Хачапуры

Грузінскае (імэрэцінскае) хачапуры

Аджарскае хачапуры

Хачапу́ры (па-грузінску: ხაჭაპური, [xɑtʃʼɑpuri] ^{слухаць}) — страва грузінскай кухні, грузінскі нацыянальны мучны выраб, які ўяўляе сабой пірог з сырам.

Паходжаньне назвы і разнастайнасьці

Назва хачапуры паходзіць ад грузінскіх словаў «тварог» (хачо) і «хлеб» (пуры [puri] ^{слухаць}). Часам пірог зь мясам ці рыбай таксама называюць хачапуры, але гэта няправільна.

Існуе мноства відаў хачапуры — амаль у кожным грузінскім сяле хачапуры рыхтуюць па сваім асобным рэцэпце.

Самымі вядомымі грузінскімі хачапуры зьяўляюцца:

• імэрэцінскае хачапуры — традыцыйнае хачапуры круглай формы;
• аджарскае хачапуры — таксама называецца ачарулі ці аджарулі, і адрозьніваецца тым, што выпякаецца падоўжанай формы, а пасярэдзіне ўпрыгожанае залітым яйкам;
• мінгрэльскае і абхаскае хачапуры — вядомае пад назвай ачма;
• сванскае хачапуры;
• рачульскае хачапуры.

Хачапуры вядома таксама ў Армэніі, дзе яго выпякаюць з пластовага цеста ў форме капэрты.

Прыгатаваньне

Хачапуры ўяўляе сабой булачку рознай формы зь вялікім утрыманьнем сыру: яго ў хачапуры прыкладна ўдвая больш па вазе, чым мукі. Часта цеста для хачапуры зьяўляецца абсалютна прэсным, а вось акрамя абавязковага сыру (сьвежы або вытрыманы, часта авечы, напр. сулугуні), у склад стравы могуць уваходзіць яйкі (напрыклад, у аджарскім хачапуры) і іншыя інгрэдыенты. Вонкава хачапуры нагадваюць буйныя ватрушкі. Памеры хачапуры звычайна адпавядаюць памерам патэльняў, на якіх іх рыхтуюць.

Выпяканьне вядзецца альбо на вуглях, альбо на пліце на сярэднім агні. Для начыньня ў хачапуры выкарыстоўваюць наступныя сыры: імэрэцінскі, чанах, кабійскі, брынзу.

Патэнт

У верасьні 2011 году ўлады Грузіі аформілі патэнт на хачапуры і 29 іншых страваў нацыянальнай кухні.

Глядзіце таксама

• Хінкалі