Даўгоўдавічы
Даўгоўдавічы, Доўгаўды — княскі род у Вялікім Княстве Літоўскім.
Прозьвішча[рэдагаваць | рэдагаваць крыніцу]
- Асноўны артыкул: Даўгоўд
Паводле менскага дасьледніка Алёхны Дайліды, які разьвівае германскую (перадусім усходнегерманскую) этымалёгію імёнаў літоўскіх князёў і баяраў, імя Даўгоўд, ад якога ўтварылася прозьвішча роду, складаецца з фармантаў -даў-, які паходзіць ад гоцкага daug 'годна', бургундзкага daugjis 'здольны, годны' або старагерманскага dulg- 'моцны, трывалы', dolg 'дужаньне', і -гаўд- (-гоўд-), які паходзіць ад гоцкага goþs 'добры, годны', godei 'дабро, годнасьць, цнота', або ад гоцкага і бургундзкага auds 'багацьце, спор'[1]. Такім парадкам, імя Даўгоўд азначае «годны да спору» і адпавядае старажытнаму германскаму імю Dagaud[2].
Гісторыя[рэдагаваць | рэдагаваць крыніцу]
Няма зьвестак пра заснавальніка роду Даўгоўда. Мяркуецца, што ён быў у сваяцкіх дачыненьнях зь вялікім князем літоўскім Гедзімінам, або паходзіў з папярэдняй велікакняскай дынастыі.
- Юры Даўгоўдавіч (? — па 1401), у 1401 годзе прынёс прысягу, што па сьмерці вялікага князя Вітаўта ня будзе мець іншага пана, толькі караля польскага Уладзіслава ІІ (Ягайлу).
- Глеб Даўгоўдавіч (? — па 1450), сын Юрыя Даўгоўдавіча (?). Быў сьведкам пры складаньні ўмовы з крыжакамі (1436 год). Падпісаў як сьведка пацьвярджальны прывілей Вільні (1441 год). Каля 1450 году атрымаў у валоданьне ад вялікага князя Казімера людзей.
- Федзька Даўгоўдавіч (? — да 1451), сын Юрыя Даўгоўдавіча (?). У сярэдзіне XV ст. валодаў маёнткамі на мяжы Слонімскага і Наваградзкага паветаў: Ельна, Жалязьніца, Крутава, а таксама лукомскімі сёламі Халопенічы, Астапкавічы, Ілітовічы. Федзька памёр без нашчадкаў, па чым гэтыя маёнткі перайшлі да вялікага князя Казімера, а той у 1451 годзе перадаў іх у валоданьне канцлеру Міхаілу Кезгайлу.
Зь сярэдзіны XV ст. зьвесткі пра род Даўгоўдавічаў зьнікаюць[3].
Крыніцы[рэдагаваць | рэдагаваць крыніцу]
- ^ Дайліда А. Пачаткі Вялікага княства Літоўскага: ад стварэння да Крэўскай уніі / Рэц. С. Тарасаў. — Менск, 2019. С. 17.
- ^ Дайліда А. Пачаткі Вялікага княства Літоўскага: ад стварэння да Крэўскай уніі / Рэц. С. Тарасаў. — Менск, 2019. С. 22.
- ^ Пазднякоў В. Даўгоўдавічы // ВКЛ. Энцыкл. — Мн.: 2010 Т. 3. С. 197.
Літаратура[рэдагаваць | рэдагаваць крыніцу]
- Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2010. — Т. 3: Дадатак А — Я. — 690 с. — ISBN 978-985-11-0487-7
- Дайліда А. Пачаткі Вялікага княства Літоўскага: ад стварэння да Крэўскай уніі / Рэц. С. Тарасаў. Аўтарскае выданне. — Менск, 2019. — 459 с. — (сьціслая вэрсія кнігі: Вытокі Вялікае Літвы. — Менск, 2021. — 89 с.)
Вонкавыя спасылкі[рэдагаваць | рэдагаваць крыніцу]
- Валеры Пазднякоў, Даўгоўдавічы, Электронная энцыкляпэдыя «Вялікае Княства Літоўскае»