Міхайла Байчышын

	Міхайла Байчышын
	укр. Михайло Іллярович Бойчишин
Намесьнік старшыні «Народнага руху Ўкраіны»
	студзень 1992 — 15 студзеня 1994
Кіраўнік Шаўчэнкаўскага раённага выканкаму Львова
	1991 — 1994
Дэпутат Львоўскай абласной рады
	1990 — 15 студзеня 1994
Асабістыя зьвесткі
Нарадзіўся:	5 сьнежня 1948; Чамярынцы, Перамышлянскі раён, Львоўская вобласьць, Украінская ССР, СССР
Памёр:	15 студзеня 1994; Кіеў, Украіна
Грамадзкае аб’яднаньне:	«Народны рух Украіны»
Сужэнец:	жонка Любаміра Ўладзімераўна Байчышына (1952—2010)
Дзеці:	дачка і сын
Бацька:	Ільляр Байчышын
Адукацыя:	Украінскі паліграфічны інстытут (1972, Львоў)

Міха́йла Ільля́равіч Байчы́шын (1948, Чамярынцы, цяпер Львоўскі раён, Украіна — 1994, Кіеў, Украіна) — украінскі палітык.

Дэпутат Львоўскай абласной рады (1990—1994), кіраўнік Шаўчэнкаўскага раённага выканкаму Львова (1991—1994). Намесьнік старшыні і кіраўнік Сакратарыяту «Народнага руху Ўкраіны» (1992—1994). 15 студзеня 1994 году быў выкрадзены ўзброенымі людзьмі ў масках зь сядзібы «НРУ» разам з дакумэнтамі банкіраў, якія пагадзіліся фінансаваць будаўніцтва Балта-Чарнаморскага нафтавага калектару празь Беларусь. Цела забітага расейскай выведкай дагэтуль не знайшлі^[1].

Жыцьцяпіс

У 1969—1990 гадах працаваў у Праектна-каструктарскім інстытуце канвэерабудаваньня ў Львове. У 1989 годзе прыняў удзел у стварэньні Таварыства ўкраінскай мовы і «Народнага руху Ўкраіны». У 1990 годзе абраўся ў склад Львоўскай абласной рады ад Чыгуначнага раёну Львова. У 1991 годзе ўзначаліў Шаўчэнкаўскі раённы выканкам Львова. У студзені 1992 году 3-і Зьезд НРУ абраў яго намесьнікам старшыні. Пазьней заняў пасаду кіраўніка Сакратарыяту НРУ^[2].

У 1993 годзе пасьля сустрэчы ва Ўкраіне з прадстаўніком Беларускага народнага фронту Станіславам Гусаком падлучыў Інстытут транспарту і нафты ў Кіеве да распрацоўкі Балта-Чарнаморскага нафтавага калектару (БЧНК). Гэтая ідэя прадугледжвала пракладку празь Беларусь нафтаправоду ад Адэсы (Украіна) да Вэнтсьпілса (Латвія). У выніку нафтаперапрацоўчыя заводы рэгіёну маглі атрымаць таньнейшую нафту з трох напрамкаў на выбар — Балтыйскага і Чорнага мора або Расеі. У ліпені 1993 году ў Менску прайшла 1-я канфэрэнцыя па БЧНК. У ёй узялі ўдзел кіраўнік нафтавага тэрміналу ў Вэнтсьпілсе, кіраўнік «Латвіянафта», прадстаўнікі Міністэрства энэргетыкі Беларусі і прадстаўнікі Расеі. Расейскі бок быў засмучаны канфэрэнцыяй праз занепакоенасьць стратай нафтавага рынку памерам каля 20 млрд даляраў ЗША. Міхайла Байчышын сабраў на канфэрэнцыі дакумэнты зацікаўленых банкіраў з адрасамі для фінансаваньня БЧНК. Рыхтаваў 2-ю канфэрэнцыю па Балта-Чарнаморскім нафтавым калектары ў 1994 годзе. 15 студзеня 1994 году а 17-й гадзіне быў выкрадзены ўзброенымі людзьмі ў масках са свайго кабінэту ў штаб-кватэры Народнага руху Ўкраіны ў Кіеве. Паводле меркаваньня Станіслава Гусака, выкраданьне дакумэнтаў пра фінансаваньне БЧНК і забойства Байчурына — «справа рук расейскай выведкі». Цела забітага дагэтуль не знайшлі. Пры гэтым выкралі дакумэнты зацікаўленых у БЧНК банкіраў. У выніку сарвалі 2-ю канфэрэнцыю па БЧНК^[3], якую мелі правесьці ў Кіеве празь 10 дзён — 25 студзеня 1994 году. Сярод іншага, нападнікі скралі дакумэнты аб намеры прафінансаваць праектную працу, якія даслаў Міжнародны валютны фонд (ЗША)^[4].

Уплыў для Беларусі

У 1994 годзе 1-ы намесьнік старшыні Савету міністраў Беларусі Міхаіл Мясьніковіч праз «Гомельтранснафта Дружба» замовіў праект Балта-Чарнаморскага нафтавага калектару ў Інстытуце транспарту і нафты ў Кіеве, які быў зроблены і пададзены ўжо прэзыдэнту Беларусі А. Лукашэнку^[3]. 29 красавіка 2020 году А. Лукашэнка падпісаў Распараджэньне аб будаўніцтве магістральнага нафтаправода «Гомель — Горкі» ў 2020—2023 гадох дзеля дывэрсыфікацыі паставак нафты ў Беларусь^[5].

Крыніцы

^ Натальля Радзіна. Зянон Пазняк: Беларускім мужчынам трэба рыхтавацца // Прэс-цэнтар «Хартыі’97», 24 красавіка 2019 г. Праверана 7 чэрвеня 2021 г.
^ Кастусь Бандарэнка. Правыя ва Ўкраіне: зацятая барацьба за палітычную пэрыфэрыю // Архэ-Пачатак : часопіс. — 2001. — № 5. — ISSN 1392-9682.
^ ^а ^б Станіслаў Гусак. Галасы стагодзьдзя. - Мінулы век у памяці сучасьнікаў // Беларуская служба Радыё «Свабода», студзень 1999 г. Архіўная копія ад 15 студзеня 2013 г. Праверана 7 чэрвеня 2021 г.
^ Сяргей Навумчык. Экспэрты распрацоўваюць Балта-Чарнаморскі нафтавы калектар // Дзевяноста трэці / рэд. Аляксандар Лукашук, маст. Генадзь Мацур. — Вашынгтон: Радыё Свабодная Эўропа/Радыё Свабода, 2018. — С. 300—315. — 536 с. — (Бібліятэка Свабоды. ХХІ стагодзьдзе). — ISBN 978-0-929849-22-5
^ Падпісана распараджэньне аб будаўніцтве магістральнага нафтаправода «Гомель — Горкі» // Прэзыдэнт Рэспублікі Беларусь, 29 красавіка 2020 г. Праверана 24 студзеня 2022 г.

Гэта — накід артыкула пра біяграфію асобы. Вы можаце дапамагчы Вікіпэдыі, пашырыўшы яго.

[1] Натальля Радзіна. Зянон Пазняк: Беларускім мужчынам трэба рыхтавацца // Прэс-цэнтар «Хартыі’97», 24 красавіка 2019 г. Праверана 7 чэрвеня 2021 г.

[2] Кастусь Бандарэнка. Правыя ва Ўкраіне: зацятая барацьба за палітычную пэрыфэрыю // Архэ-Пачатак : часопіс. — 2001. — № 5. — ISSN 1392-9682.

[а-3] а ^б Станіслаў Гусак. Галасы стагодзьдзя. - Мінулы век у памяці сучасьнікаў // Беларуская служба Радыё «Свабода», студзень 1999 г. Архіўная копія ад 15 студзеня 2013 г. Праверана 7 чэрвеня 2021 г.

[4] Сяргей Навумчык. Экспэрты распрацоўваюць Балта-Чарнаморскі нафтавы калектар // Дзевяноста трэці / рэд. Аляксандар Лукашук, маст. Генадзь Мацур. — Вашынгтон: Радыё Свабодная Эўропа/Радыё Свабода, 2018. — С. 300—315. — 536 с. — (Бібліятэка Свабоды. ХХІ стагодзьдзе). — ISBN 978-0-929849-22-5

[5] Падпісана распараджэньне аб будаўніцтве магістральнага нафтаправода «Гомель — Горкі» // Прэзыдэнт Рэспублікі Беларусь, 29 красавіка 2020 г. Праверана 24 студзеня 2022 г.

[1]

[2]

[3]

[4]

[5]