Касьцёл Сьвятога Францішка Ксавэрыя і Анёлаў-Ахоўнікаў і калегіюм езуітаў (Магілёў)
![](http://upload.wikimedia.org/wikipedia/commons/thumb/2/22/Mahilo%C5%AD%2C_Teatralny-%C5%A0k%C5%82o%C5%ADskaja._%D0%9C%D0%B0%D0%B3%D1%96%D0%BB%D1%91%D1%9E%2C_%D0%A2%D1%8D%D0%B0%D1%82%D1%80%D0%B0%D0%BB%D1%8C%D0%BD%D1%8B-%D0%A8%D0%BA%D0%BB%D0%BE%D1%9E%D1%81%D0%BA%D0%B0%D1%8F_%281901-17%29.jpg/300px-Mahilo%C5%AD%2C_Teatralny-%C5%A0k%C5%82o%C5%ADskaja._%D0%9C%D0%B0%D0%B3%D1%96%D0%BB%D1%91%D1%9E%2C_%D0%A2%D1%8D%D0%B0%D1%82%D1%80%D0%B0%D0%BB%D1%8C%D0%BD%D1%8B-%D0%A8%D0%BA%D0%BB%D0%BE%D1%9E%D1%81%D0%BA%D0%B0%D1%8F_%281901-17%29.jpg)
Касьцёл Сьвятога Францішка Ксавэрыя і Анёлаў-Ахоўнікаў і калегіюм езуітаў — рымска-каталіцкі кляштарны і адукацыйны комплекс у Магілёве. Дзейнічаў у 2-й палове XVII ст. — 1820 (1833) року. Займаў пляц каля Каралеўскай брамы ў Старым месьце (мясьціна вакол Тэатральнай Плошчы), абмежаваную вуліцамі Ветранай і Шклоўскай.
У склад комплексу ўваходзілі мураваныя касьцёл і калегіюм, за якімі ўздоўж Шклоўскай вуліцы разьмяшчаўся двор, абкружаны мураваным будынкам школы і гаспадарчымі збудаваньнямі[1]. У глыбіні двара знаходзіўся кляштарны сад.
Касьцёл і часткова[2] калегіюм зруйнавалі ў 1950-я рокі. У наш час замест аднаўленьня бажніцы зьявіўся праект будовы на месцы яе падмуркаў (якія захаваліся[3]) офіснага гмаху холдынгу «Сервалюкс»[4][5].
Гісторыя
![](http://upload.wikimedia.org/wikipedia/commons/thumb/6/6b/Mahilo%C5%AD._%D0%9C%D0%B0%D0%B3%D1%96%D0%BB%D1%91%D1%9E_%28J._Pie%C5%A1ka%2C_1800%29_%282%29.jpg/300px-Mahilo%C5%AD._%D0%9C%D0%B0%D0%B3%D1%96%D0%BB%D1%91%D1%9E_%28J._Pie%C5%A1ka%2C_1800%29_%282%29.jpg)
У 1678[6][7][1] року (паводле іншых зьвестак — у 1673[2]) смаленскі канонік і магілёўскі пробашч Я. Здановіч заснаваў езуіцкую рэзыдэнцую, якая адкрылася ў 1680 року. З 1682 року пачала дзейнічаць найніжэйшая школа (у 1732—1738 для яе збудавалі мураванае памяшканьне)[2]. Каля 1684 року зьявілася музычная бурса і канвікт (інтэрнат), з канца XVII ст. дзейнічаў тэатар.
У 1684 року збудавалі мураваную капліцу Сьвятога Францішка Ксавэрыя і Анёлаў-Ахоўнікаў, а ў 1686 року (паводле іншых зьвестак — у 1779[7]) пачалося ўзьвядзеньне мураванага калегіюму[6]. Імёны ягоных архітэктараў-езуітаў: Я. Алендзкі, прафэсар матэматыкі і архітэктуры В. Абранпольскі і інш.
Першы драўляны касьцёл пры рэзыдэнцыі збудавалі ў 1687 року (згарэў у 1708). У 1699 року распачалося будаваньне мураванага касьцёла Анёлаў-Ахоўнікаў, Сьвятога Тадэвуша і Сьвятога Францішка Ксавэрыя (кансэкрацыя сьвятыні адбылася ў 1725[6]). У 1720 року адкрылася аптэка[7], каля 1780 — музэй, дзе выстаўляліся выкапні, матылі, манэты, мэдалі, дзейнічалі фізычны і хімічны кабінэты. У 1799 року рэзыдэнцыю пераўтварылі ў калегіюм з 6 клясаў[2]. Станам на 1820 рок езуіцкая бібліятэка налічвала 5 тысяч кніжак[7]. Магілёўскім езуітам падпарадкоўваліся місіі ў Гомелі, Фашчаўцы, Хальчы, Чачэрску і іншыя. Калегіюму належалі маёнткі Бялянічы, Варатынічы, Галынец, Дабрасьневічы, Дубнікі, Куты, Параеўка, Паўлаўка, Турэц, Цёплае, Хронеў, Ямны і іншыя.[7]
Па скасаваньні ордэна езуітаў (1820) расейскія ўлады зачынілі калегіюм (будынак прыставалі пад вайскова-афіцэрскую школу), а па здушэньні вызвольнага паўстаньня — у 1833 року гвалтоўна перарабілі касьцёл на царкву Маскоўскага патрыярхату. У 1848 року над дахам будынка ўзьвялі несапраўдны шматгранны барабан, які даволі ўдала паўтараў завершаньні вежаў і ўзбагачваў сылюэт сьвятыні[6].
Па Другой Сусьветнай вайне помнік архітэктуры зруйнавалі савецкія ўлады (існуе хібнае меркаваньне[7], што на ягоным месцы ў 1983 року збудавалі 9-павярховы жылы дом[5]).
Архітэктура
![](http://upload.wikimedia.org/wikipedia/commons/thumb/d/da/Mahilo%C5%AD%2C_%C5%A0k%C5%82o%C5%ADskaja-Teatralny._%D0%9C%D0%B0%D0%B3%D1%96%D0%BB%D1%91%D1%9E%2C_%D0%A8%D0%BA%D0%BB%D0%BE%D1%9E%D1%81%D0%BA%D0%B0%D1%8F-%D0%A2%D1%8D%D0%B0%D1%82%D1%80%D0%B0%D0%BB%D1%8C%D0%BD%D1%8B_%281909%29_%282%29.jpg/300px-Mahilo%C5%AD%2C_%C5%A0k%C5%82o%C5%ADskaja-Teatralny._%D0%9C%D0%B0%D0%B3%D1%96%D0%BB%D1%91%D1%9E%2C_%D0%A8%D0%BA%D0%BB%D0%BE%D1%9E%D1%81%D0%BA%D0%B0%D1%8F-%D0%A2%D1%8D%D0%B0%D1%82%D1%80%D0%B0%D0%BB%D1%8C%D0%BD%D1%8B_%281909%29_%282%29.jpg)
Касьцёл
Мураваны касьцёл зьяўляўся творам архітэктуры стылю барока і меў блізкую архітэктоніку да Менскага касьцёла езуітаў[6]. Гэта была 3-нэфавая базыліка з паўкруглай апсідай, да якой далучаліся трапэцападобныя ў пляне закрысьціі. Стылістыка галоўнага фасаду адпавядала пераходнаму этапу ад сталага да позьняга барока: ордэрная плястыка адначасова насычаная і строгая. Ён завяршаўся дзьвюма вежамі (1-ярусныя чацьверыкі[8]) з шмат’яруснымі барокавымі купаламі маляўнічага абрысу. Франтальны фасад дэкаравала ордэрная плястыка: слаёныя пілястры, выгнутыя гзымсы[7].
Меў цыліндрычныя скляпеньні з распалубкамі на падпружных арках[6]. Інтэр’ер упрыгожвалі карынфскія пілястры, сьцены і скляпеньні — размалёўка.
Калегіюм
Будынак калегіюму далучаўся да касьцёла тарцовай сьцяной і ўяўляў 2-павярховы прастакутны ў пляне аб’ём. Гладкія сьцены прарэзвалі прастакутныя аконныя праёмы.
У наш час на падмурках калегіюму стаіць будынак Магілёўскага музэя этнаграфіі. Унутраная сьцяна, якая выходзіць у двор музэю, зьяўляецца аўтэнтычнай сьцяной XVIII ст., колішняй часткаю езуіцкага калегіюму[5].
Крыніцы
- ^ а б Слюнькова И. Монастыри восточной и западной традиций. — М., 2002. С. 349.
- ^ а б в г Валерый Пазднякоў. Таццяна Чарняўская. Магілёўскі езуіцкі калегіум // ВКЛ. Энцыкл. — Мн.: 2005 Т. 2. С. 250.
- ^ У Магілёве ТБМ дамагаецца аднаўлення езуіцкага касцёла Святога Ксаверыя. Радыё Рацыя (13.10.2010). Праверана 22 кастрычніка 2010 г.
- ^ На месцы касцёла Св. Францыска Ксаверыя будзе адміністрацыйны будынак?. Mahilou.org » Таварыства беларускай мовы імя Ф. Скарыны ў Магілёве. Праверана 22 кастрычніка 2010 г.
- ^ а б в П. Левановіч, А. Дзьячкоў (15.10.2010) Няхай жыве касцёл у Магілёве!. Могилевский городской информационно-справочный портал. Праверана 22 кастрычніка 2010 г.
- ^ а б в г д е Габрусь Т. Мураваныя харалы. — Менск, 2001. С. 156.
- ^ а б в г д е ё Кулагін А. Каталіцкія храмы Беларусі. — Менск, 2008. С. 434.
- ^ Тамара Габрусь. Наша «езуіцкае» барока // «Наша Вера» № 1 (15), 2001.
Літаратура
- Габрусь Т. Мураваныя харалы: Сакральная архітэктура беларускага барока. — Менск: «Ураджай», 2001. — 287 с.: іл. ISBN 985-04-0499-X.
- Кулагін А. Каталіцкія храмы Беларусі: Энцыкл. даведнік / А. Кулагін; фатограф А. Дыбоўскі. — 2-е выд. — Менск: БелЭн, 2008. — 488 с.: іл. ISBN 978-985-11-0395-5.
- Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — 788 с. — ISBN 985-11-0378-0
- Тамара Габрусь. Наша «езуіцкае» барока // «Наша Вера» № 1 (15), 2001.
- Слюнькова И. Н. Монастыри восточной и западной традиций: Наследие архитектуры Беларуси / Рос. акад. архитектуры и строит. наук. — М.: Прогресс-Традиция, 2002. — 600 с.: ил. ISBN 5-89826-093-5.