Дзісенскі Чайлд-Гарольд

Дзісенскі Чайлд-Гарольд
דיסנער טשײַלד האַראָלד
Бэрлін у 1920-х, месца дзеяньня паэмы
Жанр:	сатырычная паэма
Аўтар:	Мойшэ Кульбак
Мова арыгіналу:	ідыш
Год напісаньня:	1933
Публікацыя:	1933
Пераклад на беларускую:	Фрагмэнт перакладу паэмы Ганны Янкуты
Электронная вэрсія

«Дзісенскі Чайлд-Гарольд» (на ідышы: דיסנער טשײַלד האַראָלד‎) — сатырычная паэма Мойшэ Кульбака, напісаная ў 1933 годзе ў Менску. Назва паэмы зьяўляецца адсылкай да вядомай паэмы Джорджа Байрана «Вандроўкі Чайлд-Гарольда(en)».

Паэма была адзіным буйным паэтычным творам менскага пэрыяду творчасьці Мойшэ Кульбака. Дзеяньні паэмы разгортваюцца ў Бэрліне пачатку 1920-х гг., твор мае аўтабіяграфічны характар. Мойшэ Кульбак у паэме падрабязна апісаў свой бэрлінскі пэрыяд жыцьця, у тым ліку працу суфлёрам.

Пераклад

На беларускую мову паэму перакладалі Сяргей Шупа, Ганна Янкута, Лявон Баршчэўскі. Паэма таксама неаднаразова перакладалася на іншыя мовы, у тым ліку на ангельскую. Сяргей Шупа ўзгадваў, што яго ідэя выдаць поўны пераклад паэзіі Мойшэ Кульбака ўзьнікла пасьля параўнаньня перакладаў «Дзісенскага Чайлд-Гарольда»:

	Падыходзіць да канца праца над ужо згаданым Поўным зборам паэзіі. Гэта будзе, як для нашых умоваў, выданьне экспэрымэнтальнае. А ідэя ўзьнікла так. Я параўноўваў між сабой пяць ці шэсьць розных перакладаў паэмы Кульбака “Дзісенскі Чайлд-Гарольд”, зачытваў іх уголас маёй жонцы Весьне (выдавецтва “Вясна” (Прага)) – і мы пагадзіліся, што найбольш дух арыгіналу захаваў нямецкі пераклад. Але нюанс у тым, што гэта быў адзіны пераклад, дзе не была захаваная форма твору – рытм і рыфмы. Астатнія перакладчыкі, імкнучыся заціснуць паэзію Кульбака ў зададзеныя фармальныя рамкі, былі вымушаныя нечым ахвяраваць, нешта выкідаць, нешта дапісваць за аўтара.