Сяргей Хмара

Сяргей Хмара лац. Siarhiej Chmara
Асабістыя зьвесткі
Нарадзіўся	25 траўня 1905(1905-05-25) Казлоўшчына, Слонімскі павет, Гарадзенская губэрня, Літоўскае генэрал-губэрнатарства, Расейская імпэрыя
Памёр	5 верасьня 1992(1992-09-05) (87 гадоў) Таронта, Канада
Пахаваны	Могілкі Ёрк[d]
Літаратурная дзейнасьць
Род дзейнасьці	паэт

Сяргей Хмара, сапр. Сяргей Сіняк (25 траўня 1905, Казлоўшчына на Дзятлаўшчыне (па іншым дадзеным у Адэса) — 5 верасьня 1992, Канада) — дзеяч нацыянальна-вызваленчага руху ў Заходняй Беларусі і беларускай эміграцыі, журналіст, паэт і празаік.

Жыцьцяпіс

Працаваў настаўнікам у Заходняй Беларусі ў міжваеннай Польшчы. У 1920-я гады сябра Таварыства беларускай школы ў Радашковічах і Вільні, удзельнік Беларускай сялянска-работніцкай грамады. Арыштоўваўся дэфэнзівай у 1927 і 1939 гадах. У 1930 годзе сакратар Беларускага рабоча-сялянскага пасольскага клюбу «Змаганьне» ў Пінску, 1931 годзе — інструктар Галоўнай управы ТБШ у Вільні. У 1937 годзе стварыў на Дзятлаўшчыне нелегальную літаратурную арганізацыю «Маладая ускалось» (пазьней «Баявая ускалось»). Друкаваў вершы ў часопісе «Калосьсе», «Шлях моладзі», у зборніку «Рунь веснаходу» (Вільня, 1928).

Пасьля далучэньня Заходняй Беларусі да БССР з 1940 году супрацоўнік слонімскай раённай газэты «Вольная праца». У канцы 1940 году арыштаваны органамі НКУС.

Падчас 2-й сусьветнай вайны знаходзіўся ў Слоніме, працаваў на мясцовым радыё, быў галоўным рэдактарам у газэце «Слонімскі кур’ер», працаваў у БНС, прымаў удзел у нацыянальным партызанскім руху (беларуская народная партызанка), кіраўнік падпольнай арганізацыі «Беларуская народная грамада». Удзельнік 2-га Усебеларускага кангрэса ў Менску (1944). Зь ліпеня 1944 году ў Нямеччыне, дырэктар Беларускага інфармацыйнага бюро ў Бэрліне. У Бэрліне заснаваў палітычную групу «Двупагоня». Пасьля вайны выдаваў сатырычны часопіс «Маланка» і «Мы з-за Буга» у Гамбургу.

У 1948 або 1949 годзе з Гамбургу пераехаў у Таронта (Канада), кіраўнік сэктару Рады БНР, рэдактар газэты «Беларускі Эмігрант» (пасьля «Беларускі Голас»), якую рэдагаваў да канца жыцьця. Таксама выдаваў літаратурныя і сатырычныя газэеты «Народны Шлях», «Сыгналы», «Маланка». У 1950 годзе заснаваў Беларускую царкву ў Таронта, стварыў Беларускае нацыянальнае аб’яднаньне. Быў ініцыятарам стварэньня Канадзкага этнічнага клюбу журналістаў і пісьменьнікаў «Баявая Ускалось»; ад сьнежня 1976 году быў яго першым старшынём. Быў прыхільнікам стварэньня «трэцяй сілы» сярод беларускай эміграцыі.

Пахаваны на могілках Ёрк у Таронта.

Глядзіце таксама

• Беларуская народная партызанка

Бібліяграфія

• Жураўліным шляхам: Зборнік вершаў. — Вільня, 1939;
• Аб багах Крывіцкіх сказы: Зборнік вершаў. — 2-е выд. — Таронта, 1986;
• Рабінавы хмель. Выбраныя творы. — Мн.: Кнігазбор, 2009. — 212 с..

Літаратура

• АГ. Выйшла кніга выбраных твораў Сяргея Хмары — nn.by, 00:48, 06.05.2009
• Ліс А. Літаратура Заходняй Беларусі // Гісторыя беларускай літаратуры ХХ стагоддзя. — Мн., 1999. Т. 2;
• Маракоў Л.У. Рэпрэсаваныя літаратары, навукоўцы, работнікі асветы, грамадскія і культурныя дзеячы Беларусі, 1794—1991. Энц. даведнік. У 10 т. Т. 2. — Мн:, 2003. ISBN 985-6374-04-9.;
• Пяткевіч А. М. Хмара Сяргей // Людзі культуры з Гродзеншчыны: даведнік. — Гродна, 2000. — С. 310—311;
• Хмара С. Кароткія даныя аб сабе // «Запісы» № 24, 1999;
• Чыгрын С. Больш ніколі ў жыцці яны не сустрэліся // «Газета Слонімская» № 608, 28 студз. 2009;
• Чэмер А. Сяргей Хмара. — Вільнюс, 1998;
• Хмара Сяргей // Юрэвіч Л. Літаратурны рух на эміграцыі / Лявон Юрэвіч; Рэд. А. Гардзіенка. — Мн.: [Беларускі Гістарычны Агляд], 2002. — 242,[1] с.: іл. — (Бібліятэка часопіса «Беларускі Гістарычны Агляд». Серыя «Досьледы»; [Вып. 10]). — ISBN 978-5272-10-9.