Бабуліна крынка
Каардынаты: 53°51′56″ пн. ш. 30°22′42″ у. д. / 53.86556° пн. ш. 30.37833° у. д.
 | |
| Тып | адкрытае акцыянэрнае таварыства |
|---|---|
| Заснаваная | 1979 (45 гадоў таму) |
| Краіна | Беларусь |
| Разьмяшчэньне | Магілёў |
| Адрас | Кастрычніцкі раён, вул. Паўлава, д. 3 |
| Ключавыя фігуры | Скітаў Генадзь (генэральны дырэктар), Арцём Зубель (намесьнік у камэрцыі)[1] |
| Галіна | прамысловасьць |
| Прадукцыя | ёгурт, кефір, малако, марозіва, масла, масьлянка, пражанка, сьмятана, сыр і тварог |
| Абарачэньне |  460 млрд. рублёў (2010; 153,6 млн. $)
|
| Чысты прыбытак |  31,4 млрд руб (2010; 10,5 млн $)
|
| Лік супрацоўнікаў | 2200 (2012) |
«Бабуліна крынка»[2] — малочнае прадпрыемства Беларусі, заснаванае ў 1979 годзе ў якасьці «Магілёўскага малочнага камбінату».
На 2022 год выпускала вырабы пад 4-ма ўласнымі таварнымі знакамі: «Бабуліна крынка»[3], «Вясёлыя ўнучаняты»[4], «Сьвежыя навіны»[5] і «Эка Грэка»[6]. Пераважна выраблялі вяршкі і ёгурт, кефір і малако, малочную сыроватку і малочныя кактэйлі, марозіва і масла, масьлянку і пражанку, сьмятану і сухое малако, сыр і тварог, тварожную масу і тварожныя сыркі.
Вырабы
[рэдагаваць | рэдагаваць крыніцу]На 2022 год «Бабуліна крынка» вырабляла:
- стэрэлізаванае, топленае і ўльтрапастэрызаванае малако тлустасьцю ад 1,5 да 3,8 %, у тым ліку для немаўлятаў і ўзбагачанае інулінам, кальцам і вітамінам Д3;
- абястлушчаныя і пастэрызаваныя малочную сыроватку і масьлянку;
- малочныя кактэйлі тлустасьцю 0,5 % з ванілінам, трускаўкамі і шакалядам;
- пастэрызаваныя і стэрылізаваныя вяршкі тлустасьцю 10 %[7];
- кефір ад абястлушчанага і тлустасьцю ад 1,5 % да 3,6 %, у тым ліку ўзбагачаны біфідабактэрыямі і з кропам;
- пражанку тлустасьцю 3 %[8];
- тварог ад абястлушчанага і тлустасьцю ад 1-го да 10 %, у тым ліку зярнёны і зь вяршкамі ды ягадамі;
- тварожную масу тлустасьцю 4,5 % з курагой, разынкамі і чарнасьлівам;
- глазураваныя тварожныя сыркі тлустасьцю ад 23-х да 26 %, у тым ліку з ванілінам, згушчаным малаком, какавай, какосавай габлюшкай, макам і мармэлядам[9];
- сьмятану тлустасьцю ад 15 да 26 %[10];
- салодка-несалёнае масла тлустасьцю ад 62,5 да 84 %, у тым ліку шакаляднае[11];
- ёгурты тлустасьцю ад 1-го да 7 %, у тым ліку ванілінам і ягадамі, а таксама з павышаным утрыманьнем бялку і грэцкія[12];
- марозіва плямбір тлустасьцю 15 % у вафельных кубках, на палачцы і ў пакетах, у тым ліку з ванілінам, какавай і крэм-бруле[13];
- абястлушчанае і цэльнае (26 % тлустасьці) сухое малако, а таксама сухую малочную сыроватку тлустасьцю 1,5 %[14];
- вострыя і вэнджаныя, мяккія і паўцьвёрдыя, плаўленыя і сычужныя сыры тлустасьцю ад 20 да 50 % у сухім рэчыве, у тым ліку мацарэла і пармэзан, з водарам топленага малака ды валоскага гарэха, а таксама салодкі і з грыбамі[15].
Мінуўшчына
[рэдагаваць | рэдагаваць крыніцу]У 1979 року ў эксплюатацыю быў уведзены Магілёўскі малочны камбінат. 28 верасьня 1995 году Магілёўскі абласны выканаўчы камітэт ухваліў Рашэньне № 15-6 аб пераўтварэньні прадпрыемства ў адкрытае акцыянэрнае таварыства ў працэсе прыватызацыі. 14 сакавіка 2006 року рашэньнем Магілёўскага гарадзкога выканаўчага камітэту ААТ «Магілёўскі малочны камбінат» быў перарэгістраваны ў ААТ «Бабулін гладыш» і зарэгістраваны ў Адзіным дзяржаўным рэгістры юрыдычных асоб і індывідуальных прадпрымальнікаў.
У 2001 року ў склад прадпрыемства ўвайшлі ААТ «Круглянскі масларобчы завод» і ААТ «Краснапольскі завод замяняльнікаў цэласнага малака». У красавіку 2005-га былі далучаныя ААТ «Кіраўскі масларобчы завод», ААТ «Бялыніцкі сыраробчы завод» і ААТ «Дрыбінскі масларобчы завод», а ў сьнежні 2005 року — ААТ «Крычаўскі масларобчы завод». Урэшце, у канцы 2006 року ў склад «Бабулінага гладышу» ўвайшло ААТ «Касьцюковіцкі малочны завод». У выніку кампанія зьяўляецца найбуйнейшым вытворцам малочнай прадукцыі ў Беларусі. На сьнежань 2011 г. прадпрыемства мела 2200 работнікаў[16].
На 2011 год выраблялі болей за 250 відаў малочнай прадукцыі, якую пастаўлялі на рынкі Беларусі, Расеі, Украіны, Польшчы, Нямеччыны, Францыі, Эгіпту, Пакістану і Філіпінаў. 7 сьнежня 2012 году Агульны сход акцыянэраў ААТ «Бабулін гладыш» ухваліў Рашэньне аб утварэньні холдынгу. 13 сьнежня 2012 году Адміністрацыя Кастрычніцкага раёну Магілёва ўлічыла гэтае рашэньне. У склад холдынгу на правах філіяў увайшлі 14 малаказаводаў: Амсьціслаўскі, Асіпавіцкі, Бабруйскі, Быхаўскі, Глускі, Дрыбінскі, Качэрыцкі, Касьцюковіцкі, Клімавіцкі, Клічаўскі, Краснапольскі, Круглянскі, Крычаўскі і Прапойскі, а таксама 2 вытворчыя цэхі ў Бялынічах (сыры) і Чавусах. Вытворчая магутнасьць прадпрыемства склала 3000 тонаў малака за содні. Сыравінная зона прадпрыемства ахапіла 18 з 21-га раёну Магілёўскай вобласьці[17].
На 2022 год сваю дзейнасьць спынілі 4 заводы прадпрыемства: Касьцюковіцкі, Клічаўскі, Краснапольскі і Крычаўскі[18].
Крыніцы
[рэдагаваць | рэдагаваць крыніцу]- ^ Кантактная інфармацыя // ААТ «Бабуліна крынка», 2022 г. Праверана 7 лютага 2022 г.
- ^ Даты гісторыі: 85 гадоў Віцебскай, Гомельскай, Менскай і Магілёўскай абласьцям // Беларускае тэлеграфнае агенцтва, 12 студзеня 2023 г. Праверана 26 студзеня 2023 г.
- ^ «Бабуліна крынка» // ААТ «Бабуліна крынка», 2022 г. Праверана 7 лютага 2022 г.
- ^ «Вясёлыя ўнучаняты» // ААТ «Бабуліна крынка», 2022 г. Праверана 7 лютага 2022 г.
- ^ «Сьвежыя навіны» // ААТ «Бабуліна крынка», 2022 г. Праверана 7 лютага 2022 г.
- ^ «Эка Грэка» // ААТ «Бабуліна крынка», 2022 г. Праверана 7 лютага 2022 г.
- ^ Малако і малочныя прадукты // ААТ «Бабуліна крынка», 2022 г. Праверана 7 лютага 2022 г.
- ^ Кісламалочныя прадукты // ААТ «Бабуліна крынка», 2022 г. Праверана 7 лютага 2022 г.
- ^ Тварог і тварожныя вырабы // ААТ «Бабуліна крынка», 2022 г. Праверана 7 лютага 2022 г.
- ^ Сьмятана // ААТ «Бабуліна крынка», 2022 г. Праверана 7 лютага 2022 г.
- ^ Масла // ААТ «Бабуліна крынка», 2022 г. Праверана 7 лютага 2022 г.
- ^ Ёгурт // ААТ «Бабуліна крынка», 2022 г. Праверана 7 лютага 2022 г.
- ^ Марозіва // ААТ «Бабуліна крынка», 2022 г. Праверана 7 лютага 2022 г.
- ^ Сухія малочныя прадукты // ААТ «Бабуліна крынка», 2022 г. Праверана 7 лютага 2022 г.
- ^ Сыры // ААТ «Бабуліна крынка», 2022 г. Праверана 7 лютага 2022 г.
- ^ Ілона Іванова. Usеbеlаrusу.bу - ад «Бабулінага гладыша» // Зьвязда : газэта. — 29 сьнежня 2011. — № 249 (27113). — С. 2. — ISSN 1990-763x.
- ^ Прадпрыемства сёньня (рас.) // ААТ «Бабуліна крынка», 2022 г. Праверана 7 лютага 2022 г.
- ^ Інвэстарам // ААТ «Бабуліна крынка», 2022 г. Праверана 7 лютага 2022 г.
Вонкавыя спасылкі
[рэдагаваць | рэдагаваць крыніцу]- Электронны зварот (рас.) // ААТ «Бабуліна крынка», 2022 г. Праверана 7 лютага 2022 г.
- Вольная энцыкляпэдыя Магілёва (рас.)
- УсеБеларусы