Орт

Орт (па-нямецку: Ort — чвэрць) — срэбная манэта наміналам ў ¼ (16 ст. — 17 ст.), 1/5 і 1/8 (18 ст.) талера. Манэта бітая напачатку на землях сучаснай Нямеччыны (Брандэнбург, Прусія) і называная ортсталер, а потым распаўсюджаная ў Даніі, Нарвэгіі.

Рэч Паспалітая

У Рэчы Паспалітай першыя орты былі выбіты ў 1608 годзе ў Гданьск на гарадской мынцы. Такім чынам Гданьск хацеў забясьпечыць сябе якаснай валютай дзеля разьлікаў з Эўропай. На авэрсе — выява караля, на рэвэрсе — герб гораду. Вага 6,80 грамаў, пасьля зьмяншалася.

Дзяржаўнае біцьцё каронных ортаў пачалося толькі ў 1618 годзе ў Быдгашчы. На каронных ортах на авэрсе выява караля, на рэвэрсе — дзяржаўны герб Рэчы Паспалітай. Пад час панаваньня Аўгуста III орт прыраўнялі да тымфу, пасьля чаго той перастаў існаваць як асобны намінал. Апошні орт Рэчы Паспалітай быў выбіты ў 1766 годзе.

У Вялікім Княстве Літоўскім орты біліся толькі адзін год — у 1664 годзе на мынцы Вільні. На авэрсе выява тагачаснага караля Яна Казімера, на рэвэрсе — Пагоня і лічба 18 (18 грошаў).

Месцы біцьця

Мынцы ВКЛ

Вільня — 1664 (на рэвэрсе літоўскага орту выбітая Пагоня замест гербу РП)

Дзяржаўныя каронныя мынцы

Быдгашч — 1618—1625, 1628, 1650—1652, 1677—1680, 1684—1686.
Усхоў — 1650—1655
Кракаў — 1655—1659, 1663—1664, 1667—1668
Львоў — 1656—1657, 1660
Познань — 1651—1659
Ляйпцыг — 1698, 1704, 1752—1756

Мескія мынцы

Гданьск — 1608—1621, 1623—1626, 1650—1652, 1654—1664, 1666—1667, 1758—1760, 1763
Торунь — 1630, 1650—1651, 1653—1655, 1655—1658 (біцьцё манэты швэдамі), 1660—1662
Эльблёнг — 1650—1651, 1656—1658 (біцьцё манэты швэдамі), 1660—1662, 1665—1667