Гістарычны факультэт БДУ

Гістарычны факультэт БДУ — буйны вучэбна-навуковы цэнтар падрыхтоўкі гісторыкаў, археолягаў, архівазнаўцаў і спэцыялістаў музэйнай справы. Заснаваны ў 1934 годзе. На факультэце 9 катэдраў. Сёньняшні дэкан — доктар гістарычных навук Аляксандар Каханоўскі.

Гісторыя

Гістарычны факультэт БДУ заснаваны ў 1934 годзе^[1]. Фактычна арганізаваў гістарычны факультэт першы рэктар БДУ Ўладзімер Пічэта, які сам быў гісторыкам. Яшчэ да афіцыйнага адкрыцьця гістарычнага факультэту штат выкладчыкаў БДУ істотна складаўся з гісторыкаў (Мікалай Нікольскі, Дзьмітры Канчалоўскі, Усевалад Ігнатоўскі, Васіль Дружчыц, Мітрафан Доўнар-Запольскі ды іншыя). Першым дэканам гістарычнага факультэту быў прызначаны акадэмік АН БССР Васіль Шчарбакоў, які прабыў дэканам два гады. У 1936 ён быў звольнены, а ў 1938 годзе рэпрэсаваны. Другім дэканам факультэту стаў філёзаф Іван Чымбург, які пазьней стаў рэктарам БДУ. У 1937 годзе адчыненая асьпірантура ды дактарантура па гісторыі. Ад 1937 да 1941 году дэканам быў Аляксей П’янкоў.

Падчас вайны факультэт аднавіў сваю працу ў эвакуацыі на станцыі Сходня (Маскоўская вобласьць). Часова абавязкі дэкана выконваў У. І. Шаўчэнка.

Ад 1944 да 1947 г. дэканам быў Лука Шашкоў, ад 1947 да 1953 г. — Фёдар Нячай, ад 1953 да 1955 г. — Аляксей Сідарэнка. На працягу амаль дваццаці гадоў (1955—1973 гг.) дэканам гістарычнага факультэту быў Пётар Савачкін, потым працяглы час Іраіда Царук. Факультэт прапаноўваў навучаньне па трох формах — дзённай, вячэрняй і завочнай. Падчас перабудовы і заняпаду СССР дэканам гістарычнага факультэту быў Э. Загарульскі. У гэты час на факультэце заснаванае аддзяленьне гісторыі КПСС, на якім навучаліся студэнты з розных краінаў СССР.

Ад 1992 году на факультэце пачалася падрыхтоўка студэнтаў па спэцыяльнасьцях «Гісторыка-архівазнаўства», «Музэязнаўства і ахова помнікаў гісторыі і культуры», «Міжнародныя стасункі»^[2]. У 1995 годзе на базе аддзяленьня міжнародных стасункаў быў утвораны факультэт міжнародных стасункаў.

Катэдры

Ад 2001 году на катэдры працуюць 9 катэдраў^[3]

Катэдра гісторыі Беларусі старажытнага часу і сярэдніх вякоў
Катэдра гісторыі Беларусі новага і найноўшага часу
Катэдра гісторыі старажытнага сьвету і сярэдніх вякоў
Катэдра гісторыі новага і найноўшага часу
Катэдра гісторыі Расеі
Катэдра гісторыі паўднёвых і заходніх славян
Катэдра крыніцазнаўства
Катэдра археалёгіі і спэцыяльных гістарычных дысцыплінаў
Катэдра этналёгіі, музэязнаўства і гісторыі мастацтваў

Вучэбныя лябараторыі

Вучэбная лябараторыя музэйнай справы
Вучэбная лябараторыя беларускай нацыянальнай культуры
Вучэбная лябараторыя тэхнічных сродкаў навучаньня
Вучэбная лябараторыя інфарматыкі

Таксама дзейнічае кабінэт гістарычных навук.

Вядомыя выпускнікі

Уладзімер Арлоў (нар. у 1953 г.) — беларускі літаратар
Павал Лойка (1958—2010) — беларускі гісторык
Міхась Ткачоў (1942—1992) — беларускі гісторык, археоляг
Георгі Штыхаў (1927—2018) — беларускі гісторык, археоляг

Крыніцы

^ Гістарычны факультэт Аб падраздзяленні — Беларускі дзяржаўны ўніверсітэт
^ О факультете — Официальный сайт исторического факультета Белорусского государственного университета (рас.)
^ Кафедры — Официальный сайт исторического факультета Белорусского государственного университета (рас.)

[1] Гістарычны факультэт Аб падраздзяленні — Беларускі дзяржаўны ўніверсітэт

[2] О факультете — Официальный сайт исторического факультета Белорусского государственного университета (рас.)

[3] Кафедры — Официальный сайт исторического факультета Белорусского государственного университета (рас.)

[1]

[2]

[3]