Царква Прачыстай Багародзіцы

Царква Прачыстай Найсьвяцейшай Багародзіцы, Прачысьценская царква — традыцыйная беларуская назва помнікаў праваслаўнай і грэцка-каталіцкай архітэктуры часоў Вялікага Княства Літоўскага. Назва паходзіць ад сьвята Першай Прачыстай. У гістарычных крыніцах сустракаецца некалькі варыянтаў тытула цэркваў: Пречистой, Пречистой Богородицы, Пречистой Святой Богородицы, Пречистенская. У XIX ст. тытулы многіх цэркваў перайначылі на расейскі манер — «Усьпеньня Прасьвятой Багародзіцы», «Сьвята-Ўсьпенская» (рас. Успения Пресвятой Богородицы, Свято-Успенская). Тады ж у Віцебску гістарычную Прачысьценскую гару перайменавалі ва Ўсьпенскую. Тым часам у мове мясцовых жыхароў захоўваліся традыцыйныя назвы (напрыклад, у Чарэі новую царкву-мураўёўку местачкоўцы працягвалі называць «Прачысьценкай»).

У наш час традыцыйны тытул афіцыйна ўжываецца толькі датычна Прачысьценскай царквы ў Вільні. Назва «Прачысьценская» захавалася ў некалькіх урбанонімах Масквы, утвораных ад назвы абраза Маці Божай з Прачысьценскай (Усьпенскай) саборнай царквы ў Смаленску. Таксама на гістарычнай Смаленшчыне захавалася некалькі паселішчаў з назвай «Прачыстая», утворанай ад разьмешчаных у іх цэркваў з адпаведным гістарычным тытулам.

Іншыя помнікі архітэктуры з такой назвай:

• Бусяж
• Быцень
• Вільня
• Віцебск
• Ворша
• Горадня
• Жыровічы
• Кавалі
• Кашэвічы
• Лаўрышава
• Магілёў
• Наваградак
• Новы Сьвержань
• Сьмілавічы
• Пружаны