Беларуска-ўкраінская граніца
Міждзяржаўная граніца | |
Граніца дзяржаваў |
Беларусь Украіна |
---|---|
Час існаваньня | з 1991 |
Працягласьць | 1084 км |
Беларуска-ўкраінская граніца — дзяржаўная граніца працягласьцю каля 1 084 км[1]. Пачынаецца ад патройнага сутыку з Польшчаю на захадзе і цягнецца да патройнага сутыку з Расеяй на ўсходзе.
Гісторыя
Сучасная дзяржаўная граніца паходзіць зь верасьня 1939 году — часоў далучэньня Заходняй Беларусі да БССР і Заходняй Ўкраіны да УССР.
Аднак граніца мае гістарычныя карані, бо прыблізна гэтаксама праходзіў падзел паміж Вялікім Княствам Літоўскім і Каралеўствам Польскім згодна зь Люблінскай уніяй. Пасьля падзелаў Рэчы Паспалітай, падобны выгляд мела мяжа паміж Гарадзенскай ды Менскай губэрнямі з аднаго боку і Валынскай ды Кіеўскай — зь іншага.
У 1-й палове 20 стагодзьдзя на захадзе падобныя межы падзялялі Палескае і Валынскае ваяводзтвы міжваеннай Польскай Рэспублікі, а на ўсходзе — савецкія рэспублікі БССР і УССР.
Упершыню мяжа паміж савецкімі рэспублікамі была прызнаная Дамоваю паміж БССР і УССР ад 12 сьнежня 1990.
Статус дзяржаўнай граніцы з Украінаю нададзены пастановаю Вярхоўнага Савету Беларусі ад 11 чэрвеня 1993, але маецца міжнародная дамова паміж Беларусьсю і Ўкраінаю, у якой яны наўзаем прызнаюць былыя межы БССР і УССР, прызнаныя ў 1990.
На сёньняшні дзень дзяржаўная граніца рэгулюецца Дамоваю паміж Беларусьсю і Ўкраінаю аб сяброўстве, дабрасуседзтве і супрацоўніцтве ад 17 чэрвеня 1995. Дамова аб Дзяржаўнай граніцы паміж Беларусьсю і Ўкраінаю ад 12 траўня 1997 у той самы год была ратыфікаваная Вярхоўнай Радаю Ўкраіны, аднак да сёньня не ратыфікаваная Нацыянальным Сходам РБ[1].
Пытаньня ратыфікацыі Дамовы будзе разглядацца на вясновай сэсіі Нацыянальнага Сходу якая пачне працу 2 красавіка 2010 году[2][3]. Паводле старшыні Дзяржаўнага пагранічнага камітэту Беларусі Ігара Рачкоўскага працягласьць працы па дэмаркацыі граніцы можа працягвацца да 10 год і патрабуе Br51 млрд[4].
Крыніцы
- ^ а б Государственная территория и государственная граница Республики Беларусь
- ^ Депутаты рассмотрят договор о белорусско-украинской границе // Interfax, 5.01.2010
- ^ Вопрос по ратификации Договора о белорусско-украинской границе может быть решен в ближайшее время — посол Украины // Interfax, 04.11.2009
- ^ Екатерина Нечаева. Для демаркации белорусско-украинской границы потребуется до десяти лет // БЕЛТА, 19 студзеня 2010
|