ПАОК Тэсалёнікі

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку
ПАОК
PAOK FC.svg
Поўная назва ΠΑΕ ΠΑΟΚ
Заснаваны 20 красавіка 1926
Горад Тэсалёнікі, Грэцыя
Стадыён Тумба
Умяшчальнасьць: 28 703
Прэзыдэнт Іван Савідзі
Кіраўнік Іван Савідзі
Галоўны трэнэр Рэзван Лучэску
Чэмпіянат Супэрліга
 · 2020—2021 2 месца
https://www.paokfc.gr/

ПАОК (па-грэцку: Π.Α.Ο.Κ.) — грэцкі футбольны клюб з гораду Тэсалёнікаў. Заснаваны ў 1926 годзе. Двухразовы чэмпіён Грэцыі, шасьціразовы ўладальнік Кубка Грэцыі. Паводле апошніх апытаньняў і дасьледаваньняў, ПАОК ёсьць адным зь вядучых айчынных клюбаў, які найбольш шырока падтрымліваецца ў Паўночнае Грэцыі і мае трэцюю паводле велічыні колькасьць прыхільнікаў у краіне[1][2][3][4]. Паводле дасьледаваньня гішпанскае газэты «Marca», якое было праведзенае ў жніўні 2018 году, паведамляецца, што ПАОК ёсьць самым папулярным грэцкім футбольным клюбам ў сацыяльных сетках[5][6][7].

ПАОК быў заснаваны ў 1926 годзе грэцкімі перасяленцамі з Канстантынопалю, пасьля грэка-турэцкага абмену насельніцтвам. Хатнім стадыёнам з 1960-х гадоў зьяўляецца арэна «Тумба». Афіцыйным спонсарам футбольнага клюбу выступае кампанія DEPA, якая займаецца разьмеркаваньнем прыроднага газу ў Грэцыі. Клюбная назва, а таксама эмблема клюбу, якая ўяўляе сабой выяву дзьвюхгаловага арла бізантыйскага стылю з прыбранымі крыламі, ушаноўваюць памяць людзей і мясьцінаў, пераважна Канстантынопалю, якія калісьці належалі да Бізантыйскае імпэрыі[8][9].

Каманда некалькі разоў выступала ў Лізе Эўропы, але ніколі не дасягала групавога этапу Лігі чэмпіёнаў. Найлепшым выступам у эўрапейскіх спаборніцтвах ёсьць выступ у сэзоне 1973-1974 гадоў, калі ПАОК дайшоў да чвэрцьфіналу Кубка ўладальнікаў кубкаў. ПАОК ёсьць адзіным грэцкім клюбам, які ў эўрапейскіх спаборніцтвах мае на сваім рахунку перамог больш чым паразаў. 16 верасьня 1999 году ПАОК перамог у Тбілісі мясцовы «Лякаматыў» зь лікам 7:0, што зьяўляецца самай буйной перамогаў грэцкіх клюбаў у спаборніцтвах пад эгідай УЭФА[10].

Гісторыя[рэдагаваць | рэдагаваць крыніцу]

ПАОК у 1926 годзе.

ПАОК зьяўляецца найстарэйшым падразьдзяленьнем спартовага клюбу ПАОК, які зьяўляецца спадчыньнікам клюбу «Гэрмэс» (грэц. Ερμής), якая была сфармавана ў 1877 годзе ў грэцкай камуне Пэра, у адным з раёнаў Стамбулу[11]. Аднак пасьля сканчэньня грэка-турэцкай вайны й абмену насельніцтвам паміж краінамі, большасьць гульцоў была вымушаная эміграваць у Грэцыю. Многія з тых, хто пераехаў на новую радзіму пасяліліся ў Тэсалёніках, дзе яны заснавалі клюб ПАОК, аднак першапачаткова клюб атрымаў назву АЕК у 1925 годзе. Частка гульцоў зьехала з Канстантынопалю ў Атэны, дзе эмігрантамі быў сфармаваны атэнскі клюб АЕК. Стварэньнем клюбу афіцыйна лічыцца 20 красавіка 1926 году, калі кіраўніцтва клюбу атрымала адпаведныя дакумэнты, аднак трэніроўкі каманда пачала яшчэ раней.

Пасьля двух месяцаў падрыхтоўкі каманды клюб правёў таварыскія гульні зь іншымі клюбамі Тэсалёнікаў. Гэтак 26 ліпеня 1925 году ПАОК правёў матч супраць клюбу «Іракліс», які скончыўся перамогай навастворанай каманды зь лікам 2:1. Праз два тыдні ПАОК трываў паразу ад «Арысу» зь лікам 5:2.

У сэзоне 1926—1927 гадоў ПАОК узяў удзел у другой лізе чэмпіянату Асацыяцыі футбольных клюбаў Македоніі. Першы афіцыйны матч клюбу адбыўся 12 сьнежня 1926 году супраць клюбу «Нэа-Генэа Калямарыя», у якой тэсалёніскі клюб атрымаў перамогу зь лікам 3:1. Не зважаючы на тое, што паводле вынікаў ПАОК фінішаваў першым ў другім дывізіёне, аргкамітэт чэмпіянату палічыў, што ПАОК быць дапушчаны да першай лігі мясцовага чэмпіянату толькі калі клюб здолее атрымаць перамогі ў матчах супраць уміх клюбаў першай лігі. У рэшце рэшт ПАОК здабыў усе чатыры перамогі ў матчах супраць «Тэрмаікосу» зь лікам 4:1, «Арысу» зь лікам 2:1, «Атлясу Іпадромію» дь лікам 1:0 і «Іраклісу» зь лікам 1:0. У 1927—1928 гадох ПАОК упершыню ўдзельнічаў у першай лізе чэмпіянату Асацыяцыі футбольных клюбаў Македоніі[12].

Першы прафэсійны кантракт клюб падпісаў 5 верасьня 1928 году з францускім футбалістам Раймонам Эт’енам, які меў габрэйскае паходжаньне. Заробак легіянэра складаў 4 тысячы драхмаў у месяц. У сакавіку 1929 году тэсалёніскі АЕК быў распушчаны й іхныя чальцы ўступілі ў ПАОК. Пасьля гэтага ПАОК зьмяніў сваю эмблему, дадаўшы дзьвюхгаловага арла як сымбал бізантыйскае й канстантынопальскае спадчыны клюбу. ПАОК таксама набыў спартовыя аб’екты AEKу, разьмешчаныя каля плошчы Сынтрывані, побач з Фондам дзіцячай спадчыны, дзе сёньня месьціцца тэалягічны факультэт Арыстотэльскага ўнівэрсытэту ў Тэсалёніках.

У сэзоне 1930—1931 гадоў ПАОК дэбютаваў у чэмпіянаце Грэцыі, правёўшы свой першы матч 1 лютага 1931 году супраць пірэйскага «Алімпіякосу» ў гасьцёх, дзе трывалі паразу зь лікам 3:1. Сэзон клюб скончыў на 5-м месцы. Першым замежным трэнэрам у гісторыі каманды быў аўстрыец Рудольф Гаснэр, які працаваў у клюбе ў сэзоне 1931—1932 гадоў[13]. 5 чэрвеня 1932 году стадыён «Сынтрывані» быў урачыста адкрыты перамогай над клюбам «Іракліс» зь лікам 3:2. Новы стадыён стаў хатняй арэнай ПАОКу на працягу наступных 27 гадоў[14][15].

У 1937 годзе ПАОК здабыў свой першы тытул, атрымаўшы перамогу ў чэмпіянаце Асацыяцыі футбольных клюбаў Македоніі. У тым жа сэзоне ў чэмпіянаце Грэцыі клюб фінішаваў на другім месцы. 28 траўня 1939 году ПАОК упершыню выйшаў у фінал Кубка Грэцыі, але ў вырашальным матчы трываў паразу ад атэнскага АЕКу зь лікам 2:1 на стадыёне «Апосталяс Нікаляідыс» у грэцкае сталіцы[16]. У наступным сэзоне ПАОК атрымаў перамогу ў чэмпіянаце Паўночнае Грэцыі й выйшаў у фінал чэмпіянату Грэцыі, дзе зноўку саступіў клюбу АЕК[17].

Заўзятары[рэдагаваць | рэдагаваць крыніцу]

Брама 4 ёсьць сэктарам, дзе месьцяцца на матчах прыхільнікі клюбу. Як правіла, яны падтрымліваюць усе каманды клюбу ПАОК і носяць адзеньне ў традыцыйных чорна-белых колерах. Заўзятары ў цэлым традыцыйна падтрымліваюць добрыя адносіны з заўзятарамі сэрбскага клюбу «Партызан», а таксама заўзятарамі крыцкага клюбу ОФІ. Сяброўства з ОФІ падтрымліваецца штогадовым абменам квіткоў і заўсёды выдатнай атмасфэрай на матчах паміж клюбамі.

Склад[рэдагаваць | рэдагаваць крыніцу]

Актуальны на 8 верасьня 2021 году
Пазыцыя Імя Год нараджэньня
2 Сьцяг Бразыліі Аб Радрыгу 1992
4 Сьцяг Ісьляндыі Аб Свэрыр Інгасан 1993
5 Сьцяг Каба-Вэрдэ Аб Фэрнанду Варэла 1987
6 Сьцяг Альбаніі Аб Энэа Мігай 1998
7 Сьцяг Марока ПА Амар Эль-Кадуры 1990
8 Сьцяг Бразыліі ПА Дуглас Аўгусту 1997
9 Сьцяг Польшчы Нап Караль Сьвідэрскі 1997
10 Сьцяг Аўстрыі Нап Томас Мург 1994
13 Сьцяг Бразыліі Аб Лукас Тэйлар 1995
14 Сьцяг Сэрбіі Нап Андрыя Жыўкавіч 1996
15 Сьцяг Гішпаніі Аб Хасэ Крэспа 1987
16 Сьцяг Бразыліі Аб Сыдклей (ар. Дынама К.) 1993
18 Сьцяг Партугаліі Нап Нэлсан Алівэйра 1991
19 Сьцяг Грэцыі Аб Леўтэрыс Лірацыс 2000
20 Сьцяг Партугаліі Аб Віейрыньня (капітан) 1986
Пазыцыя Імя Год нараджэньня
21 Сьцяг Сурынаму ПА Дыега Бісэсвар 1988
22 Сьцяг Аўстрыі ПА Штэфан Шваб 1990
23 Сьцяг Японіі ПА Сіндзі Кагава 1989
27 Сьцяг Славеніі ПА Ясьмін Курціч (ар. Парма) 1989
28 Сьцяг Румыніі Нап Аляксандру Мітрыцэ (ар. Нью-Ёрк Сіці) 1995
31 Сьцяг Грэцыі Бр Аляксандрас Пасхалякіс 1989
44 Сьцяг Нігерыі ПА Андэрсан Эсыці 1994
47 Сьцяг Ангельшчыны Нап Чуба Акпом (ар. Мідлзбра) 1995
49 Сьцяг Грэцыі Аб Яніс Міхайлідыс 2000
51 Сьцяг Грэцыі ПА Тэохарыс Цынгарас 2000
64 Сьцяг Грэцыі Бр Хрыстас Таліхманідыс 2001
65 Сьцяг Грэцыі ПА Яніс Канстантэліяс 2003
70 Сьцяг Грэцыі Нап Ёргас Куцыяс 2004
88 Сьцяг Сэрбіі Бр Жыўка Жыўкавіч 1989

Крыніцы[рэдагаваць | рэдагаваць крыніцу]

Вонкавыя спасылкі[рэдагаваць | рэдагаваць крыніцу]