Бульбачка

Зьвесткі зь Вікіпэдыі — вольнай энцыкляпэдыі
Бульбачка
Іншыя назвыбульба
Тыппірожнае
Нацыянальная страваэўрапейская
РэгіёнЭўропа
Час прыгатаваньня2 гадзіны
Асноўны складнікпечыва
Распаўсюджаныя складнікікакава, крэм
Падобныя стравымарцыпанавая бульбачка

Бу́льбачка — пірожнае зь печыва і какавы.

У наш час гэты ласунак робяць аднастайнага цёмнага адценьня. Першапачаткова пірожнае мела сьветлае адценьне ўнутры[1].

Складнікі[рэдагаваць | рэдагаваць крыніцу]

Цяпер для прыгатаваньня пірожнага выкарыстоўваюць: 600 грамаў печыва, 3 сталовыя лыжкі какавы, па шклянцы малака і цукру, яйка, 100 грамаў масла і 2 чайныя лыжкі мукі[1].

Першапачаткова ж бульбачка складалася зь бісквіту, крэму і масы для ўкачваньня. Для бісквіту бралі: 3 яйкі, 90 грамаў цукру, 75 грамаў мукі і 15 грамаў крухмалу. Для крэму выкарыстоўвалі: 125 грамаў масла, 65 грамаў цукровай пудры, 50 грамаў згушчанага малака і 3 чайныя лыжкі каньяку. Маса для ўкачваньня ўлучала: 100 грамаў цукровай пудры і 80 грамаў какавы[1].

Прыгатаваньне[рэдагаваць | рэдагаваць крыніцу]

У нашыя дні печыва здрабняюць таўкачом або ў блэндэры. Затым дадаюць какаву і перамешваюць. У каструлі з тоўстым дном ускаламучваюць малако з цукрам, мукой і яйкам. Атрыманую сумесь вараць да гушчыні і пры гэтым памешваюць. Затым дадаюць масла і перамешваюць. У звараную сумесь засыпаюць здрабнёнае печыва з какавай і фармуюць рукамі пірожныя. Пасьля іх ставяць на гадзіну ў лядоўню[1].

Даўней гатаваць бісквіт да бульбачкі пачыналі з ускаламучваньня яечных жаўткоў з 2/3 цукру да сьветлага адценьня. Бялкі ўскаламучвалі да ўстойлівых пікаў, затым дадавалі рэшту цукру і зноў ускаламучвалі. Ускаламучаныя бялкі і жаўткі злучалі. Муку перамешвалі з крухмалам і дадавалі да ўскаламучаных яек. Атрыманую сумесь перамешвалі зьнізу ўверх і ад краю да сярэдзіны. Цеста вылівалі на бляху, высланую пекарскай паперай. Бісквіт выпякалі 15 хвілінаў пры тэмпэратуры +200°C. Прыгатаваны бісквіт ахалоджвалі, пакідалі пастаяць ноч і наламвалі кавалачкамі. Затым яго пракручвалі ў блэндэры да атрыманьня дробных крошак і перасыпалі ў місу. Для прыгатаваньня крэму масла ўскаламучвалі з цукровай пудрай да атрыманьня пышнай, лёгкай, сьветлай масы. Паступова дадавалі згушчанае малако і перамешвалі атрыманую сумесь міксэрам. Затым крэм выкладалі на здрабнёны бісквіт і дадавалі каньяк. Усё разам перамешвалі да стану ліпкай масы. Пасьля ляпілі 10 пірожных у выглядзе бульбачак, якія ўкачвалі ў сумесь какава і цукровай пудры. Пірожным давалі паляжаць і ўкачвалі зноўку, пасьля чаго ахалоджвалі цягам гадзіны[1].

Крыніцы[рэдагаваць | рэдагаваць крыніцу]

  1. ^ а б в г д Тацяна Юхновіч, Сяргей Юхновіч. «Бульбачка» — клясычны рэцэпт / гал.рэд. Аляксандар Ваюшын // Вельмі смачна : газэта. — Менск: Рэдакцыя газэты «Магазін красвордаў», 9 лістапада 2021. — № 8 (32). — С. 1. — ISSN 2617-8508.