Луол Дэнг

Луол Дэнг
Пазыцыя:	лёгкі форвард
Рост:	206 см
Вага:	100 кг
Грамадзянства:	Паўднёвы Судан Вялікабрытанія
Нарадзіўся:	16 красавіка 1985(1985-04-16)[…] (41 год) Вау[d], Паўднёвы Судан
Альма-матэр:	Blair Academy[d] Д’юкаўскі ўнівэрсытэт[d] St Mary's Catholic High School[d]
Драфт
7, драфт НБА 2004 году Фінікс Санз
Клюбы
Гады	Клюб
2003—2004	Д’юк Блю Дэвілз[d]
2004—2014	Чыкага Булз
2014	Кліўлэнд Кавальерз
2014—2016	Маямі Гіт
2016—2018	Лос-Анджэлес Лэйкерз
2018—2019	Мінэсота Тымбэрўулвз
Асабістыя ўзнагароды і дасягненьні
першакурсьнік году паводле вэрсіі USBWA[d] зборная навічкоў НБА[d] (2005) NBA Sportsmanship Award[d] (2007) J. Walter Kennedy Citizenship Award[d] (2014)
Статыстыка на NBA.com

Луол Майкл Дэнг (па-ангельску: Luol Michael Deng; нар. 16 красавіка 1985 году, Судан) — колішні брытанска-суданскі баскетбаліст. Доўгі час выступаў за каманду Нацыянальнай баскетбольнай асацыяцыі «Чыкага Булз», але бараніў колеры і іншых клюбаў лігі. Дэнг — адзіны замежнік, які выйграў Прыз за спартовыя паводзіны НБА у сэзоне 2006—2007 гадоў. Быў натуралізаваны Вялікабрытаніяй у 2006 годзе, а сам паходзіць з народу дынка.

Кар’ера

Пасьля школы прыняў прапанову Майка Кжызэўскага далучыцца да Ўнівэрсытэту Д’юка, дзе гуляў з 2003 па 2004 год.

У 2004 годзе гулец быў абраны ў першым раўндзе драфту НБА пад 7-м нумарам камандай «Фінікс Санз» і адразу ж быў абменены ў «Чыкага Булз». У сваім першым сэзоне ў НБА згуляў 61 гульню, у якіх назьбіраў 11,7 пунктаў, а таксама быў улучаны ў зборную ўсіх пачаткоўцаў НБА. У наступным сэзоне Дэнг палепшыў свае статыстычныя паказьнікі, набіраючы 14,3 пунктаў за гульню і робячы 6,6 падбораў. Ён дапамог камандзе другі раз запар прабіцца ў плэй-оф, дзе «Булз» былі выбітыя з гульні «Маямі Гіт». У сэзоне 2006—2007 гадоў баскетбаліст стаў адзіным гульцом «Чыкага», які выйшаў у стартавым складзе ўва ўсіх 82 гульнях сэзону. Брытанец лідаваў у камандзе паводле колькасьці згуляных хвілінаў і адсотку трапных кідкоў (51,7%). Ён быў другім паводле колькасьці назьбіраных пунктаў пасьля Бэна Гордана з 18,8 пунктамі за гульню. 26 сакавіка 2007 году спартовец згуляў свой найлепшы на час матч у кар’еры, набраўшы 38 пунктаў у пераможным матчы супраць «Портлэнд Трэйл Блэйзэрз». У сэзоне 2007—2008 гадоў Дэнг згуляў у 63 гульнях, прапусьціўшы 19 праз запаленьне ахілу. Не зважаючы на гэта, ён зьбіраў у сярэднім 17 пунктаў за гульню, але ня здолеў дапамагчы камандзе выйсьці ў плэй-оф.

Дэнг у складзе «Чыкага Булз».

Перад пачаткам сэзону 2008—2009 гадоў было афіцыйна абвешчана аб падаўжэньні кантракту, сума якога складала 71 мільён даляраў. Статыстычныя паказьнікі баскетбаліста пагоршыліся да 14,1 пунктаў і 6 падбораў за гульню. Праз траўмы ён згуляў толькі ў 48 гульнях і зусім прапусьціў плэй-оф. У сэзоне 2009—2010 гадоў згуляў у 70 гульнях, у якіх ужо зьбіраў 17,6 пунктаў і рабіў 7,3 падбораў. Ён дапамог камандзе трапіць у плэй-оф, дзе «Булз» саступілі «Кліўлэнд Кавальерз» у першым раўндзе. 1 лістапада 2010 году гулец усталяваў новы рэкорд у колькасьці пунктаў, набраўшы 40 пунктаў у матчы супраць «Портлэнд Трэйл Блэйзэрз». У сярэднім за сэзон ён зьбіраў 17,4 пунктаў за гульню, займаючы трэцяе месца ў камандзе пасьля Дэрыка Роўза (25) і Карласа Бузэра (17,5). Каманда дайшла да фіналу Ўсходняй канфэрэнцыі, дзе прайграла «Маямі Гіт». 9 лютага 2012 году Дэнг быў улучаны ў зборную ўсіх зорак Усходняй канфэрэнцыі. У канцы сэзону ён таксама трапіў у другую зборную ўсіх зорак абароны. У наступным сэзоне брытанец зноў быў улучаны ў зборную ўсіх зорак Усходняй канфэрэнцыі. Ён быў лідэрам каманды паводле колькасьці пунктаў, маючы 16,5 балаў за гульню. Гулец усталяваў рэкордны ў кар’еры адсотак рэалізацыі штрафных кідкоў — 81%. У плэй-оф дружына спачатку выбіла «Бруклін Нэтс», але ў наступным раўндзе зноў зазнала паразу ад «Маямі Гіт» у сэрыі зь сямі гульняў.

У адсутнасьць Дэрыка Роўза Дэнг быў найлепшым бамбардзірам «Чыкага» ў першай палове сэзону 2013—2014 гадоў, набіраючы ў сярэднім 19 пунктаў за гульню. Аднак 7 студзеня 2014 году яго абмянялі ў «Кліўлэнд Кавальерз» на Эндру Байнама, дзе ён правёў астатнюю частку сэзону. Баскетбаліст у сярэднім за гульню клаў на свой рахунак 14,1 пунктаў.

15 ліпеня 2014 году гулец быў абменены ў «Маямі Гіт». У сваім першым сэзоне ў камандзе ён зьбіраў у сярэднім 14 пунктаў і рабіў 5,2 падбораў. У сваім другім сэзоне ён выйшаў у плэй-оф, дзе ўсталяваў рэкорд «Гіт» паводле колькасьці пунктаў у дэбютным матчы плэй-оф, набраўшы 31 пункт у першай гульні. 7 ліпеня 2016 году Дэнг падпісаў чатырохгадовы кантракт на 72 мільёны даляраў з «Лос-Анджэлес Лэйкерз». 15 сакавіка 2017 году брытанец быў выключаны з складу каманды да канца сэзону. 10 верасьня 2018 году Дэнг узгодніў кантракт зь «Мінэсотай Тымбэрўулвз». За новы клюб амаль не гуляў, а апошні матч гульца ў НБА адбыўся 27 лютага 2019 году. Пазьней ён падпісаў аднадзённы кантракт з «Булз», каб завяршыць кар’еру ў камандзе, дзе калісьці пачынаў кар’еру.