Перайсьці да зьместу

Мужчынская зборная Паўночнай Македоніі па футболе

Зьвесткі зь Вікіпэдыі — вольнай энцыкляпэдыі
Паўночная Македонія
Лягатып
Фэдэрацыя Футбольная фэдэрацыя Македоніі[d]
Канфэдэрацыя УЭФА
Капітан Стэфан Рыстоўскі[d]
Найбольш гульняў Горан Пандзеў Edit this on Wikidata (122)
Найлепшы бамбардзір Горан Пандзеў Edit this on Wikidata (38)
Першая гульня
Славенія 1:4 Македонія
(Крань, Славенія; 13 кастрычніка 1993)
Самая буйная перамога
Ліхтэнштайн 1:11 Македонія
(Эшэн, Ліхтэнштайн; 9 лістапада 1996)
Самая буйная параза
Ангельшчына 7:0 Паўночная Македонія
(Манчэстэр, Ангельшчына; 19 чэрвеня 2023)
Чэмпіянат Эўропы
Удзел 1 (упершыню: 2020)
Дасягненьні групавы этап (2020)
Асноўная форма
Рэзэрвовая форма

Мужчы́нская збо́рная Паўно́чнай Македо́ніі па футбо́ле — нацыянальная каманда, якая прадстаўляе Паўночную Македонію на міжнародных футбольных турнірах і ў таварыскіх матчах. Арганізацыяй, які ажыцьцяўляе кантроль і кіраваньне зборнай, ёсьць Футбольная фэдэрацыя Македоніі.

Гісторыя

[рэдагаваць | рэдагаваць код]

Свой першы афіцыйны міжнародны матч зборная Паўночнай Македоніі згуляла 13 кастрычніка 1993 году. Гэта была таварыская сустрэча, якая скончылася перамогай каманды над зборнай Славеніі зь лікам 4:1[1]. У 1994 годзе Футбольная фэдэрацыя Македоніі стала сябрам ФІФА і УЭФА пасьля рэфэрэндуму аб незалежнасьці і распаду югаслаўскай фэдэральнай зборнай.

Зборная Паўночнай Македоніі ў 2014 годзе.

Свой першы адборачны турнір каманда ўсчала ў верасьні 1995 году, які мусіў вызначыць зборныя да чэмпіянату Эўропы 1996 году. Паўночнамакедонскія футбалісты пачалі зь нічыі 1:1 з зборнай Даніі, але на фінальную частку ня трапілі. Наступныя гады зборная не магла адолець бар’ер, каб трапіць на буйны турнір, але часам здараліся нечаканыя перамогі, як то ў адборы да чэмпіянату сьвету 1998 году зь лікам 3:2 была пераможаная зборная Ірляндыі. У кваліфікацыі да чэмпіянату Эўропы 2004 году футбалісты з балканаў згулялі ўнічыю з зборнай Ангельшчыны 2:2, прычым матч ладзіўся на брытанскай зямлі ў месьце Саўтгэмптане[2]. 9 кастрычніка 2004 году каманда здолела зьдзівіць, згуляўшы 2:2 з зборнай Нідэрляндаў у Скоп’і перад 17 тысячамі гледачоў на гарадзкім стадыёне[3], але ўжо праз чатыры дні каманда зазнала паразу 0:1 на выезьдзе ад зборнай Андоры[4]. 7 кастрычніка 2006 году балканцы зноў згулялі ўнічыю з ангельцамі на іхным полі ў Манчэстэры, а 17 лістапада 2007 году паўночнамакедонскія футбалісты перамаглі зборную Харватыі зь лікам 2:0.

У кваліфікацыі да чэмпіянату Эўропы 2020 году зборная фінішавала на трэцім радку сваёй групы, прапусьціўшы наперад зборныя Польшчы і Аўстрыі. Аднак дзякуючы таму, што Паўночная Македонія раней была першай у сваёй групе ў Лізе нацыяў, каманда ўпершыню ў гісторыі атрымала мажлівасьць згуляць у кваліфікацыйным плэй-оф і была прызначаная лёсаваньнем да матчаў супраць зборнай Косава. У паўфінале плэй-оф кваліфікацыі да Эўра-2020 зборная Паўночнай Македоніі перамагла каманду Косава 2:1 удома. Затым 13 лістапада ў Тбілісі ў фінале плэй-оф паўночнамакедонцы сустрэліся з зборнай Грузіі ды перамаглі зь лікам 1:0[5], трапіўшы на фінальны турнір. На самім турніры каманда зазнала тры паразы ў матчах супраць зборных Аўстрыі, Украіны і Нідэрляндаў. Паўночнамакедонцы былі блізкія таксама да трапленьня на чэмпіянат сьвету, які адбыўся ў 2022 годзе ў Катары. Тады зборная зноў трапіла ў плэй-оф, дзе ў паўфінале сэнсацыйна выбіла зборную Італіі[6], але ў вырашальнай сустрэчы прагулялі зборнай Партугаліі зь лікам 0:2[7].

Чэмпіянаты Эўропы

[рэдагаваць | рэдагаваць код]
  • 1996 — не прайшла кваліфікацыю
  • 2000 — не прайшла кваліфікацыю
  • 2004 — не прайшла кваліфікацыю
  • 2008 — не прайшла кваліфікацыю
  • 2012 — не прайшла кваліфікацыю
  • 2016 — не прайшла кваліфікацыю
  • 2020 — групавы этап
  • 2024 — не прайшла кваліфікацыю

Крыніцы

[рэдагаваць | рэдагаваць код]
  1. ↑ SVN vs. MKD match report. Macedonian Football. Праверана 02.06.2016 г. Архіўная копія ад 24.06.2016 г.
  2. ↑ ENG vs. MKD match report (2002). Macedonian Football. Праверана 02.06.2016 г. Архіўная копія ад 24.06.2016 г.
  3. ↑ MKD vs. NED match report. Macedonian Football. Праверана 02.06.2016 г. Архіўная копія ад 24.06.2016 г.
  4. ↑ AND& vs. MKD match report. Macedonian Football. Праверана 02.06.2016 г. Архіўная копія ад 24.06.2016 г.
  5. ↑ North Macedonia reach Euro 2020 // 12.11.2020 г.
  6. ↑ Italy 0–1 North Macedonia // BBC, 24.03.2022 г. Архіўная копія ад 24.03.2022 г.
  7. ↑ Bruno Fernandes strikes send Portugal past North Macedonia to World Cup. The Guardian (29.03.2022). Праверана 30.03.2022 г. Архіўная копія ад 29.03.2022 г.

Вонкавыя спасылкі

[рэдагаваць | рэдагаваць код]
Атрымана з «https://be-tarask.wikipedia.org/w/index.php?title=Мужчынская_зборная_Паўночнай_Македоніі_па_футболе&oldid=2687665»