Жылінскія (княскі род)

Жылі́нскія — княжацкі род у Вялікім Княстве Літоўскім. Паводле расейскіх радаводных кніг паходзіў ад Івана Андрэевіча Жылкі, сына вяземскага князя Андрэя Ўладзімеравіча, які загінуў у бітве з манголамі на рацэ Калка ў 1223 годзе. Жылка валодаў невялікім удзелам з цэнтрам у сяле Жыліна каля Рослава. Гэтыя землі напрыканцы XV ст. адышлі да Вялікага княства Маскоўскага, але князь Сямён Фёдаравіч Жылінскі (? — пасьля 1500) застаўся ў Вялікім Княстве Літоўскім, ад вялікага князя Аляксандра атрымаў двор Тулава каля Віцебску. Род скончыўся ў 1602 годзе на ягоным праўнуку Андрэі (? — 1602).

Радавод

Фёдар

• Сямён (? — пасьля 1500)
  • Васіль (? — 1529), намесьнік медніцкі ў 1507—1514 гадах і крычаўскі ад 1516 году, у 1528 годзе ставіў у войска двух коньнікаў
    • Іван (? — каля 1557), валодаў дваром Цюдзенішкі каля Меднікаў і Рогава
      • Ян (? — каля 1600), у 1595 годзе атрымаў сёлы Ланкелішкі, Мальнічы й Харомы каля Пуні
      • Андрэй (? — 1602), войскі віцебскі ў 1596 годзе, пасьля маршалак упіцкі, ад 1597 году маршалак вількамірскі; валодаў маёнткам Конскі ў Віцебскім павеце.
  • Іван (? — пасьля 1552), атрымаў пацьвярджэньні на Тулава ад Жыгімонта Старога (1516) і Жыгімонта Аўгуста (1552)

Літаратура

• Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2005. — Т. 1: Абаленскі — Кадэнцыя. — 684 с. — ISBN 985-11-0314-4