Кліўлэнд Кавальерз

Кліўлэнд Кавальерз
Заснаваны	1970
Месцазнаходжаньне	Кліўлэнд, Агаё, ЗША
Арэна	Рокет-Арэна
Галоўны трэнэр	Кені Аткінсан[d]
Чэмпіянат	Нацыянальная баскетбольная асацыяцыя
Форма
Клюбныя колеры
Хатняя Выязная
Спасылкі
Афіцыйная бачына
Галерэя здымкаў у Вікісховішчы

«Клі́ўлэнд Ка́вальерз» (па-ангельску: Cleveland Cavaliers) — прафэсійны баскетбольны клюб, які выступае ў Нацыянальнай баскетбольнай асацыяцыі. Клюб месьціцца ў горадзе Кліўлэнд, Агаё. Клюб трапіў у лігу ў 1970 годзе разам з «Портлэнд Трэйл Блэйзэрз» і «Бафала Брэйвэз». Свае хатнія гульні каманда спачатку ладзіла на Кліўлэнд-Арэне з 1970 па 1974 гады, а затым на Рычфілд-Калізэі з 1974 па 1994 гады. З 1994 году «Кавальерз» гуляюць на Рокет-Арэне ў самым цэнтры Кліўлэнду, якую падзяляюць з хакейным клюб «Кліўлэнд Монстэрз» з Амэрыканскай хакейнай лігі. «Кавальерз» першыя гады мелі праблемы на пляцоўцы, упершыню трапіўшы ў плэй-оф толькі ў 1976 годзе. У 1980 годзе франшыза была набытая Тэдам Стэп’енам, які адзначыўся частымі зьменамі трэнэраў, сумніўнымі абменамі і пастановамі наконт драфтаў, а таксама нізкай наведвальнасьцю і фінансавымі стратамі.

У 2016 годзе «Кавальерз» выйгралі свой першы чэмпіянат НБА, што стала першым буйным спартовым дасягненьнем прадстаўніком «Кліўлэнду» з 1964 году. Перамога ў фінале над «Голдэн Стэйт Ўорыярз» стала першым выпадкам у гісторыі фіналаў, калі каманда здолела адгуляцца ў сэрыі зь ліку 3–1.

Гісторыя

«Кавальерз» пачалі гуляць у лізе ў сэзоне 1970—1971 гадоў як каманда пашырэньня. Яны ўсталявалі рэкорды паводле колькасьці паразаў у кожным зь першых пяці сэзонаў, перш чым не фінішавалі першымі ў сваім дывізіёне ў 1976 годзе. У той камандзе 1976 году гулялі Остын Кар, Бінга Сьміт, Джым Чоўнз, Дык Снайдэр, Нэйт Турманд, а пасаду галоўнага трэнэра займаў Біл Фітч. Яна запомнілася «Цудам у Рычфілдзе», у якім «Кавальерз» перамаглі «Вашынгтон Булетс» зь лікам 4–3 у паўфінале Ўсходняй канфэрэнцыі. Апошнюю гульню згаданай сэрыі «Кавальерз» перамаглі зь лікам 87:85 дзякуючы трапнаму кідку Снайдэра за чатыры сэкунды да канца. Клюб упершыню прабіўся ў фінал канфэрэнцыі, але там яны апынуліся бяз Чоўнза, які зламаў палец на назе перад першым матчам сэрыі. У выніку «Кавальерз» саступілі «Бостан Сэлтыкс» зь лікам 4:2. У наступныя два сэзоны каманда трапляла ў плэй-оф, пасьля чаго ў іх пачаўся сэзон «засушы», які расьцягнуўся на шэсьць гадоў.

Форвард «Кавальерз» Леброн Джэймз, якога абралі першым на драфце НБА 2003 году, быў сталым удзельнікам Матчу ўсіх зорак НБА і чатырохразовым уладальнікам узнагароды самага каштоўнага гульца лігі, прывёўшы каманду да першага фіналу НБА ў 2007 годзе і да першага чэмпіёнскага тытула ў 2016 годзе.

Пачатак 1980-х гадоў адзначыўся тым, што клюбам валодаў Тэд Стэп’ен. У час ягонага кіраваньня «Кавальерз» займелі традыцыю абменьваць будучыя выбары на драфте на вэтэранаў, які ўжо мелі невялікія паказьнікі ў статыстыцы. Ягонай найбольш прыкметнай угодай быў абмен выбару ў першым раўндзе драфту 1982 году ў «Лос-Анджэлес Лэйкерз» на Дона Форда і 22-і агульны выбар драфту ў 1980 годзе. У выніку Стэп’енавых угодаў НБА прасунула «Правіла Стэп’ена», якое забараняе камандам абменьвацца выбарамі першага раўнду драфту наступных сэзонаў. Вынікі на пляцоўцы для «Кавальерз» былі благімі, яны таксама апусьціліся на дно лігі паводле наведвальнасьці і страцілі 15 мільёнаў даляраў за тры гады кіраваньня Стэп’ена. За гэты час у «Кавальерз» зьмянілася шэсьць трэнэраў, у тым ліку чатыры цягам сэзону 1981—1982 гадоў. Каманда скончыла сэзон з паказьнікам 15–67, а паміж сакавіком і лістападам 1982 году яна агулам мела сэрыю з 24 паразаў, што на той момант было самай працяглай сэрыяй паразаў у НБА. Джордж і Гордан Ганд набылі «Кавальерз» у Стэп’ена ў 1983 годзе.

«Кавальерз» выходзілі ў плэй-оф 10 разоў паміж 1985 і 1998 гадамі. Сэзон 1988—1989 гадоў стаў найлепшым сэзонам клюбу на той час, калі рэгулярны сэзон яны завяршылі з паказьнікам 57–25. Галоўным трэнэрам той дружыны быў Лені Ўілкенз. Свой другі сэзон з 57 перамогамі яны згулялі ў 1991—1992 гадах і ў тым жа годзе дакрочылі да фіналу Ўсходняй канфэрэнцыі. Аднак паміж 1999 і 2005 гадамі «Кавальерз» аніводнага разу ня здолелі патрапіць у плэй-оф. Сэзон 2002—2003 гадоў клюб скончыў з паказьнікам 17–65, што было найгоршым паказьнікам у лізе. «Кавальерз» мелі першы нумар драфту НБА 2003 году, абраўшы будучаю зорку лігі Леброна Джэймза. 3 студзеня 2005 году каманда была прададзеная бізнэсоўцу Дэну Гілбэрту за 375 мільёнаў даляраў, і ўгода была закрытая 1 сакавіка 2005 году. У тым жа годзе каманда таксама наняла галоўнага трэнэра Майка Браўна і генэральнага мэнэджара Дэні Фэры. «Кавальерз» збудавалі каманду вакол Джэймза і Жыдрунаса Ілгаўскаса, дадаўшы да складу такіх гульцоў, як то Дру Гудэн, Лары Г’юз і Андэрсан Варажан. Пад гэтым новым кіраўніцтвам «Кавальерз» пяць разоў запар прабіваліся ў плэй-оф з 2006 па 2010 гады, кожны раз выходзячы як найменш у другі раўнд. «Кавальерз» 2006—2007 гадоў упершыню ў гісторыі франшызы прасунуліся ў фінал НБА, але саступілі ў ім «Сан-Антоніё Спэрз». Праз два гады каманда цягам сэзону здабыла рэкордныя для сябе 66 перамогаў, маючы паказьнік у хатніх матчах 39–2, аднак у фінале Ўсходняй канфэрэнцыі дружына зазнала паразу ад «Арланда Мэджык». Не зважаючы на тое, што да складу прыяднаўся чатырохразовы чэмпіён НБА Шакіл О’Ніл, «Кавальерз» у сэзоне 2009—2010 гадоў ня здолелі нават прабіцца ў фінал канфэрэнцыі, саступіўшы ў другім раўндзе «Бостан Сэлтыкс».

Дэн Гілбэрт набыў каманду ў 2005 году, а з тых часоў дамогся зь ёй першага тытула пераможцаў НБА ў 2016 годзе.

Пасьля таго, як «Кавальерз» выбылі з плэй-оф, увага была сканцэнтраваная на Джэймзе, які стаў вольным агентам. 8 ліпеня 2010 году ён абвесьціў у гадзінным спэцыяльным выпуску пад назовам «Пастанова», які трансьляваўся па нацыянальным тэлебачаньні, што падпіша кантракт з «Маямі Гіт». Гэтая заява разьюшыла многіх жыхароў Кліўлэнду і прывяла да таго, што заўзятары адчулі сябе здраджанымі. Па сэзоне 2010—2011 гадоў з 19 перамогамі «Кавальерз» пачалі перабудову вакол Кайры Ірвінга, якога яны абралі пад першым нумарам на драфце НБА 2011 году. У 2014 годзе Джэймз вярнуўся ў «Кавальерз» пасьля чатырох гадоў у Маямі. У той час як «Гіт» мелі паказьнік 224–88 за чатыры гады перабываньня там Джэймза, які стаў новым клюбам чэмпіёнам НБА ў 2012 і 2013 гадах, «Кавальерз» мелі паказьнік 97–215 і што сэзон былі па-за плэй-оф. «Кавальерз» зрабілі некалькі крокаў, каб перабудаваць каманду, каб ператварыцца на дружыну, якая можа змагацца за чэмпіёнства. Галоўнай постацю зноў стаў Джэймза, а яшчэ адным прыкметным баскетбалістам каманды стаў Кевін Лаў, які перабраўся ў Кліўлэнд зь «Мінэсоты Тымбэрўулвз». У выніку трыё з Джэймзам, Лавам і Ірвінгам было ахрышчанае заўзятарамі і СМІ як «вялікая тройка». «Кавальерз» чатыры разы запар прабіваліся ў фінал з 2015 па 2018 гады, дзе ўсе гэтым разы супрацьстаялі «Голдэн Стэйт Ўорыярз». Пераможным годам быў толькі 2016-ы. Чэмпіёнства 2016 году сталася першым у гісторыі франшызы, а таксама каманда была першай, яка здолела адгуляцца, саступаючы ў сэрыі 3–1. Гэта быў таксама першы чэмпіёнскі тытул Кліўлэнда ў буйных прафэсійных відах спорту з часоў «Браўнс» у 1964 годзе, што паклала канец гэтак званаму спартоваму праклёну места.

Склад «Кавальерз» зьведаў шмат зьменаў у сэзоне 2017—2018 гадоў, найбольш прыкметным зь якіх быў абмен Ірвінга ў «Бостан Сэлтыкс» на Айзэю Томаса ды іншых гульцоў. Пазьней Томас быў абменены ў «Лос-Анджэлес Лэйкерз» у рамках перагляду тэрмінаў абмену, у выніку якога «Кавальерз» дадалі Джордана Кларксана, Лары Нэнса-малодшага ды іншых да сваіх шыхтаў. У наступные міжсэзоньне Джэймз адмовіўся ад клюбу, замест гэтага падпісаўшы кантракт з «Лэйкерз». У наступных двух сэзонах каманда мела толькі 19 перамогаў, наступствам чаго стала іхны брак у плэй-оф. За першыя тры сэзоны па другім сыходзе Джэймза «Кавальерз» выйгралі ў агульнай складанасьці 60 гульняў, кожны сэзон не трапляючы ў плэй-оф і маючы чатырох розных галоўных трэнэраў. 26 сакавіка 2023 году клюб забясьпечыў сабе месца ў плэй-оф НБА, што стала першым такім вынікам з 2018 году. Гэта таксама быў першы раз з 1998 году, калі каманда прабілася ў плэй-оф ня маючы ў складзе Леброна Джэймза. У выніку ў першым раўндзе яны саступілі ў сэрыі «Нью-Ёрк Нікс».

Статыстыка

В = выйгрышы, П = паразы, А% = адсотак выйграных матчаў

«Кліўлэнд Кавальерз» у НБА
Сэзон	В	П	А%	Плэй-оф	Вынікі
1970—1971	15	67	.183
1971—1972	23	59	.280
1972—1973	32	50	.390
1973—1974	29	53	.354
1974—1975	40	42	.488
1975—1976	49	33	.598	Выйгралі ў паўфінале канфэрэнцыі Прайгралі ў фінале канфэрэнцыі	Кліўлэнд 4, Вашынгтон 3 Бостан 4, Кліўлэнд 2
1976—1977	43	39	.524	Прайгралі ў першым раўндзе	Вашынгтон 2, Кліўлэнд 1
1977—1978	43	39	.524	Прайгралі ў першым раўндзе	Нью-Ёрк 2, Кліўлэнд 0
1978—1979	30	52	.366
1979—1980	37	45	.451
1980—1981	28	54	.341
1981—1982	15	67	.183
1982—1983	23	59	.280
1983—1984	28	54	.341
1984—1985	36	46	.439	Прайгралі ў першым раўндзе	Бостан 3, Кліўлэнд 1
1985—1986	29	53	.354
1986—1987	31	51	.378
1987—1988	42	40	.512	Прайгралі ў першым раўндзе	Чыкага 3, Кліўлэнд 2
1988—1989	57	25	.695	Прайгралі ў першым раўндзе	Чыкага 3, Кліўлэнд 2
1989—1990	42	40	.512	Прайгралі ў першым раўндзе	Філадэлфія 3, Кліўлэнд 2
1990—1991	33	49	.402
1991—1992	57	25	.695	Выйгралі ў першым раўндзе Выйгралі ў паўфінале канфэрэнцыі Прайгралі ў фінале канфэрэнцыі	Кліўлэнд 3, Нью-Джэрзі 2 Кліўлэнд 4, Бостан 3 Чыкага 4, Кліўлэнд 2
1992—1993	54	28	.659	Выйгралі ў першым раўндзе Прайгралі ў паўфінале канфэрэнцыі	Кліўлэнд 3, Нью-Джэрзі 2 Чыкага 4, Кліўлэнд 0
1993—1994	47	35	.573	Прайгралі ў першым раўндзе	Чыкага 3, Кліўлэнд 0
1994—1995	43	39	.524	Прайгралі ў першым раўндзе	Нью-Ёрк 3, Кліўлэнд 1
1995—1996	47	35	.573	Прайгралі ў першым раўндзе	Нью-Ёрк 3, Кліўлэнд 0
1996—1997	42	40	.512
1997—1998	47	35	.573	Прайгралі ў першым раўндзе	Індыяна 3, Кліўлэнд 1
1998—1999	22	28	.440
1999—2000	32	50	.390
2000—2001	30	52	.366
2001—2002	29	53	.354
2002—2003	17	65	.207
2003—2004	35	47	.427
2004—2005	42	40	.512
2005—2006	50	32	.610	Выйгралі ў першым раўндзе Прайгралі ў паўфінале канфэрэнцыі	Вашынгтон 4:2 Дэтройт 3:4
2006—2007	50	32	.610	Выйгралі ў першым раўндзе Выйгралі ў паўфінале канфэрэнцыі Выйгралі ў фінале канфэрэнцыі Прайгралі ў фінале НБА	Вашынгтон 4:0 Нью-Джэрзі 4:2 Дэтройт 4:2 Сан-Антоніё 0:4
2007—2008	45	37	.549	Выйгралі ў першым раўндзе Прайгралі ў паўфінале канфэрэнцыі	Вашынгтон 4:2 Бостан 3:4
2008—2009	66	16	.805	Выйгралі ў першым раўндзе Выйгралі ў паўфінале канфэрэнцыі Прайгралі ў фінале канфэрэнцыі	Дэтройт 4:0 Атланта 4:0 Арланда 2:4
2009—2010	61	21	.744	Выйгралі ў першым раўндзе Прайгралі ў паўфінале канфэрэнцыі	Чыкага 4:1 Бостан 2:4
2010—2011	19	63	.232
2011—2012	21	45	.318
2012—2013	24	58	.293
2013—2014	33	49	.402
Усяго	1660	1976	.457
Плэй-оф	70	78	.473

Вонкавыя спасылкі

• Афіцыйная старонка