кніг Выслоўяў, Эклезіяст і Песьні Песьняў. У прамове коратка аналізуюцца дзьве апошнія кнігі і больш падрабязна першая. Скарына высока ацэньвае кнігу Прытчаў, лічыць, што яна патрэбна для «чести всякому человеку, мудрому и безумному, богатому и вбогому, младому и старому, наболей тым, они же хотять имети добрые обычае и познати мудрость и науку». На 4 аркушы даецца анатацыя, у якой раскрываецца зьмест кнігі і колькасьць разьдзелаў. На 4-47 аркушах выдадзены тэкст усіх 31 разьдзелаў кнігі Прытчаў, на апошнім 48-м аркушы — кароткае пасьляслоўе.
Друкарскія асаблівасьці выданьня
[рэдагаваць | рэдагаваць крыніцу]Кніга выдадзена на царкоўна-славянскай мове беларускай рэдакцыі. Фармат выданьня — у чвэрць аркуша, аб’ём — 48 аркушаў, якія сабраны ў 6 сшыткаў. Набор выкананы праскім шрыфтам Скарыны — у 10 радкоў вышынёй 75 мм Сыгнатура адсутнічае. Фаліяцыя зьмешчана на верхнім баку аркуша ўверсе справа. Выданьне ўпрыгожана 2 аднолькавымі ілюстрацыямі «Суд Саламона», 2 віньеткамі і 34 ініцыяламі. Віньеткі акаймоўваюць адварот першага аркуша, на ім пачынаецца прамова. Канцоўка завяршае анатацыю. Ініцыялы зьмешчаны ў пачатку разьдзелаў, прадмовы і пасьляслоўя.
Захавалася 14 асобнікаў выданьня, зь іх 7 поўныя.
Крыніцы
[рэдагаваць | рэдагаваць крыніцу]- ^ Мова выданняў Францыска Скарыны / А. М. Булыка, А. І. Жураўскі, У. М. Свяжынскі. — Мн.: Наука і тэхніка, 1990. ISBN 5-343-00447-4 С. 210
Літаратура
[рэдагаваць | рэдагаваць крыніцу]- Францыск Скарына і яго час: Энцыкл. давед./ Беларус. Сав. Энцыклапедыя; Рэдкал. І. П. Шамякін (гал. рэд.) і інш. — Мн.: БелСЭ, 1988. — 608 с.: іл. ISBN 5-85700-003-3
Вонкавыя спасылкі
[рэдагаваць | рэдагаваць крыніцу]
Выслоўі Саламонавы (Скарына) — сховішча мультымэдыйных матэрыялаў