Фондавая біржа Малдовы

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку

Каардынаты: 47°2′39″ пн. ш. 28°44′35″ у. д. / 47.04417° пн. ш. 28.74306° у. д. / 47.04417; 28.74306

«Фондавая біржа Малдовы»
рум. Bursa de Valori a Moldovei
Тып фондавая
Разьмяшчэньне Кішынёў, Малдова
Заснаваная 1994 (26 гадоў таму)
Ключавыя асобы Карнэліў Доду, Сяргей Чабатар[1]
Валюта малдоўскі лей
Колькасьць лістынгаў 48 (2021 год)
Аб'ём Red Arrow Down.svg103,161 млн леяў[2] (2020 год; (5,956 млн $)[3]
Індэксы CNPF
Сайт bvm.md

«Фо́ндавая бі́ржа Малдо́вы» («ФБМ») — біржа ў Кішынёве, заснаваная ў сьнежні 1994 году.

На 2021 год «ФБМ» зьяўлялася акцыянэрным таварыствам і месьцілася ў Кішынёве па вуліцы Марыі Чыбатар, д. 16[4] (ваколіца Дубрава).

Кіраваньне[рэдагаваць | рэдагаваць крыніцу]

  • Агульны сход. Абірае Раду і Рэвізійную камісію аднойчы на 4 гады.
  • Рада. Складаецца з 18 чалавек. Ажыцьцяўляе кіраваньне дзейнасьцю біржы.
  • Рэвізійная камісія. Ажыцьцяўляе фінансавы нагляд.
  • Старшыня. Зацьвярджае Палажэньні аб арганізацыі і дзейнасьці 3-х дэпартамэнтаў:
    • Маркетынгу, лістынгу і каціровак. Улічвае каштоўныя паперы на рэгуляваным рынку і ў шматбаковай гандлёвай сыстэме (ШГС). Выдае штомесячны бюлетэнь пра гандаль дапушчанымі да абарачэньня каштоўнымі паперамі.
    • Нагляду за рынкам. Сочыць за дзейнасьцю ўдзельнікаў біржы дзеля выкананьня заканадаўства.
    • Электронных сыстэмаў. Кіруе Аўтаматызаванай інтэграванай гандлёвай сыстэмай (АІГС) біржы[5].

Удзельнікі[рэдагаваць | рэдагаваць крыніцу]

На 2021 год «Фондавая біржа Малдовы» налічвала 14 удзельнікаў, зь іх 7 банкаў: «Аграпрамбанк Малдовы», «Банк фінансаў і гандлю», «Брокер М-Д», «Валінвэст», «Вікторыябанк», «ДААЦ-Інвэст», «Джэст-Капітал», «Малдпрамбудбанк», «Мобіясбанк», «Моладзь-ДС», «Проажыёк», «Про Інвэст Капітал», «Эксімбанк» і «Энэргбанк»[6].

Акцыі[рэдагаваць | рэдагаваць крыніцу]

На 2021 год на рэгуляваным рынку «Фондавай біржы Малдовы» гандлявалі паямі 16 прадпрыемстваў, у тым ліку 8 банкаў: «Аграпрамбанк Малдовы», стравахальнік «Астэра», «Банк фінансаў і гандлю», «Вікторыябанк», «Гандальбанк», «ЦТЦ Альфа», стравахальнік «Малдгруз», «Малдпрамбудбанк», «Малдстрах», «Мапасаўта», «Мобіясбанк», «Рыбалоўнае прадпрыемства Каштэсьця», «Сланечнік», «Сьпікушор-БЛ», «Энэргбанк» і «Эўракрэдытбанк»[7]. На 11 сакавіка 2021 году паямі яшчэ 41 прадпрыемства гандлявамі ў шматбаковай гандлёвай сыстэме (ШГС) біржы[8].

Камісійныя зборы[рэдагаваць | рэдагаваць крыніцу]

На 2021 год улік каштоўных папераў на «Фондавай біржы Малдовы» складаў 800 леяў (45 $) у Шматбаковай гандлёвай сыстэме (ШГС) і 2500 леяў (140 $) на рэгуляваным рынку. Гадавое ўтрыманьне каштоўных папераў на рэгуляваным рынку каштавала 15 000 леяў (840 $). Збор са зьдзелкі складаў ад 2 леяў + 0,05 % ад яе аб'ёму да 50 леяў (2,80 $)[9].

Мінуўшчына[рэдагаваць | рэдагаваць крыніцу]

У сьнежні 1994 году заснавалі «Фондавую біржу Малдову» («ФБМ») паводле Закону «Аб абарачэньні каштоўных папераў і фондавых біржах». Заснавальнікамі выступілі 34 брокерскія дамы. Статутны капітал біржы склаў 238 000 малдоўскіх леяў (50 000 даляраў ЗША). У траўні 1995 году ФБМ уступіла ў Саюз эўразійскіх фондавых біржаў (Турэччына). Агенцтва міжнароднага разьвіцьця ЗША аснасьціла «ФБМ» гандлёвым абсталяваньнем. 26 чэрвеня 1995 году правялі першы гандаль на біржы[5]. За 1995—1998 гады лік прадпрыемстваў, якія разьмясьцілі свае паі на біржы, вырас з 16 да рэкордных 569. Аб'ём гандлю вырас з 2,226 млн леяў (495 тыс. $) да 436 330 834.23 леяў (81,214 млн $)[2]. 26 чэрвеня 1998 году ФБМ заснавала Нацыянальны дэпазытарый каштоўных папераў (НДКП) Малдовы пры дапамозе ангельскага бухгальтарскага прадпрыемства «Прайс-Ўотэрхаўс» (Лёндан). Зь 2000 году Нацыянальная камісія каштоўных папераў Малдовы ўвяла біржавы індэкс «CNVM-32». У красавіку 2000 году «ФБМ» стала самакіраванай некамэрцыйнай арганізацыяй, што магла ўсталёўваць правілы дзейнасьці сваіх сябраў[5]. У 2007 годзе абсяг біржавога гандлю паямі 294 прадпрыемстваў упершыню перасягнуў 1 млрд леяў і склаў 1,233 млрд леяў (101,628 млн $)[2].

Зь 2008 году «ФБМ» стала камэрцыйнай установай, таму стала кіравацца Законам «Аб рынку каштоўных папераў». У ліпені 2008 году «ФБМ» уступіла ў Міжнародную асацыяцыю біржаў краінаў СНД (Расея). У сакавіку 2015 году набыў моц Закон «Аб рынку капітала». У траўні 2015 году «ФБМ» атрымала дазвол на дзейнасьць у якасьці апэратара рынку і на бестэрміновую дзейнасьць рэгуляванага рынку. Адначасна Рада ФБМ ухваліла Правілы рэгуляванага рынку. У лістападзе 2015 году «ФБМ» атрымала бестэрміновы дазвол на дзейнасьць шматбаковай гандлёвай сыстэмы. Адначасна зацьвердзілі Правілы шматбаковай гандлёвай сыстэмы. Статутны капітал біржы павялічылі да 500 000 леяў[5]. У 2019 годзе выручка біржы вырасла да 12,135 млн леяў (690 тыс. $), апэрацыйны прыбытак — да 9,207 млн леяў (523 тыс. $), а чысты прыбытак — да 9,311 млн леяў (529 тыс. $)[10].

У 2020 годзе аб'ём гандлю на біржы больш як 30-кратна абваліўся да 103,161 млн леяў (5,956 млн даляраў ЗША) з 3,279 млрд леяў (186,611 млн $) у рэкордным 2019 годзе. У выніку аб'ём гандлю ўпаў амаль да ўзроўню 2017 году, калі той склаў 102,726 млн леяў (5,555 млн $)[3]. Лік гандляваных на біржы прадпрыемстваў упаў з 84 да 48[2].

Крыніцы[рэдагаваць | рэдагаваць крыніцу]

  1. ^ Управа(рас.) // АТ «Фондавая біржа Малдовы», 2021 г. Праверана 28 сакавіка 2021 г.
  2. ^ а б в г Агульная статыстыка(рас.) // АТ «Фондавая біржа Малдовы», 2021 г. Праверана 28 сакавіка 2021 г.
  3. ^ а б Афіцыйны ўсярэдненвы курс абмену за даляр ЗША (17,5751 у 2019 годзе і 17,3201 у 2020-м)(рум.) // Нацыянальны банк Малдовы, 2021 г. Праверана 28 сакавіка 2021 г.
  4. ^ Рэквізыты(рас.) // АТ «Фондавая біржа Малдовы», 2021 г. Праверана 28 сакавіка 2021 г.
  5. ^ а б в г Гісторыя(рас.) // АТ «Фондавая біржа Малдовы», 2021 г. Праверана 28 сакавіка 2021 г.
  6. ^ Сябры(рас.) // АТ «Фондавая біржа Малдовы», 2021 г. Праверана 28 сакавіка 2021 г.
  7. ^ Акцыі рэгуляванага рынку(рас.) // АТ «Фондавая біржа Малдовы», 2021 г. Праверана 28 сакавіка 2021 г.
  8. ^ Сьпіс каштоўных папераў, дапушчаных да гандлю ў межах ШГС(рас.) // АТ «Фондавая біржа Малдовы», 2021 г. Праверана 28 сакавіка 2021 г.
  9. ^ Сьпіс камісійных збораў(рас.) // АТ «Фондавая біржа Малдовы», 2021 г. Праверана 28 сакавіка 2021 г.
  10. ^ Фінансавая справаздача за 2019 год(рум.) // АТ «Фондавая біржа Малдовы», 2021 г. Праверана 28 сакавіка 2021 г.

Вонкавыя спасылкі[рэдагаваць | рэдагаваць крыніцу]