Скарына (выдавецтва)

Выдавецтва "Скарына"
Дэвіз	"Кнігі ствараюць супольнасьць"
Заснаваная	6 жніўня 2022
Заснавальнікі	Ігар Іваноў, Уладзіслаў Гарбацкі
Краіна	Вялікабрытанія
Разьмяшчэньне	Лёндан
Ключавыя фігуры	Ігар Іваноў, Караліна Мацкевіч, Ганна Комар, Тацьцяна Астроўская, Уладзіслаў Гарбацкі
https://www.skarynapress.com/

Выдавецтва «Скарына» (па-ангельску: Skaryna ці Skaryna Press) — беларускае выдавецтва ў Лёндане. Заснаванае 6 жніўня 2022 беларускім і брытанскім выдаўцом, гісторыкам, бібліятэкарам Ігарам Івановым і ягонымі аднадумцамі. Выдавецтва спэцыялізуецца на беларускамоўнай літаратуры. У пэрспэктыве выданьне кнігаў на іншых мовах.

Гісторыя

У беларускага замежжа — доўгая гісторыя і багатая традыцыя. Лёндан займае асаблівае месца ў гэтай гісторыі: тут друкаваў кнігі Ян зь Літвы, прыдумаў «ŭ» Аляксандар Рыпінскі, ствараў багатую літургічную спадчыну а. Аляксандар Надсан.

Выдавецтва «Скарына» было створанае групай аднадумцаў у 2022 годзе, каб працягваць і ўзбагачаць гэтую традыцыю, адлюстроўваць патэнцыял беларускага замежжа, і наладжваць сувязі паміж аўтар-к-амі і чытацтвам у Беларусі і за яе межамі.

Выдавецтва адрозьніваецца мабільнасьцю, часта наведвае свае чытацтва па сьвеце: у Польшчы, Летуве, Нямеччыне, Сакартвэле. Слоганам выдавецтва зьяўляецца выраз «Кнігі зьбіраюць супольнасьць».

Першымі кнігамі «Скарыны» сталі паэтычны зборнік Ганны Комар «Мы вернемся» (гэты цудоўны паэтычны дакумэнт Беларусі 2022—2021 гадоў не мог выйсьці ў Беларусі, таму рыхтаваўся маскоўскім выдавецтвам і быў падхоплены «Скарынай») і цудоўны пераклад украінскага тытана беларускага паходжаньня Агатангела Крымскага «Бэйруцкія апавяданьні».

Місія

На старонцы выдавецтва пазначаныя тры галоўныя прынцыпы дзейнасьці, своеасаблівая місія:

• Асьветніцтва — жаданьне казаць непрамоўленае або — наўмысна ці ненаўмысна — забытае, а таксама захоўваць, распаўсюджваць і памнажаць традыцыі і дасягненьні, што ўзьніклі ў беларускім замежжы;

• Супраціў цэнзуры і абмежаваньням свабоды творчасьці, каб быць пляцоўкай для вольнага абмену думкамі;

• Сучаснасьць — ствараць і выдаваць кнігі па-новаму, тут і цяпер, каб яны разьляталіся па ўсім беларускім сусьвеце і жылі доўгім жыцьцём.