Касьцёл Сьвятога Міхала Арханёла і кляштар дамініканаў (Віцебск)
Касьцёл Сьвятога Міхала Арханёла і кляштар дамініканаў — колішні рымска-каталіцкі кляштарны комплекс у Віцебску. Дзейнічаў у XVII — 1-й пал. XIX стст. Займаў пляц плошчай 4950 м²[1] на левым беразе Дзьвіны пры ўтоку ў яе ручая.
Комплекс складаўся з мураванага касьцёла, драўлянага 1-павярховага кляштарнага корпусу на мураваным падмурку і шэрагу гаспадарчых збудаваньняў[2].
Гісторыя
Віцебскі дамініканскі кляштар заснаваў падкаморы Адам Кісель (з Брусілава) у 1682 року (магчыма, раней — у 1642[2]). У 1771 року (паводле іншых зьвестак — у 1731[1]) пачалося ўзьвядзеньне мураванага касьцёла, якое завяршылася толькі ў XIX ст. у значна спрошчаным варыянце (вынікае з абмерных рысункаў, зробленых у час закрыцьця кляштару)[3]. У 1811 року каля касьцёла збудавалі новы кляштарны корпус[1].
Па здушэньні вызвольнага паўстаньня (1830—1831) у 1832 року расейскія ўлады ліквідавалі кляштар. Таго ж року будынак касьцёла перадалі Віцебскаму гарнізоннаму батальёну[3]. У наш час кляштарныя збудаваньні не існуюць (магчыма, захаваліся падмуркі).
Архітэктура
Касьцёл — помнік архітэктуры барока[2]. Гэта была 3-нэфавая прастакутная ў пляне базыліка з паўкруглая алтарнай часткай і сымэтрычнымі закрысьціямі па бакох вімы прэзьбітэрыя. Хвалістая позьнебарокавая ў ніжняй частцы структура галоўнага фасада-нартэску была незавершанай. Вышэй за карніз цэнтральнага нэфу вежы накрывалі пакатыя шатры з трыкутным клясыцыстычным франтонам паміж імі[3].
Касьцёл меў цыліндрычныя скляпеньні на распалубках[2], што падтрымліваліся апорнымі слупамі ў форме лятарынскага крыжа і адпаведныя ім тонкімі спараванымі падпружнымі аркамі[3]. Інтэр’ер упрыгожвалі шэсьць прысьценных разьбяных алтароў[4].
Апроч драўлянага кляштарнага корпусу, у склад комплексу ўваходзілі будынкі флігелю (7 жылых і 1 нежылое памяшканьне), лядоўні, сьвірану, бровару, стайні, пуні[1] і кузьні[2] (агульная плошча 4950 м²). Пры кляштары меўся агарод (1531 м²)[1].
У сылюэце Віцебску
Крыніцы
- ^ а б в г д Слюнькова И. Монастыри восточной и западной традиций. — М., 2002. С. 291.
- ^ а б в г д Кулагін А. Каталіцкія храмы на Беларусі. — Менск, 2001. С. 171.
- ^ а б в г Габрусь Т. Мураваныя харалы. — Менск, 2001. С. 232.
- ^ Тамара Габрусь. Святыні ордэна прапаведнікаў // «Наша Вера» № 4 (26), 2003.
Літаратура
- Габрусь Т. Мураваныя харалы: Сакральная архітэктура беларускага барока. — Менск: «Ураджай», 2001. — 287 с.: іл. ISBN 985-04-0499-X.
- Кулагін А. Каталіцкія храмы на Беларусі: Энцыкл. даведнік / А. Кулагін; маст. І. Бокі. — 2-е выд. — Менск: БелЭн, 2001. — 216 с.: іл. ISBN 985-11-0199-0.
- Тамара Габрусь. Святыні ордэна прапаведнікаў // «Наша Вера» № 4 (26), 2003.
- Слюнькова И. Н. Монастыри восточной и западной традиций: Наследие архитектуры Беларуси / Рос. акад. архитектуры и строит. наук. — М.: Прогресс-Традиция, 2002. — 600 с.: ил. ISBN 5-89826-093-5.