Алег Бябенін
Алег Бябенін | |
| Род дзейнасьці | журналіст |
|---|---|
| Дата нараджэньня | 14 чэрвеня 1974 |
| Месца нараджэньня | Кастрама, РСФСР, СССР |
| Дата сьмерці | 3 верасьня 2010 (36 гадоў) |
| Месца сьмерці | Пярхурава, Менская вобласьць, Беларусь |
| Прычына сьмерці | павешаньне[d] |
| Месца пахаваньня | |
| Месца вучобы | |
| Занятак | журналіст, праваабаронец |
| Месца працы | |
| Сайт | charter97.org |
Алег Мікалаевіч Бябенін (14 чэрвеня 1974 г., Кастрама, РСФСР — 3 верасьня 2010 г., в. Пярхурава, Койданаўскі раён, Менская вобласьць, Беларусь) — беларускі журналіст, рэдактар сайту «Хартыя’97», які памёр пры нявысьветленых абставінах.
Біяграфія
[рэдагаваць | рэдагаваць крыніцу]Нарадзіўся ў сям’і вайсковага пракурора. Скончыў факультэт журналістыкі БДУ.
Пасьля заканчэньня ўнівэрсытэту працаваў у «Белорусской деловой газете», потым — намесьнікам галоўнага рэдактара[1] у навастворанай газэце «Имя». У 1998 годзе стварыў сайт «Хартыя'97», якім кіраваў да сваёй сьмерці.
Цела Алега Бябеніна было знойдзена ў пятлі 3 верасьня 2010 году ў яго загарадным доме ў вёсцы Пярхурава Дзяржынскага раёну Менскай вобласьці. Пахаваны на Ўсходніх могілках Менску. У Алега Бябеніна засталіся жонка й два сыны.
Афіцыйная вэрсія сьмерці
[рэдагаваць | рэдагаваць крыніцу]На месца здарэньня выехала апэратыўна-сьледчая група Дзяржынскага РАУС і работнікі пракуратуры Дзяржынскага раёну. Пры аглядзе дома яны знайшлі дзьве пустыя бутэлькі з-пад сьпіртнога напою «Беларускі бальзам». Сьлядоў барацьбы й зьнешніх пашкоджаньняў на трупе не было выяўлена.
Праверку абставін сьмерці журналіста праводзіла пракуратура Менскай вобласьці. Тэрмін праверкі некалькі разоў працягвалі, але ў выніку ўзбуджаць крымінальную справу па факце сьмерці адмовіліся, спыніўшыся на вэрсіі самагубства. Сьмерць выклікала буйны скандал і шырокае абмеркаваньне ў СМІ[2].
Экспэрты АБСЕ, якіх беларускі бок запрашаў для расьсьледаваньня, «…на падставе доказаў і даступнай для іх інфармацыі… прыйшлі да высновы, што няма прычын думаць, што Бябеніна павесілі пасьля сьмерці», — гаварылася ў паведамленьні АБСЕ. У той жа час ў ім адзначалася, што АБСЕ прасілі забясьпечыць «тэхнічную ацэнку, а не поўнае расьсьледаваньне гэтай сьмерці». Эксгумацыі цела не праводзілася.
Альтэрнатыўныя вэрсіі
[рэдагаваць | рэдагаваць крыніцу]Многія калегі й сябры Бябеніна зь вэрсіяй самагубства катэгарычна не пагадзіліся й дагэтуль лічаць, што чакаць аб’ектыўнага расьсьледаваньня пры ўладзе Аляксандра Лукашэнкі няма сэнсу. «Алег не пакінуў пасьля сябе ніякай запіскі. Сябры і калегі журналіста, якія былі на месцы здарэньня, заяўляюць пра наяўнасьць на яго целе сьлядоў гвалту», — нагадвае сайт «Хартыя-97».
Журналісты падкрэсьліваюць, што Бябенін уваходзіў у каманду аднаго з галоўных канкурэнтаў Лукашэнкі на выбарах 19 сьнежня 2010 году — лідэра грамадзянскай кампаніі «Эўрапейская Беларусь» Андрэя Саньнікава, каманда якога пасьля выбараў падверглася жорсткаму перасьледу й пакараньням. Андрэй Саньнікаў лічыць, што супраць асноўнай вэрсіі кажа тое, як паводзіў сябе Алег Бябенін напярэдадні: ён быў поўны плянаў, нядаўна вярнуўся з адпачынку ў Грэцыі, паводзіў сябе, як звычайна.
Шэраг прадстаўнікоў уплывовых міжнародных арганізацыяў заклікалі беларускія ўлады правесьці «ўсебаковае, у поўным аб’ёме і празрыстае» расьсьледаваньне сьмерці Алега Бябеніна.
Беларуская асацыяцыя журналістаў у сувязі са сьмерцю Алега Бябеніна накіравала адмысловыя лісты генэральнаму пракурору Беларусі Рыгору Васілевічу й міністру ўнутраных справаў Анатолю Куляшову.
Крыніцы
[рэдагаваць | рэдагаваць крыніцу]- ^ Сьвятлана Барысенка Бывай, Алег // Зьвязда : Газэта. — 7 верасьня 2010. — № 174 (26782). — С. 4. — ISSN 1990-763x.
- ^ http://charter97.org/be/news/2010/12/3/34342/
Вонкавыя спасылкі
[рэдагаваць | рэдагаваць крыніцу]- Вянок памяці: Алег Бябенін
- Забойства? Кіраўнік сайта charter97.org знойдзены ў пятлі
- Экспэрты АБСЕ: Бябенін скончыў жыцьцё самагубствам
- Сьмерць Алега Бябеніна — самазабойства пад пытаньнем
- Санников: «Я не верю в самоубийство Олега Бебенина»(недаступная спасылка)
- Бебенин. Хроника последних часов жизни(недаступная спасылка)
- Дэталі, якія супярэчаць афіцыйнай вэрсіі сьмерці Алега Бябеніна
- Кто затянул петлю на шее Олега Бебенина?
 |
Гэта — накід артыкула пра біяграфію асобы. Вы можаце дапамагчы Вікіпэдыі, пашырыўшы яго. |