Антоні Казімер Сапега
 Герб «Ліс» | |
| Асабістыя зьвесткі | |
|---|---|
| Нарадзіўся | 1689 |
| Памёр | 16 траўня 1739 |
| Пахаваны | |
| Род | Сапегі |
| Бацькі | Юры Станіслаў Сапега Ізабэла Алена з Палубінскіх |
| Дзейнасьць | палітык |
Антоні Казімер Сапега (1689 — 16 траўня 1739, Дзярэчын) — дзяржаўны дзяяч Вялікага Княства Літоўскага. Стольнік вялікі літоўскі (1706—1709), кашталян троцкі (з 1737).
Біяграфія
[рэдагаваць | рэдагаваць крыніцу]З магнацкага роду Сапегаў гербу «Ліс», сын Юрыя Станіслава і Ізабэлы Алены з Палубінскіх.
У 1705—1708 навучаўся ў Парыжы. У 1711—1713 быў у апазыцыі да караля і вялікага князя Аўгуста Моцнага. Узяў актыўны ўдзел у Віленскай канфэдэрацыі (1716), калі падпісаў акт генэральнай канфэдэрацыі як камісар ад Троцкага ваяводзтва. У 1726 разам са стрыечным братам Янам Казімерам езьдзіў у Пецярбург для заручынаў сына апошняга Пятра Паўла з Марыяй Меншыкавай і для ўсталяваньня кантактаў з прадстаўнікамі расейскай эліты.
Абіраўся дэпутатам Галоўнага Трыбуналу ў 1714, 1719, 1724 (ягоны маршалак). Актыўна дзейнічаў на соймах 1730 і 1732, каб сарваць паседжаньні. У 1733 на элекцыйным сойме з большасьцю радзіны падтрымаў кандыдатуру Станіслава Ляшчынскага. Захоўваў яму вернасьць да самай абдыкацыі (1736).
У 1738 браў актыўны ўдзел у працы камісіі па павелічэньні войска, беспасьпяхова імкнуўся абкласьці падаткам на войска радзівілаўскія «Нойбурскія маёнткі»[1].
Да нашага часу захаваліся фрагмэнты дзёньніка А. К. Сапегі, датаваныя 1728—1733.
Крыніцы
[рэдагаваць | рэдагаваць крыніцу]- ^ Андрэй Мацук. Сапега Антоні Казімір // ВКЛ. Энцыкл. — Мн.: 2005 Т. 2. С. 541.
Літаратура
[рэдагаваць | рэдагаваць крыніцу]- Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — 788 с. — ISBN 985-11-0378-0
- Энцыклапедыя гісторыі Беларусі. У 6 т. / Беларус. Энцыкл.; Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн.: БелЭн, 2001. — Т. 6. Кн. 1: Пузыны — Усая. — 591 с. — ISBN 985-11-0214-8