Міхал Францішак Сапега

Міхал Францішак Сапега

Міхал Францішак Сапега. З Коданскай галерэі, 1709
Герб «Ліс»
Асабістыя зьвесткі
Нарадзіўся	1670(1670)
Памёр	19 лістапада 1700 Алькенікі, Троцкі павет, Троцкае ваяводзтва, Вялікае Княства Літоўскае, Рэч Паспалітая
Пахаваны	касьцёл сьвятога Казімера
Род	Сапегі
Бацькі	Казімер Ян Сапега Крыстына Барбара з Глябовічаў

Міхал Францішак Сапега (1670 — 19 лістапада 1700) — дзяржаўны і вайсковы дзяяч Вялікага Княства Літоўскага. Канюшы вялікі літоўскі (з 1690), адначасна генэрал літоўскай артылерыі (з 1698). Генэрал-маёр (1692), генэрал-лейтэнант і князь Сьвятой Рымскай імпэрыі (1700). Быў старостам ашмянскім (з 1699).

Біяграфія

З чарэйскай лініі магнацкага роду Сапегаў гербу «Ліс», сын Казімера Яна, гетмана вялікага літоўскага, і Крыстыны Барбары з Глябовічаў. Меў братоў Юрыя Станіслава і Аляксандра Паўла.

Навучаўся ў езуіцкіх калегіюмах у Варшаве і Браневе. У 1689 годзе паступіў на службу ў аўстрыйскае войска, удзельнічаў у войнах супраць Асманскай імпэрыі. У 1692 годзе атрымаў званьне генэрал-маёра.

У 1696 годзе вярнуўся ў Вялікае Княства Літоўскае. У 1690 годзе атрымаў урад канюшага, адначасна з 1698 году генэрал літоўскай артылерыі. У 1700 годзе атрымаў ад аўстрыйскага імпэратара званьне генэрал-лейтэнанта і тытул князя Сьвятой Рымскай імпэрыі. Камандаваў сапегаўскімі войскамі ў вайне супраць шляхты—«рэспубліканцаў». У Алькеніцкай бітве 18 лістапада 1700 году капітуляваў, па чым яго засекла шляхта.

Не пасьпеў ажаніцца і не пакінуў нашчадкаў.

Літаратура

• Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — 788 с. — ISBN 985-11-0378-0