Клермон-Фэран

	Клермон-Фэран
	Clermont-Ferrand
	Сьцяг Клермону-Фэран
Рэгіён:	Авэрнь-Рона-Альпы
Дэпартамэнт:	Пюі-дэ-Дом
Плошча:	42,67 км²
Вышыня:	358 м н. у. м.
Насельніцтва:	142686 (2016)
Часавы пас:; • летні час:	UTC+1 ; UTC+2
Паштовы індэкс:	63000
Геаграфічныя каардынаты:	45°46′50″ пн. ш. 3°05′15″ у. д. / 45.78056° пн. ш. 3.0875° у. д.Каардынаты: 45°46′50″ пн. ш. 3°05′15″ у. д. / 45.78056° пн. ш. 3.0875° у. д.
	Клермон-Фэран на мапе Францыі Клермон-Фэран
	Галерэя здымкаў у Wikimedia Commons
	http://www.ville-clermont-ferrand.fr

Клермон-Фэран (па-француску: Clermont-Ferrand, па-аксытанску: Clarmont d'Auvèrnhe) — горад на поўдні цэнтральнай частцы Францыі, адміністрацыйны цэнтар дэпартамэнта Пюі-дэ-Дом у рэгіёне Авэрнь-Рона-Альпы (да 1 студзеня 2016 зьяўляўся адміністрацыйным цэнтрам рэгіёну Авэрнь). Насельніцтва 142 686 чалавек (на 2016 год).

Геаграфія[рэдагаваць | рэдагаваць крыніцу]

Горад разьмешчаны на гэтак званым Цэнтральным масіве, на вышыні парадку 410 мэтраў над узроўнем мора. У навакольлях шмат гор грады Пюі, у тым ліку патухлых вульканаў. Каля гораду разьмешчаны курортны гарадок Руая (франц. Royat). Таксама побач з Клермон-Фэранам знаходзіцца вульканалягічны парк «Вульканія».

Гісторыя[рэдагаваць | рэдагаваць крыніцу]

Сталіца Авэрні яшчэ да прыходу рымлянаў была буйным цэнтрам зямлі галаў. Грэцкі гісторык Страбон згадвае горад як Нэмэс. Выхадцам гэтых месцаў лічыцца правадыр галаў Вэрцынгеторыкс; ягоную статую на цэнтральнай плошчы вылепіў Бартольдзі. Лічыцца, што дзесьці ў ваколіцах гораду Вэрцынгеторыкс нанёс рымлянам адчувальную паразу пры Герговіі.

Назва Клермонт або Клермон (Clarmontis; ад лац. Augustonemetum) сустракаецца ў аналах каралеўства франкаў пад 761 годам. Кіраўніком гораду ў раньняе Сярэднявечча быў біскуп. Клермон быў месцам правядзеньня двух царкоўных сабораў — у 535 і 1095 гадох, на Другім Клермонскім саборы папа Урбан II заклікаў сваю паству выступіць у крыжовы паход.

Графы Авэрнь беспасьпяхова спрабавалі адабраць Клермон у царкоўнікаў і зрабіць сталіцай сваіх земляў. Страціўшы надзею дамагчыся мэты, яны заснавалі побач другі горад — Манфэран. На працягу стагодзьдзяў Манфэран супернічаў з Клермон, пакуль нарэшце ня быў зьведзены да статусу ягонага прадмесьця. Здвоены горад атрымаў назву «Клермон-Фэран».

Эканоміка[рэдагаваць | рэдагаваць крыніцу]

У горадзе разьмешчана штаб-кватэра сусьветна вядомага вытворцы шынаў Michelin; у горадзе разьмешчаны шэраг прадпрыемстваў кампаніі. Таксама маюцца прадпрыемствы машынабудаўнічай, тэкстыльнай, паліграфічнай, папяровай, хімічнай, харчовай прамысловасьці.