Baldur’s Gate III

Baldur’s Gate 3
Дата выпуску	Windows 3 жніўня 2023 PlayStation 5 6 верасьня 2023 macOS 22 верасьня 2023 Xbox Series X/S 7 сьнежня 2023
Дата анансаваньня	6 чэрвеня 2019
Жанр	ролевая відэагульня
Ліцэнзія	платная ліцэнзія[d]
Сэрыя	Baldur’s Gate
Стваральнікі
Распрацоўнік	Larian Studios
Выдавец	Larian Studios
Мова інтэрфэйсу	ангельская мова
Кіраўнік	Свэн Вінке
Прадусар	Дэйвід Ўолгрэйв
Праграмісты	Бэрт Ван Сэмэртыр Блэйк Молтбі
Мастак	Ёахім Влемінкс
Сцэнарыст	Адам Сьміт
Кампазытар	Барыслаў Славаў
Тэхнічныя дэталі
Плятформы	Windows PlayStation 5 macOS Xbox Series X/S
Рэжымы	адзінаасобная гульня, шматасобавая гульня
Носьбіт	лічбавы распаўсюд[d]
Кіраваньне	клявіятура, кампутарная мыш і клявіятура кампутара
Афіцыйны сайт
Baldur’s Gate 3 у Вікісховішчы

Baldur’s Gate 3 (па-беларуску: Бальдэрава брама 3) — ролевая відэагульня 2023 року, распрацаваная і выдадзеная бэльгійскай кампаніяй Larian Studios. Гэта трэцяя частка з сэрыі гульняў Baldur’s Gate, заснаваных на настольнай фэнтэзійнай ролевай сыстэме Падзямельлі і цмокі. Даступная для macOS, Windows, PlayStation 5 ды Xbox Series X/S.

Гульня атрымала ўхвалу крытыкаў за гульнявы працэс, сюжэт і якаснае выкананьне. Атрымала некалькі розных узнагародаў за найлепшую гульню году.

Гульнявы працэс

Baldur’s Gate 3 — ролевая відэагульня з элемэнтамі адзінаасобнага і каапэратыўнага праходжаньня. Гульцы могуць стварыць аднаго або некалькіх пэрсанажаў і гуляць з дапамогай згенэраваных пэрсанажаў. Альбо можна згуртавацца ў анляйне зь іншымі жывымі гульцамі.

Сыстэма заданьняў у гульні гнуткая — існуе некалькі спосабаў выкананьня заданьняў. Гульня падзеленая на тры акты, дзеяньне кожнага зь якіх адбываецца ў розных частках сьвету. Унутры гэтых актаў заданьні можна выконваць літаральна ў якой заўгодна пасьлядоўнасьці, і нават зьнішчэньне негульнявых пэрсанажаў не замінае праходзіць гульню.

У адрозьненьне ад ранейшых гульняў сэрыі, у Baldur’s Gate 3 зьявіўся пакрокавы рэжым бітваў, як у раньніх гульнях кампаніі Larian Divinity: Original Sin і Divinity: Original Sin II; правілы бітвы рэгулююцца правіламі 5-га выданьня Падзямельляў і цмокаў. Большасьць дзеяньняў і закляцьцяў узятыя адтуль жа. Існуюць 12 клясаў пэрсанажаў, у сваю чаргу падзеленых на 46 падклясаў. Кожны кляс мае ўласную сыстэму бою: прыкладам, чараўнік стварае разнастайныя закляцьці, а барбар добра валодае навыкам ручной бойкі. Для пэрсанажа можна абраць некалькі клясаў, што робіць яго больш унікальных і рознабаковым.

Для ўдзелу ў вашай групе даступныя дзесяць пэрсанажаў-кампаньёнаў з уласнай гісторыяй і біяграфіяй, якую таксама можна вывучаць. З гэтымі пэрсанажамі можна падтрымліваць стасункі, выбіраючы розныя варыянты дыялёгаў. Некаторыя з пэрсанажаў будуць даступныя толькі пры ўмове пэўнага праходжаньня сюжэту ці выбару дыялёгаў.

Сюжэт

Падзеі Baldur’s Gate 3 разгортваюцца ў сьвеце Забытых каралеўстваў у 1492 року гульнявой храналёгіі, праз 120 гадоў пасьля падзеяў відэагульні Baldur's Gate II: Shadows of Amn і празь некалькі месяцаў пасьля падзеяў настольнага дадатку Baldur’s Gate: Descent into Avernus.

Усе падзеі ў гульні суправаджае дыктарка Амэлія Тайлер, якая выступае ў якасьці гаспадыні падзямельля(d). Пэрсанажаў можна распрацаваць самастойна, скарыстацца шасьцю шаблёнамі альбо сёмым напаўгатовым пэрсанажам, вядомым як «Цёмны бес». Шасьцёх згаданых можна наняць і ў кампанію да сваіх пэрсанажаў.

Вонкавыя спасылкі

• Афіцыйная бачына