Каменка (Чачэрскі раён)

Каменка
Першыя згадкі:	XIX ст.
Вобласьць:	Гомельская
Раён:	Чачэрскі
Сельсавет:	Залескі
Насельніцтва:	176 чал. (2004)
Часавы пас:	UTC+3
Тэлефонны код:	+375 2339
Геаграфічныя каардынаты:	52°56′51″ пн. ш. 31°04′26″ у. д.
Каменка на мапе Беларусі Каменка

Каменка — вёска ў Беларусі, на рацэ Малінка. Уваходзіць у склад Залескага сельсавету Чачэрскага раёну Гомельскай вобласьці. Насельніцтва 176 чал. (2004). Знаходзіцца за 11 км на паўночны ўсход ад места Чачэрск, за 48 км ад чыгуначнай станцыі Буда-Кашалёўская (лінія Гомель — Жлобін), за 76 км ад Гомелю.

Гісторыя

Паводле пісьмовых крыніц вядомая з XIX стагодзьдзя як паселішча ў Пакоцкай воласьці Гомельскага павета Магілёўскай губэрні. З 1832 дзейнічала карчма, з 1880 — хлебазапасная крама. У 1871 жыхары захапілі абшарніцкі лес, пра што граф І. І. Чарнышоў-Круглікаў паведамляў міністру ўнутраных спраў. Паводле перапісу 1897 году дзейнічала школа граматы. У 1909 вёска Каменка Малінская, 619 дзесяцін зямлі, млын.

У 1926 працавалі паштовы пункт, пачатковая школа. З 8 сьнежня 1926 году да 30 сьнежня 1927 году цэнтар Каменскага сельсавету Чачэрскага раёну Гомельскай акругі. У 1930 арганізаваны калгас «Пралетарскі шлях», працаваў паравы млын. У часе Вялікай Айчыннай вайны карнікі забілі 6 жыхароў і вывезьлі 21 жыхара ў Нямеччыну на прымусовыя працы. У 1969 у вёску перасяліліся жыхары пасёлка Чапаева. У складзе саўгаса «Бяляеўскі» (цэнтар — вёска Бяляеўка). Разьмяшчаўся клюб.

Насельніцтва

• XIX стагодзьдзе: 1897 — 67 двароў, 486 жыхароў (паводле перапісу)
• XX стагодзьдзе: 1909 — 88 двароў, 640 жыхароў; 1926 — 143 двары, 840 жыхароў; 1959 — 576 жыхароў (паводле перапісу)
• XXI стагодзьдзе: 2004 — 86 гаспадарак, 176 жыхароў

Літаратура

• Гарады і вёскі Беларусі: Энцыклапедыя. Т. 1, кн. 1. Гомельская вобласць / С.В. Марцэлеў; рэдкал.: Г.П. Пашкоў (гал. рэд.) [і інш.]. — Менск: БелЭн, 2004. — 632 с.: іл. ISBN 985-11-0303-9.