Ручнікі

	«Ручнікі»
	Песьня выканаўцы гурт «Песьняры»;
Мова	беларуская
Напісаная	1959 (65 гадоў таму)
Працягласьць	2:58
Аўтар(ы)	Вера Вярба
Кампазытар(ы)	Мікола Пятрэнка

«Ручнікі́» — любоўная песьня 1959 году на верш Веры Вярбы і музыку Міколы Пятрэнкі.

Упершыню прагучала ў 1959 годзе ў Віцебску на аглядзе мастацкай самадзейнасьці, пасьля чаго яе сталі выконваць прафэсійныя сьпевакі, у тым ліку гурт «Песьняры». На першых грамзапісах памылкова пазначалася ў якасьці народнай. Стала найбольш папулярнай сярод больш як 200 песьняў кампазытара Міколы Пятрэнкі^[2].

Вобразнасьць

Выкладнік беларускай мовы і літаратуры Мікола Пятрэнка (1919—1997) заўважыў верш «Ручнікі» студэнткі БДУ Веры Вярбы (Гертруды Сакаловай; 1942—2012) ў часопісе «Полымя». Яго кранула дзея і дасьціпнасьць гутаркі на падставе народных вобразаў. Ручнік абазначаў утульнасьць дому, гасьціннасьць яго гаспадароў і повязь усіх пакаленьняў роду. Таму ручнік выступаў абярэгам сям’і. Вада ўвасабляла жыцьцё, а рака ўспрымалася ў якасьці плыні, якая жывіць навакольле каханьнем. Словы «ўпусьціла дзеўка беленькі ручнік» абазначалі кіданьне сямейных патрабаваньняў у плыню асабістага каханьня. Пацалунак служыў ахоўнікам узьніклых стасункаў між каханкамі, якіх аберагаў ад спакусьлівай вірлівасьці. У выкананьні гурта «Песьняры» злучнік «што як» замяніў «бо», у выніку чаго выраз стаў перадаваць гумар хлопца^[2].

Словы

У суботу Янка ехаў ля ракі,
Пад вярбой Алёна мыла ручнікі.
— Пакажы, Алёна, броды земляку,
Дзе тут пераехаць на кані раку?

— Адчапіся, хлопец, едзь абы-куды,
Не муці мне толькі чыстае вады, —
У маркоце Янка галавой панік,
Упусьціла дзеўка беленькі ручнік.

— Янка, мой саколік, памажы хутчэй,
Ой, плыве зьнікае ручнічок з вачэй.
— Любая Алёна, я вады баюсь,
Пацалуй спачатку, што як утаплюсь?

Супыніўся гнеды пад вярбой густой,
Цалаваў Алёну Янка над вадой.
Стала ціха, ціха на ўсёй зямлі
Па рацэ далёка ручнікі плылі.

— Вера Вярба, «Ручнікі» // Часопіс «Полымя»

Крыніцы

^ Песьня «Ручнікі» // «Песьняры», 13 лістапада 2018 г. Праверана 29 жніўня 2021 г.
^ ^а ^б Міхась Шавыркін. Ручнікі // Зьвязда : газэта. — 31 сьнежня 2013. — № 245 (27610). — С. 13. — ISSN 1990-763x.

Вонкавыя спасылкі

ВІА «Песьняры». Песьня «Ручнікі» // Сяргей, 10 ліпеня 2014 г. Праверана 29 жніўня 2021 г.
Гурт «Песьняры». Песьня «Ручнікі» (чорна-белае відэа) // «Глямурны цыган», 10 сьнежня 2008 г. Праверана 29 жніўня 2021 г.
В. Арлоў. «Песьняры» - Батлейка. Песьня «Ручнікі» (Беларускае тэлебачаньне 1971 г.) // «Павет», 8 студзеня 2009 г. Праверана 29 жніўня 2021 г.

Гэта — накід артыкула пра Беларусь. Вы можаце дапамагчы Вікіпэдыі, пашырыўшы яго.

[1] Песьня «Ручнікі» // «Песьняры», 13 лістапада 2018 г. Праверана 29 жніўня 2021 г.

[а-2] а ^б Міхась Шавыркін. Ручнікі // Зьвязда : газэта. — 31 сьнежня 2013. — № 245 (27610). — С. 13. — ISSN 1990-763x.

[1]

[2]